Gálatas 4:1-31
4 Má, N ta fla nhos ma timenti erderu é un mininu, el é ka diferenti di un skravu, enbóra el é sinhor di tudu kuza,
2 pamodi la ten pesoas ki ta kuida di el i di se kaza ti kel dia ki se pai dja tene markadu.
3 Di mésmu manera, kantu nos éra mininu, tanbê nos éra skravu di ideias di mundu.
4 Má kantu txiga ténpu, Deus manda se Fidju, ki nase di un mudjer i el nase dibaxu di lei,
5 pa el pode kunpra i liberta kes ki staba dibaxu di lei, i asi pa nu pode ser adotadu sima fidju.
6 Dja ki nhos é fidju, Deus manda spritu di se Fidju na nos korason, i spritu ta grita: “Aba,* Pai!”
7 Nton abo é ka skravu más, má fidju. I si abo é fidju, nton Deus pô-u ta bira erderu tanbê.
8 Má kantu nhos ka konxeba Deus, nhos éra skravu di kes ki na verdadi é ka deus.
9 Má gósi ki nhos konxe Deus, ô midjór, ki Deus konxe nhos, modi ki nhos ta volta otu bês pa kes ideia di mundu ki é fraku i sen valor, i nhos krê bira ses skravu otu bês?
10 Nhos ta atxa ma ten dia, mês, ténpu i anu ki é spesial i nhos ta komemora-s.
11 N tene medu, ma di algun manera sforsu ki N faze pa djuda nhos foi atoa.
12 Irmons, N ta inplora nhos pa nhos bira sima mi, pamodi mi tanbê ami éra sima nhos. Nhos ka trata-m mariadu.
13 Má nhos sabe ma foi pamodi un duénsa ki N tevi nha primeru oportunidadi pa pâpia ku nhos sobri kes notísia sábi.
14 I enbóra nha duénsa foi un provason pa nhos, nhos ka trata-m ku disprézu i nen nhos ka xinti noju di mi,* má nhos resebe-m sima un anju di Deus, sima Kristu Jizus.
15 Undi ki sta kel alegria ki nhos tinha? Pamodi N ten serteza ma, si ta daba, ti nhos ta rinkaba nhos odju i nhos ta daba mi es.
16 Nton, N bira nhos inimigu pamodi N ta fla nhos verdadi?
17 Es tene gana di ganha nhos, má es ka ten bon intenson. Es krê afasta nhos di mi, asi pa nhos fika ku vontadi di sigi-s.
18 Má, é sénpri bon pa algen tenta ganha nhos ku bon intenson i é ka sô óras ki N sta la ku nhos,
19 nhas fidju ki N krê txeu. Más un bês N sta xinti dór pamodi nhos, sima dór di ten fidju, ti ki Kristu formadu* na nhos.
20 N ta gostaba di sta la ku nhos i pâpia ku nhos di otu manera, pamodi N ka sta intende kuzê ki sta kontise ku nhos.
21 Nhos fla-m, anhos ki krê sta dibaxu di lei, nhos ka ta obi ku Lei?
22 Pur izénplu, sta skrebedu ma Abraon tevi dôs fidju, un ku kel sérva i kel otu ku kel mudjer livri.
23 Má fidju di kel sérva nase sima kalker otu algen,* i kel otu, fidju di kel livri, através di un promésa.
24 Kes kuza li ten un otu siginifikadu. Pamodi kes mudjer li ta reprizenta dôs kontratu, un di monti Sinai, ki ta ten fidju pa bira skravu i ki é Agar.
25 Agar ta reprizenta Sinai, un monti na Arábia, i el ta reprizenta Jiruzalen di oji, pamodi el é skravu djuntu ku se fidju.
26 Má Jiruzalen di riba é livri, i el é nos mai.
27 Pamodi sta skrebedu: “Fika kontenti, ó mudjer, pamodi bu ka ten fidju. Grita di alegria, mésmu ki nunka bu ka xinti dór di ten fidju, pamodi fidjus di kel mudjer bandonadu é mutu más txeu di ki kel ki ten maridu.”
28 Má nhos, irmons, nhos é fidju di promésa sima Izaki.
29 Má sima na kel ténpu, kel ki nase sima kalker otu algen* kumesa ta pirsigi kel ki nase através di spritu, gósi tanbê sta ta kontise mésmu kuza.
30 Má, kuzê ki Skrituras ta fla? “Kóre ku kel sérva i ku se fidju, pamodi fidju di kel sérva ka ta ser, di ninhun manera, erderu djuntu ku fidju di kel mudjer livri.”
31 Pur isu irmons, nos é ka fidju di un sérva, má di kel mudjer livri.
Nótas di rodapé
^ Un palavra ebraiku ô aramaiku ki siginifika “ó Pai!” Má el sta txeu ligadu ku palavra na kabuverdianu “papá”.
^ Ô: “nhos ka kuspi-m”.
^ Ô: “toma fórma”.
^ Na gregu ta fla: “nase di akordu ku karni”.
^ Na gregu ta fla: “nase di akordu ku karni”.
