Gálatas 1:1-24
1 Di Paulu, ki é apóstlu, ka pamodi ómis nen pamodi algun ómi ki skodje-m, má pamodi Jizus Kristu i pamodi Deus, nos Pai, ki resusita-l,*
2 i di tudu kes irmon ki sta ku mi, pa kes kongregason di Galásia:
3 Pa Deus, nos Pai, i pa Sinhor Jizus Kristu mostra nhos grandi bondadi i da nhos pas.
4 El intrega se kabésa pa nos pekadu, asi pa el libra-nu di es mundu mau,* di akordu ku vontadi di Deus, nos Pai.
5 Pa El dadu glória pa tudu ténpu. Amén.
6 N sta dimiradu pamodi nhos sta ta afasta faxi* di Kel ki txoma nhos ku kel grandi bondadi di Kristu, pa sigi otu tipu di notísias sábi.
7 É ka pamodi ten otus notísia sábi, má ten alguns ki sta ta kria nhos prubléma i es krê distorse kes notísia sábi sobri Kristu.
8 Má sikrê un di nos ô un anju di séu pâpia ku nhos algun kuza diferenti di kes notísia sábi ki nu pâpia ku nhos, pa el maldisuadu.
9 Sima nu flaba antis, N ta fla nhos gósi otu bês: ken ki pâpia ku nhos algun kuza diferenti di kes notísia sábi ki dja nhos setaba, pa el maldisuadu.
10 Na verdadi, é ómis ki N sta tenta konvense gósi ô é Deus? Ô N sta tenta agrada ómis? Si ti inda N staba ta agrada ómis, N ka ta sérba skravu di Kristu.
11 Pamodi N krê pa nhos sabe, irmons, ma kes notísia sábi ki N pâpia ku nhos, ka ben di ómis.
12 Pamodi N ka resebe-s di un ómi, nen N ka inxinadu es, má é Jizus Kristu ki mostra-m es.
13 É klaru ki nhos obi ta papiadu di manera ki N ta konportaba kantu N ta staba na relijion di judeus, ma N ta pirsigiba kongregason di Deus ku maldadi* i ku obijetivu di kaba ku el,
14 i ma N staba ta faze más prugrésu na relijion di judeus di ki txeu di nha nason ki tinha mésmu idadi ki mi, dja ki mi éra más zelozu pa kes tradison di nhas gentis grandi.
15 Má Deus, ki pô-m ta nase* i ki txoma-m através di se grandi bondadi, atxa dretu
16 uza-m pa N pâpia di notísias sábi pa pesoas di otus nason, asi pa es pode konxe se Fidju. Kantu el skodje-m pa N faze kel-li, N ka pidi ningen* konsedju,
17 nen N ka bai pa Jiruzalen pa kes ki éra apóstlu antis di mi, má N bai pa Arábia i dipôs N volta pa Damasku.
18 Nton, três anu dipôs N subi pa Jiruzalen pa vizita Séfas* i N fika ku el 15 dia.
19 Má N ka odja ninhun di kes otu apóstlu, sô Tiagu, irmon di Sinhor.
20 Sobri kes kuza ki N sta ta skrebe nhos, N ta garanti nhos dianti di Deus ma N ka sta ta konta mintira.
21 Dipôs di kel-li, N bai pa kes lugar di Síria i di Silísia.
22 Má kes kongregason di Kristu na Judea ka konxeba mi kara-kara.
23 Sô es ta obiba ta fladu: “Kel ómi ki antis ta pirsigiba nos, gósi sta ta pâpia di kes notísia sábi di kel fé ki antis el krê kababa ku el.”
24 Nton, es kumesa ta da Deus glória pamodi mi.
Nótas di rodapé
^ Na gregu ta fla: “labanta-l di mórti”.
^ Ô: “sistéma mau”. Djobe Disionáriu di Bíblia.
^ Ô: “nhos sta ta tradu faxi”.
^ Na gregu ta fla: “txeu dimás”.
^ Na gregu ta fla: “ki sipara-m di bariga di nha mai”.
^ Na gregu ta fla: “karni i sangi”.
^ Ki tanbê ta txomadu Pedru.
