Efézius 5:1-33
5 Pur isu, nhos imita Deus, sima fidjus ki el ta ama,
2 i nhos kontinua ta anda na amor sima Kristu ki tanbê ama-nu* i da se vida pa nos* sima un oférta i un sakrifisiu, un txeru sábi pa Deus.
3 Konportamentu seksual mariadu,* kalker tipu di inpuréza i ganánsia ka debe nen papiadu na nhos meiu, pamodi é ka dretu pa pesoas santu.
4 Nen konportamentu sen vergónha, nen konbérsu tolu, nen piada indisenti, kuzas ki ka debe papiadu di es, má, envês di kel-li, nhos agradese Deus.
5 Pamodi nhos sabe i nhos ta intende dretu ma ningen ki ta ten konportamentu seksual mariadu,* nen ningen ki é inpuru ô ganansiozu, ki é un tipu di idolatria, ka ta ten ninhun eransa na Reinu di Kristu i di Deus.
6 Pa ningen ka ingana nhos ku palavras ki é ka verdadi, dja ki pamodi kes kuza li, raiba di Deus ta ben riba di kes fidju di dizobidiensa.
7 Pur isu, ka nhos faze sima es.*
8 Pamodi antis nhos staba na sukuru, má gósi nhos sta na lus unidu ku Sinhor. Nhos kontinua ta anda sima fidjus di lus,
9 pamodi anda na lus, siginifika ser bon na tudu tipu di kuza, ser justu i anda di akordu ku verdadi.
10 Nhos kontinua ta djobe dretu kuzê ki ta agrada Sinhor
11 i nhos para di faze óbras di sukuru ki ka ten valor, má nhos traze-s pa lus.
12 Pamodi kes kuza ki es ta faze sukundidu ta da vergónha ti mésmu pa pâpia di es.
13 Tudu kuza ki trazedu pa lus* ta fika klaru, i tudu kuza ki fika klaru ta bira lus.
14 Pur isu, ta fladu: “Abo ki sta durmi, korda i labanta di mórti, i Kristu ta limia-u.”
15 Nton, nhos toma txeu kuidadu pa nhos ka anda sima algen tolu, má sima algen ki ten sabedoria,
16 ta uza nhos ténpu di midjór manera,* pamodi nu sta vive na ténpu mau.
17 Pur isu, nhos para di ser tolu, má nhos kontinua ta intende kal ki é vontadi di Jeová.*
18 Tanbê, ka nhos fika moku,* pamodi el ta poi nhos ta faze txeu kuza mariadu,* má nhos fika xeiu di spritu.
19 Nhos pâpia ku kunpanheru* ku salmus, lovor pa Deus i kántikus spritual, ta kanta i ta lova Jeová* na nhos korason,
20 sénpri ta agradese Deus, nos Pai, pa tudu kuza, na nómi di nos Sinhor Jizus Kristu.
21 Nhos obi ku kunpanheru pamodi nhos ten txeu ruspetu pa Kristu.
22 Mudjer debe obi ku se maridu sima el ta obi ku Sinhor,
23 pamodi maridu é kabésa di mudjer sima Kristu é kabésa di kongregason i salvador di es korpu.
24 Na verdadi, sima kongregason ta obi ku Kristu, mudjer tanbê debe obi ku se maridu na tudu kuza.
25 Maridu, kontinua ta ama bu mudjer, sima tanbê Kristu ama kongregason i el da se vida pa el.
26 El faze kel-li pa santifika kongregason, kantu el linpa-l ku palavra di Deus sima ki é ku banhu di agu.
27 Asi pa kongregason bira bunitu na se dianti, sen mantxa, sen ruga, nen kalker otu kuza sima kes-li, má santu i sen difeitu.
28 Di mésmu manera, maridu debe ama se mudjer sima el ta ama se própi korpu. Ómi ki ta ama se mudjer ta ama se kabésa,
29 pamodi ninhun ómi nunka ka ôdia se própi korpu.* Má el ta da-l kumida i el ta kuida di el, sima Kristu ta faze ku kongregason,
30 pamodi nos é ménbrus di se korpu.
31 “É pur isu ki un ómi ta dexa se pai ku se mai i el ta djunta ku* se mudjer, i es dôs ta bira sô un karni.”
32 Kel segredu sagradu li é inportanti. Gósi N sta ta pâpia sobri Kristu i di kongregason.
33 Má, pa kada un di nhos ama se mudjer sima el ta ama se kabésa. Tanbê, mudjer debe ruspeta se maridu di korason.
Nótas di rodapé
^ Ô talvês: “ama nhos”.
^ Ô talvês: “nhos”.
^ Na gregu é porneia. Djobe Disionáriu di Bíblia.
^ Djobe Disionáriu di Bíblia.
^ Ô: “Pur isu, ka nhos djunta ku es”.
^ Ô: “ki reprendedu”.
^ Ô: “ta kunpra ténpu”.
^ Na gregu ta fla: “moku ku vinhu”.
^ Ô: “ta fika diskontroladu”.
^ Ô talvês: “ku nhos mê”.
^ Na gregu ta fla: “karni”.
^ Ô: “kontinua ku”.
