Jénezis 47:1-31
47 Nton, Juzé bai i el fla Faraó: “Nha pai, nhas irmon, ses ribanhu, ses vaka i tudu kel ki es ten ben di téra di Kanan, i es sta na téra di Gózen.”
2 El skodje sinku di se irmons i el aprizenta-s na Faraó.
3 Faraó pergunta se irmons: “Kal ki é nhos trabadju?” Es responde Faraó: “Sérvus di nho é pastor di ovelha, sima nos gentis grandi.”
4 Nton, es fla Faraó: “Nu ben mora na es país sima stranjeru pamodi ka sta kumida pa kes ovelha di sérvu di nho na téra di Kanan, dja ki fómi sta dimás. Nton favor, dexa sérvus di nho mora na téra di Gózen.”
5 Nton Faraó fla Juzé: “Bu pai i bus irmon ben fika ku bo li.
6 Téra di Ijitu sta na nhos mô. Poi bu pai i bus irmon ta mora na kel midjór párti di país. Pa es mora na téra di Gózen, i si bu konxe ómis ki ta trabadja dretu na ses meiu, pô-s ta toma kónta di nhas ribanhu.”
7 Nton Juzé leba Jakó i el aprizenta-l pa Faraó, i Jakó abênsua Faraó.
8 Faraó pergunta Jakó: “Kantu anu ki bu ten?”
9 Jakó responde Faraó: “N ten 130 anu i N pasa nha vida interu ta bai di un lugar pa kel otu.* Kes anu foi difísil, má es é poku konparadu ku kes anu ki nhas gentis grandi pasa ta bai di un lugar pa kel otu.”*
10 Dipôs di kel-li, Jakó abênsua Faraó i el sai di dianti di el.
11 Nton Juzé poi se pai i se irmons na téra di Ijitu, i el da-s kel midjór párti di téra, na téra di Ramesés, sima Faraó dja mandaba.
12 I Juzé ta daba se pai, se irmons i tudu kes algen di kaza di se pai kumida,* di akordu ku fidju ki es tinha.
13 Ka tinha kumida* na Ijitu i na Kanan, pamodi fómi éra duru dimás, i kes algen di Ijitu i di Kanan staba ta sufri pamodi kel fómi.
14 Juzé djunta tudu dinheru ki pesoas di Ijitu i di Kanan staba ta da pa kunpra serial, i Juzé ta lebaba kel dinheru pa kaza di Faraó.
15 Ku ténpu, dinheru na Ijitu i na Kanan kaba, i tudu kes algen di Ijitu kumesa ta bai na Juzé i ta fla-l: “Da-nu kumida! Nho ta dexa-nu móre sô pamodi nos dinheru dja kaba?”
16 Nton Juzé fla: “Si nhos dinheru dja kaba, nhos traze nhos ribanhu, i N ta da nhos kumida na lugar di kes ribanhu.”
17 Nton es kumesa ta leba Juzé ses animal. Juzé ta daba es kumida i es ta daba Juzé kabalu, ovelha, vaka i buru. I duránti kel anu, Juzé da-s kumida i es da Juzé ses animal.
18 Nton kel anu tirmina. Na kel otu anu es kumesa ta bai na el i es fla: “Nu ka ta sukundi ma dja nu da nho tudu nos dinheru i nos animal. Nu ka tene más nada pa oferese nho, fóra nos korpu i nos txon.
19 Nho ta dexa-nu nos ku nos txon pa nu móre dianti di nho? Kunpra-nu nos ku nos txon i da-nu kumida. Nu ta ser skravu di Faraó i nos txon ta ser di sel. Da-nu simenti pa nu fika bibu i pa nu ka móre i pa nos txon ka fika sen ningen.”
20 Nton, Juzé kunpra tudu txon di gentis di Ijitu pa Faraó pamodi tudu gentis di Ijitu bende ses txon, dja ki fómi éra duru dimás. I tudu kes txon bira di Faraó.
21 Nton, Juzé da órdi pa tudu kes algen ki ta viveba na Ijitu pa muda pa kes sidadi.
22 Éra sô kes txon di kes saserdóti ki el ka kunpra, dja ki Faraó ta daba es kumida i es ta viveba di kes kumida ki el ta daba es. É pur isu ki es ka bende ses txon.
23 Nton Juzé fla kes algen: “Nhos odja, oji N kunpra anhos ku nhos txon pa Faraó. N sta da nhos simenti, i nhos ten ki símia txon ku es.
24 Óras ki txon da kumida, nhos da Faraó un kintu di kel kumida, má kes otu kuatu párti é di nhos pa nhos símia txon i nhos kume anhos ku nhos fidju i gentis di nhos kaza.”
25 Nton es fla: “Nho salva nos vida. Si nho seta nu ta bira skravu di Faraó.”
26 Nton Juzé faze un lei, ki ta sirbi ti dia di oji na tudu téra di Ijitu: un kintu párti di kodjéta é di Faraó. É sô kel txon di kes saserdóti ki ka bira di Faraó.
27 Israel kontinua ta mora na téra di Ijitu, na téra di Gózen, i es fika la. Es tevi fidju i es bira txeu.
28 Jakó vive 17 anu na téra di Ijitu. Pa tudu, el vive 147 anu.
29 Kantu Israel xinti ma el staba kuazi ta móre, el txoma Juzé, se fidju, i el fla-l: “Si bu ta da-m ónra, favor, poi bu mô baxu di nha koxa i promete-m ma bu ta mostra-m amor lial i ma bu ta ser fiel. Favor ka bu intera-m na Ijitu.
30 Óras ki N móre,* leba-m pa fóra di Ijitu i intera-m na sipultura di nhas gentis grandi.” Pur isu, Juzé fla: “N ta faze sima nho pidi-m.”
31 El fla: “Jura-m.” Nton el jura. Dipôs, Israel inbaxa djuntu di kabisera di se kama.
Nótas di rodapé
^ Ô: “ta vive sima stranjeru”.
^ Ô: “ta vive sima stranjeru”.
^ Na ebraiku ta fla: “pon”.
^ Na ebraiku ta fla: “pon”.
^ Na ebraiku ta fla: “ki N deta ku nhas gentis grandi”.
