Efézius 3:1-21
3 Pur isu, ami Paulu, ki sta prézu pamodi Kristu Jizus, pa djuda nhos, ki é pesoas di nason...*
2 N ta atxa ma nhos obi ma N resebe responsabilidadi pa djuda nhos tra pruvetu di kel grandi bondadi di Deus ki N dadu pa djuda nhos,
3 ma Deus faze-m konxe se segredu sagradu. N skrebe nhos antis sobri kel-li di manera brévi.
4 Asi, óras ki nhos lé kel-li, nhos ta da kónta di intendimentu ki N ten di segredu sagradu di Kristu.
5 Na kes otu jerason, kes fidju di ómi ka txiga di konxe kel segredu li sima el sta ta mostradu gósi através di spritu pa kes apóstlu i profétas, ki é santu.
6 Kel segredu é kel-li: kes ki é pesoas di nason ki sta unidu ku Kristu Jizus, ta ben erdaba kuzê ki Kristu ta erda i bira párti di kel korpu. Es ta ben resebeba kes mésmu kuza ki Deus promete-nu pamodi kes notísia sábi.
7 N bira un sérvu* di kel segredu li pamodi kel grandi bondadi di Deus. El da-m kel prezenti li kantu el da-m se puder.
8 Ami, kel ómi ménus inportanti di ki kel ménus inportanti na meiu di tudu kes santu, N dadu kel grandi bondadi li, asi pa N pâpia di kes notísia sábi sobri rikéza di Kristu ki ka ta da pa intende
9 i poi tudu algen ta odja modi ki sta organizadu kel segredu sagradu ki Deus, ki kria tudu kuza, sukundi* pa txeu ténpu.
10 Kel-li kontise, asi pa gósi kes govérnu i kes autoridadi ki sta na kes lugar na séu, konxe através di kongregason, kel sabedoria di Deus ki ta mostradu di maneras diferenti.
11 Kel-li sta di akordu ku se vontadi pa tudu ténpu ki el faze através di Kristu, nos Sinhor Jizus.
12 Através di el nu pode pâpia ku liberdadi i nu pode txiga na Deus sen prubléma i ku kunfiansa, pamodi nu ten fé na Kristu.
13 Pur isu, N ta pidi nhos pa nhos ka dizanima pamodi prubléma ki N sta aguenta pa djuda nhos, pamodi es siginifika glória pa nhos.
14 É pur isu ki N ta juelha dianti di Pai,
15 ki é kel ki tudu família na séu i na téra debe ses nómi.
16 N ta ora pa Deus, asi pa através di se grandi glória, el dexa kel algen ki nhos é di pa déntu bira fórti, ku puder através di se spritu,
17 i pa através di nhos fé, Kristu mora na nhos korason ku amor. Tanbê N ta ora pa nhos fika ku raís finkadu na alisérsi,
18 asi pa djuntu ku tudu kes santu nhos konsigi intende dretu kal ki é largura, kunprimentu, altura i fundura,
19 i konxe amor di Kristu, ki é mutu más inportanti ki konhisimentu, asi pa nhos pode resebe di Deus tudu kualidadi ki el ta da.
20 Deus, di akordu ku se puder ki ta aji na nos, pode faze mutu más txeu inda di ki tudu kel ki nu ta pidi ô ki nu ta imajina.
21 Nton, pa el dadu glória através di kongregason i di Kristu Jizus pa tudu kes jerason, pa tudu ténpu. Amén.
Nótas di rodapé
^ Ta parse ma es frazi ta kontinua na versíklu 14.
^ Ô: “ministru”.
^ Na gregu ta fla: “sukundi na Deus”.
