Gálatas 2:1-21
2 Nton, 14 anu dipôs, N subi otu bês pa Jiruzalen ku Barnabé, i tanbê N leba Titu djuntu ku mi.
2 N subi pamodi kuzê ki N mostradu, i N splika kes irmon kes notísia sábi ki N sta ta prega pa kes algen di nason. La N inkontra sô ku kes ómi ki éra txeu ruspetadu, pa N pode ten serteza ma N ka staba ta kóre ô ma N ka kóre atoa.
3 Má nen Titu ki staba djuntu ku mi ka obrigadu faze sirkunsizon, enbóra el éra gregu.
4 Má kel prubléma li parse pamodi kes irmon falsu entra kétu na kongregason sima spion, pa prujudika kel liberdadi ki nu ten pamodi nos é disiplus di Kristu Jizus. Es krê obriga-nu ser skravu di lei otu bês.
5 Nu ka ta obi ku es nen un bokadinhu,* asi pa kel verdadi di notísias sábi kontinua ku nhos.
6 Má kes irmon ki ta parseba ma es éra algen txeu ruspetadu, na verdadi, es ka fla-m nada di novu. Ka ta inporta ki tipu di algen ki es éra, kel-la ka ta faze diferénsa pa mi, pamodi Deus ka ta julga pa kel ki ómi ta parse.
7 Má es odja ma N resebe trabadju di prega notísias sábi pa kes ki ka faze sirkunsizon, sima Pedru resebe kel trabadju di prega notísias sábi pa kes ki faze sirkunsizon.
8 Pamodi kel ki da Pedru puder pa el ser apóstlu pa kes ki faze sirkunsizon, tanbê da-m puder pa N ser apóstlu pa kes algen di nason.
9 I kantu es rekonhese kel grandi bondadi ki N dadu, Tiagu, Séfas* i Juan, kes ki éra sima pilar, longa mi ku Barnabé ses mô direita, pa mostra ma nos éra kunpanheru di trabadju, asi pa nu pode bai pa kes nason, má es, pa es bai pa kes ki faze sirkunsizon.
10 Es pidi-nu sô pa nu lenbra di kes póbri, i kel-li é un kuza ki tanbê N sta sforsa txeu pa N faze.
11 Má kantu Séfas* txiga na Antiokia, N infrenta-l kara-kara, pamodi fika klaru ma el staba eradu.*
12 Pamodi antis di txiga alguns ómi ki Tiagu manda, el ta kustuma kumeba ku pesoas di nason. Má kantu es txiga, el para di faze kel-li i el sipara di es ku medu di kes ki ta apoia sirkunsizon.
13 I kes otu judeu tanbê djunta ku el na kel finjimentu li, i ti mésmu Barnabé bai ses tras na ses finjimentu.
14 Má kantu N odja ma es ka staba ta anda di akordu ku verdadi di kes notísia sábi, N fla Séfas* dianti di es tudu: “Si abo, enbóra bo é judeu, bu ta vive sima pesoas di nason envês di sima judeus, modi ki bu pode poi pesoas di nason ta vive di akordu ku kustumus di judeus?”
15 Nos ki nase judeu, diferenti di pekadoris di nasons,
16 nu ta rekonhese ma un ómi ka ta txomadu justu pamodi el faze kuzas ki lei ta fla, má sô através di fé na Jizus Kristu. Pur isu, nu poi nos fé na Kristu Jizus, asi pa nu pode txomadu di justu através di fé na Kristu, envês di faze kuzas ki lei ta fla, pamodi Deus ka ta txoma ningen* di justu sô pamodi el faze kuzas ki lei ta fla.
17 Má, si nos nu sta ta sforsa pa txomadu di justu através di Kristu i simé ta fladu ma nos é pekador, kel-li krê fla ma Kristu ta insentiva-nu pa nu peka? É klaru ki nau!
18 Si N volta pa kes kuza ki dja N dexaba pa tras,* N ta mostra ma N ka ta obi ku lei.
19 Pamodi através di lei, N móre pa lei, asi pa N vive pa Deus.
20 N sta pregadu na staka djuntu ku Kristu. É ka mi ki sta vive más, má é Kristu ki ta vive unidu ku mi. Na verdadi, kel vida ki gósi N sta vive na karni, N ta vive-l pamodi fé na Fidju di Deus, ki ama-m i ki da se vida pa mi.
21 N ka ta nega* kel grandi bondadi di Deus, pamodi si justisa ta ben através di lei, nton Kristu móre atoa.
Nótas di rodapé
^ Na gregu ta fla: “un óra”.
^ Ki tanbê ta txomadu Pedru.
^ Ki tanbê ta txomadu Pedru.
^ Ô: “el bira kondenadu”.
^ Ki tanbê ta txomadu Pedru.
^ Na gregu ta fla: “ninhun karni”.
^ Na gregu ta fla: “torna konstrui kes kuza ki dja N ronbaba”.
^ Ô: “N ka ta poi di ladu”.
