Sugundu livru di Samuel 8:1-18
8 Un ténpu dipôs, Davidi ganha kes filisteu i el fika ta manda na es, i Davidi toma Metege-Amá di kes filisteu.
2 El ganha kes moabita, el pô-s ta deta na txon i el midi-s ku un kórda. Kes ki fika déntu di medida di dôs kórda tinha ki moreba, i kes ki fika déntu di medida di un korda ta fikaba bibu. I kes moabita bira sérvus di Davidi i es fika ta paga-l un taxa.
3 Davidi ganha Adadezer, fidju di Reobe, rei di Zobá. Adadezer staba na kaminhu ta bai toma zóna di riu Eufratis pa el fika ta kontrolaba el otu bês.
4 Davidi toma Adadezer 1.700 ómi ki ta montaba kabalu i 20 mil trópa ki staba apé. Dipôs, Davidi korta tendon di tudu kes kabalu di karu di géra. Má el dexa 100 di es sen korta tendon.
5 Kantu kes síriu di Damasku ba djuda Adadezer di Zobá, Davidi mata 22 mil di kes trópa.
6 Dipôs, Davidi poi un grupu di trópa na Síria di Damasku, i kes trópa di Síria bira sérvu di Davidi i es fika ta paga-l un taxa. Jeová ta daba Davidi vitória* pa tudu lugar ki el baba.
7 Davidi toma kes skudu di oru rodóndu di kes sérvu di Adadezer i el leba-s pa Jiruzalen.
8 Tanbê, Davidi leba un monti kóbri ki el panha na Beta ku Berotai, ki éra sidadis di Adadezer.
9 Toi, rei di Amate, obi ma Davidi ganha tudu kes trópa di Adadezer.
10 (Adadezer dja lutaba kóntra Toi txeu bês.) Nton, Toi manda se fidju Jeron pa ba pergunta rei Davidi modi ki el staba i pa da-l parabens pamodi el luta kóntra Adadezer i el ganha-l. Jeron leba Davidi kuzas di prata, di oru i di kóbri.
11 Rei Davidi santifika kes kuza li pa Jeová, sima el santifikaba kes prata i kes oru ki el traze di tudu kes nason li ki dja el ganhaba:
12 Síria, Moabe, kes amonita, kes filisteu i kes amalekita. Tanbê el santifika pa Deus tudu kes kuza ki el toma di Adadezer, fidju di Reobe, rei di Zobá.
13 Davidi tanbê fika txeu konxedu kantu el volta di vali di Sal, dipôs ki el mata 18 mil edomita.
14 El poi trópas na tudu tiritóriu di Edon i tudu kes edomita bira sérvus di Davidi. Jeová ta daba Davidi vitória pa tudu lugar ki el baba.
15 Davidi kontinua ta governa Israel interu, i el ta fazeba kel ki éra dretu i justu pa djudaba tudu se povu.
16 Joabe, fidju di Zeruia, éra xéfi di trópa di Davidi, i Jeozafá, fidju di Ailude, ta skrebeba kes kuza ki ta kontiseba na reinu.
17 Zadoki, fidju di Aitube, i Aimeleki, fidju di Abiatar, éra saserdóti i Seraías éra sekretáriu.
18 Benaia, fidju di Joiada, éra xéfi di kes keritita i di kes peletita. I kes fidju di Davidi tinha puzison inportanti.*
