Jénezis 24:1-67
24 Abraon dja staba ku txeu idadi, i Jeová abensua-l na tudu kuza.
2 Abraon fla se sérvu, kel más bédju di se kaza ki ta tomaba kónta di tudu kuza ki el tinha: “Favor, poi bu mô baxu di nha koxa
3 i N sta ben pô-u ta jura pa Jeová, kel Deus di séu i kel Deus di téra, ma bu ka ta ranja pa nha fidju un mudjer na meiu di kes fidju-fémia di kes kananeu, ki N sta moradu na ses meiu.
4 Má, bu debe bai na nha téra i la na meiu di nhas família bu ta skodje un mudjer pa Izaki, nha fidju.”
5 Má, kel sérvu pergunta-l: “I si kel mudjer ka krê ben ku mi pa kel téra li? N debe leba bu fidju pa kel téra di undi nho ben?”
6 Abraon responde-l: “Ka bu leba nha fidju pa la.
7 Jeová, kel Deus di séu, ki tra-m di kaza di nha pai i di téra di nhas família, i ki pâpia ku mi ta jura-m: ‘N ta da kel téra li pa bu disendenti’,* ta manda se anju na bu frenti, i di serteza la bu ta toma un mudjer pa nha fidju.
8 Má si kel mudjer ka krê ben ku bo, nton bu ta fika livri di kel juramentu li. Má ka bu leba nha fidju pa la.”
9 Nton, kel sérvu poi mô baxu di koxa di Abraon, se sinhor, i el jura ma el ta fazeba tudu kel ki Abraon fla.
10 Nton kel sérvu toma 10 kamelu di se sinhor i el bai. El leba ku el tudu tipu di prezentis di se sinhor. El viaja pa Mezopotámia, pa sidadi di Naor.
11 Kantu el txiga, el poi kes kamelu ku juelhu na txon na bera di un posu di agu ki ta fikaba fóra di sidadi. Staba kuazi ta fika noti, i éra kel óra la ki kes mudjer ta ba panhaba agu.
12 Nton el fla: “Jeová, Deus di nha sinhor Abraon, favor djuda-m pa N ten bon rezultadu oji i mostra bu amor lial pa nha sinhor Abraon.
13 N sta li di pé bera di un fonti di agu, i kes fidju-fémia di kes ómi di sidadi sta ta ben tra agu.
14 N ta pidi-u pa kel minina ki N fla: ‘Favor, inbaxa bu jaru di agu pa N pode bebe’, i ki responde: ‘Nho bebe, i tanbê N ta tra agu pa kamelus di nho’, pa ser kel ki bu skodje pa bu sérvu Izaki. Asi bu ta dexa-m sabe ma bu mostra bu amor lial pa nha sinhor.”
15 Antis di el kaba di pâpia, Rebeka ben ku se jaru riba di onbru. Rebeka éra fidju-fémia di Betuel, ki éra fidju di Milka. Milka éra mudjer di Naor, ki éra irmon di Abraon.
16 Rebeka éra un minina txeu bunita i el éra vírjen. Nunka ninhun ómi ka tevi relason seksual ku el. El dixi ti fonti, el intxi se jaru i dipôs el torna subi.
17 Kel sérvu kóre faxi pa inkontra ku el i el fla-l: “Favor, da-m un bokadinhu di agu ki bu tene na bu jaru.”
18 El responde: “Bebe, nha sinhor.” Nton el tra jaru di onbru faxi, el pega-l na mô i el dexa-l bebe.
19 Dipôs ki el da-l agu, el fla: “N ta tra agu tanbê pa kamelus di nho ti ki es fika sen sedi.”
20 Nton, el dispija se jaru faxi na bebedoru i el kóre txeu bês ti posu pa tra agu, i el kontinua ta tra agu pa tudu kes kamelu.
21 Duránti tudu kel ténpu, kel ómi fika kaladu ta djobe-l dimiradu, ta spera pa odja si Jeová abensuaba se viajen ô nau.
22 Kantu kes kamelu kaba di bebe, kel ómi da-l un argóla di oru pa narís ki ta pezaba kuazi 6 grama* i dôs pulsera di oru ki ta pezaba 114 grama,*
23 i el fla: “Favor fla-m li, abo é fidju di kenha? Ten lugar na kaza di bu pai pa nu pasa noti?”
