Jénezis 29:1-35
29 Dipôs, Jakó kontinua se viajen i el bai pa téra di kes algen di orienti.*
2 Nton, el odja un posu na kanpu i três ribanhu di ovelha detadu djuntu di el, pamodi es ta kustuma daba kes ovelha agu di kel posu. Riba bóka di kel posu tinha un pédra grandi.
3 Óras ki tudu kes ribanhu ta djuntaba la, kes pastor ta rolaba kel pédra di bóka di kel posu i es ta daba kes ribanhu agu, i dipôs es ta torna poba kel pédra riba di kel posu.
4 Jakó pergunta-s: “Nhas irmon, anhos é di undi?” Es responde-l: “Nos é di Aran.”
5 El pergunta-s: “Nhos konxe Labon, nétu di Naor?” Es responde-l: “Nu konxe-l.”
6 Nton el pergunta-s: “El sta dretu?” Es responde-l: “El sta dretu. Ale se fidju-fémia, Rakel, ta ben ku ovelha!”
7 Jakó fla: “Inda sta meiu-dia. Ka txiga óra di djunta kes ribanhu. Nhos da kes ovelha agu i dipôs nhos leba-s pa ba kume.”
8 Nton es fla-l: “Nu ka pode faze kel-li. Nu ten ki spera ti ki tudu ribanhu djuntadu i kel pédra tradu riba di kel posu. Sô dipôs é ki nu pode da kes ovelha agu.”
9 Timenti el staba ta pâpia ku es, Rakel txiga ku kes ovelha di se pai, pamodi el éra pastora.
10 Kantu Jakó odja Rakel, fidju-fémia di Labon, ki éra irmon di se mai, i kes ovelha di Labon, Jakó bai faxi, el rola kel pédra ki staba riba di kel posu i el da kes ovelha di Labon, irmon di se mai, agu.
11 Dipôs, Jakó kunprimenta Rakel ku un beju i el kumesa ta txora riju.
12 Jakó konta Rakel ma el éra família* di se pai i ma el éra fidju di Rebeka. I Rakel kóre pa ba konta se pai.
13 Lógu ki Labon obi ma Jakó, fidju di se irman staba la, el kóre pa ba atxa-l. El brasa-l, el kunprimenta-l ku un beju i el leba-l pa se kaza. I Jakó konta Labon tudu kuza ki kontise ku el.
14 Labon fla-l: “Abo é sangi di nha sangi própi.”* Nton Jakó fika ku el un mês interu.
15 Nton Labon fla Jakó: “Sô pamodi bo é nha família,* bu ta trabadja pa mi di grasa? Fla-m, kantu ki é pa N paga-u?”
16 Labon tinha dôs fidju-fémia. Nómi di kel más grandi éra Lia i nómi di kel más nova éra Rakel.
17 Odju di Lia ka tinha brilhu, má Rakel bira un mudjer txeu bunita.
18 Jakó staba paxonadu pa Rakel, nton el fla Labon: “N ta trabadja 7 anu pa nho pa N fika ku Rakel, fidju-fémia más pikinoti di nho.”
19 Nton Labon fla-l: “É midjór N da-u el di ki N da-l pa otu ómi. Kontinua ta mora ku mi.”
20 I Jakó trabadja 7 anu pa Rakel, má pa el ta parseba sima si éra sô alguns dia pamodi amor ki el tinha pa el.
21 Nton, Jakó fla Labon: “Nha ténpu dja kaba, pur isu da-m nha mudjer pa N pode ten relason ku el.”
22 Nton, Labon djunta tudu kes ómi di kel lugar i el faze un fésta.
23 Má di noti, el rezolve leba Lia, se fidju-fémia, pa Jakó ten relason ku el.
24 Tanbê, Labon da se sérva Zilpa pa ser sérva di Lia, se fidju-fémia.
25 Di palmanhan Jakó odja ma éra Lia! Pur isu el fla Labon: “Kuzê ki nho faze-m? É ka pa Rakel ki N trabadja pa nho? Pamodi ki nho ingana-m?”
26 Labon responde: “Li nu ka ten kustumu di da kel fidju-fémia más pikinoti antis di kel primeru fidju.
27 Tirmina di komemora simana di kel mudjer li. Dipôs, N ta da-u tanbê kel otu mudjer si bu trabadja más 7 anu pa mi.”
28 Jakó faze si i el komemora simana di kel mudjer, i dipôs Labon da-l Rakel, se fidju-fémia, pa ser se mudjer.
29 Tanbê, Labon da se sérva Bila pa ser sérva di se fidju-fémia Rakel.
30 Nton Jakó tevi relason ku Rakel tanbê. El ta amaba Rakel más di ki Lia, i el trabadja más 7 anu pa Labon.
31 Nton, kantu Jeová odja ma Jakó ka ta amaba Lia,* el poi Lia ta fika grávida, má Rakel ka ta pode tinha fidju.
32 Nton Lia fika grávida i el tevi un fidju i el txoma-l di Ruben,* pamodi el fla: “É pamodi Jeová odja pa nha frónta, gósi nha maridu ta kumesa ta ama-m.”
33 El torna fika grávida i el tevi un fidju, i el fla: “É pamodi Jeová obi-m, dja ki nha maridu ka ta ama-m, pur isu el da-m kel-li tanbê.” Nton el txoma-l di Simion.*
34 El fika grávida otu bês i el tevi otu fidju i el fla: “Gósi nha maridu ta djunta ku mi pamodi N da-l três fidju.” Nton, el txomadu di Levi.*
35 I el fika grávida más un bês i el tevi un fidju i el fla: “Di es bês N ta lova Jeová.” Pur isu el txoma-l di Judá.* Dipôs di kel-la el para di ten fidju.
Nótas di rodapé
^ Kel-li krê fla un téra ki ta fikaba na lésti di Kanan.
^ Na ebraiku ta fla: “irmon”.
^ Ô: “Abo é nha família di sangi própi”. Na ebraiku ta fla: “Abo é nha osu i nha karni própi”.
^ Na ebraiku ta fla: “irmon”.
^ Na ebraiku ta fla: “Jakó ta odiaba Lia”.
^ Ki krê fla “odja, un fidju!”
^ Ki krê fla “obi”.
^ Ki krê fla “djuntadu; unidu”.
^ Ki krê fla “lova”.