24 Nton el fla-l: “Ami é fidju di Betuel, kel fidju ki Milka tevi ku Naor.”
25 Tanbê el fla: “Nu tene padja i txeu kumida pa animal i tanbê un lugar pa nhos pasa noti.”
26 Nton kel ómi inbaxa dianti di Jeová
27 i el fla: “Pa Jeová, kel Deus di nha sinhor Abraon lovadu, pamodi el ka bandona se amor lial i el mante se promésa pa nha sinhor. Jeová gia-m pa kaza di irmons di nha sinhor.”
28 I kel minina bai ta kóre pa ba konta kes kuza li pa kes algen di kaza di se mai.
29 Rebeka tinha un irmon ki txomaba Labon. Nton, Labon kóre pa bai djobe kel ómi ki staba djuntu di kel fonti.
30 Kantu el odja kel argóla pa narís i kes pulsera na mô di se irman i el obi Rebeka ta fla: “É si ki kel ómi fla”, Labon bai inkontra ku kel ómi, ki inda staba na ladu di kes kamelu djuntu di fonti.
31 Labon fla: “Ben, bo ki ten benson di Jeová. Pamodi ki bu sta paradu li fóra? Dja N pripara kaza i un lugar pa kes kamelu.”
32 Nton kel ómi entra na kaza, i el* tra kes séla di kes kamelu i el da-s padja i kumida. Tanbê el leba agu pa kel ómi i pa kes ki staba ku el laba ses pé.
33 Má kantu es da-l algun kuza pa el kume, el fla: “N ka ta kume timenti N ka fla kel ki N tene pa N fla nhos.” Pur isu Labon fla-l: “Pâpia!”
34 Nton el fla: “Ami é sérvu di Abraon.
35 Jeová abênsua nha sinhor txeu. El da-l txeu rikéza. El da-l ovelha i vaka, prata i oru, sérvus i sérvas, kamelu i buru.
36 Tanbê, kantu Sara, mudjer di nha sinhor, staba algen grandi, el da-l un fidju. I nha sinhor ta ben da se fidju tudu kel ki el ten.
37 Nton nha sinhor pô-m ta jura: ‘Ka bu skodje na es téra ki N sta ta mora un di kes fidju-fémia di kes kananeu pa ser mudjer di nha fidju.
38 Má, bai pa kaza di nha pai i di nha família, i la bu debe skodje un mudjer pa nha fidju.’
39 Má N pergunta nha sinhor: ‘I si kel mudjer ka krê ben ku mi?’
40 El fla-m: ‘Jeová, ki é kel ki N ta sirbi, ta manda se anju ku bo i di serteza el ta djuda-u ten bon rezultadu na bu viajen. Skodje pa nha fidju un mudjer di nha família i di kaza di nha pai.
41 Bu ta fika livri di kel juramentu ki bu faze-m si bu bai na nha família i es ka da-u el. Asi bu ta fika livri di bu juramentu.’
42 “Oji, kantu N txiga na fonti, N fla: ‘Jeová, kel Deus di nha sinhor Abraon, si é di vontadi di nho pa nha viajen ten bon rezultadu,
43 poi pa kel-li kontise. N sta li di pé djuntu di fonti. Óras ki un minina ben tra agu, N ta fla-l: “Favor, dexa-m bebe un bokadinhu di agu di bu jaru.”
44 I si el responde-m: “Bebe, i tanbê N ta tra agu pa bus kamelu”, pa kel mudjer li ser kel ki Jeová skodje pa fidju di nha sinhor.’
45 “Antis di N tirmina di pâpia déntu mi, Rebeka staba ta ben ku se jaru riba di onbru. El dixi ti fonti i el kumesa ta tra agu. Nton N fla-l: ‘Favor, da-m un bokadinhu di agu.’
46 I kel óra el tra se jaru di onbru i el fla: ‘Bebe i tanbê N ta da bus kamelu agu.’ Nton N bebe i tanbê el da kes kamelu agu.
47 Dipôs N pergunta-l: ‘Abo é fidju di kenha?’ El responde-m: ‘Ami é fidju di Betuel, kel fidju ki Milka tevi ku Naor.’ Nton, N pô-l argóla na se narís i pulsera na se mô.
48 I N inbaxa dianti di Jeová i N lova Jeová, kel Deus di Abraon nha sinhor, ki gia-m na kaminhu ki N debe baba, asi pa N toma fidju-fémia di irmon di nha sinhor pa se fidju.
49 Gósi nhos fla-m si nhos krê mostra amor lial i kunpri kel ki nha sinhor pidi,* sinon nhos fla-m tanbê pa N pode sabe ki kaminhu N ta toma.”*
50 Nton Labon i Betuel responde: “Kel-li ta ben di Jeová. Nu ka pode fla-u nen sin nen nau.*
51 Ali Rebeka li. Toma-l i nhos bai, i pa el bira mudjer di fidju di bu sinhor, sima Jeová fla.”
52 Kantu sérvu di Abraon obi kuzê ki es fla, el inbaxa kel óra dianti di Jeová.
53 I kel sérvu kumesa ta tra kuzas di prata i di oru i ropa i el da-s pa Rebeka. Tanbê, el da kuzas di valor pa se irmon i pa se mai.
54 Dipôs di kel-li, el ku kes ómi ki staba ku el kume i es bebe, i es pasa noti la.
Kantu el labanta di palmanhan, el fla: “Nhos dexa-m bai pa nha sinhor.”
55 Se irmon i se mai fla-l: “Dexa Rebeka fika ku nos peloménus 10 dia. Dipôs el pode bai.”
56 Má el fla-s: “Ka nhos pô-m ta spera, pamodi Jeová poi nha viajen ten bon rezultadu. Nhos dexa-m bai, pa N pode volta pa nha sinhor.”
57 Nton es fla: “Nu txoma Rebeka i nu pergunta-l.”
58 Es txoma Rebeka i es pergunta-l: “Bu ta bai ku kel ómi li?” El responde: “N ta bai sin.”
59 Nton, es dexa ses irman Rebeka i kel mudjer ki daba el mama* bai djuntu ku kel sérvu di Abraon i kes ómi ki staba ku el.
60 I es abênsua Rebeka i es fla-l: “Nos irman, pa bu bira milhon,* i pa bus disendenti toma sidadi* di kes algen ki ta odia-s.”
61 Nton Rebeka i se sérvas pripara, es monta na kamelu i es bai ku kel ómi. Nton kel sérvu bai i el leba Rebeka djuntu ku el.
62 Izaki staba ta ben na direson di Bier-Lai-Roi, pamodi el staba ta mora na téra di Negebe.
63 El staba ta pâsia na kanpu pa midita kantu staba kuazi ta fika noti. Kantu el djobe, el odja kes kamelu ta txiga!
64 Kantu Rebeka djobe, el odja Izaki i el dixi faxi di kamelu.
65 Nton, el pergunta kel sérvu: “Ken ki é kel ómi la ki sta anda na kanpu pa ben inkontra ku nos?” Kel sérvu responde: “É nha sinhor.” Nton, el panha se véu pa el kubri ku el.
66 I kel sérvu fla Izaki tudu kuza ki el fazeba.
67 Dipôs di kel-li, Izaki leba-l pa ténda di Sara, se mai. El toma Rebeka pa ser se mudjer. Izaki fika paxonadu pa Rebeka i el atxa konsolu dipôs ki el perde se mai.
Nótas di rodapé
^ Na ebraiku ta fla: “simenti”.
^ Talvês krê fla Labon.
^ Na ebraiku ta fla: “i lialdadi pa nha sinhor”.
^ Na ebraiku ta fla: “pa N vira pa mô direita ô pa skerda”.
^ Ô: “nen dretu nen mariadu”.
^ Kel-li krê fla kel mudjer ki daba el mama ki gósi éra se sérva.
^ Ô: “pa bu bira mai di milharis di miríadis”.
^ Ô: “kes sidadi”.
