Atus 25:1-27
25 Nton, três dia dipôs ki Festu txiga na pruvínsia di judea, el toma kargu, el subi di Sezarea ti Jiruzalen.
2 I kes xéfi di saserdótis i kes ómi inportanti di judeus faze kexa kóntra Paulu. Nton es kumesa ta pidi Festu
3 pa el faze-s favor* di manda traze Paulu pa Jiruzalen. Má es staba ta faze planu pa mata Paulu na kaminhu.
4 Má, Festu fla-s ma Paulu debe fikaba prézu na Sezarea i ka ta dura ma el própi el ta voltaba pa la.
5 El fla: “Pa alguns di nhos xéfi dixi djuntu ku mi, i si es ómi faze algun kuza mariadu, es ta aprizenta ses kexa kóntra el.”
6 Nton, kantu el pasa uns 8 ô 10 dia djuntu ku es, el dixi pa Sezarea, i na kel otu dia el xinta na tribunal i el manda pa es traze Paulu.
7 Kantu Paulu entra, kes judeu ki dixiba di Jiruzalen fika na se vólta i ta akuza-l di txeu krimi gravi ki es ka ta pode provaba.
8 Má pa difende se kabésa, Paulu fla: “N ka faze ninhun pekadu kóntra Lei di judeus, nen kóntra ténplu, nen kóntra Séza.”
9 Má dja ki Festu krê agradaba kes judeu, el fla Paulu: “Bu krê subi pa Jiruzalen i ba julgadu la sobri kes kuza li nha dianti?”
10 Má Paulu fla: “N sta dianti di tribunal di Séza, undi ki N debe julgadu. I sima nhos sabe dretu, N ka faze nada mariadu kóntra kes judeu.
11 Má si na verdadi ami é un kriminozu i N faze algun kuza mariadu ki N merese móre, N ka ta nega móre. Má si kes kuza ki kes ómi li sta ta fla kóntra mi é ka verdadi, ningen ka ten direitu di intrega-m na es pa faze-s un favor. N ta pidi bai pa Séza!”
12 Nton, dipôs ki Festu pâpia ku kes algen ki ta daba el konsedju, el fla: “Dja ki bu sta pidi pa Séza julga-u, nton bu ta bai pa Séza.”
13 Alguns dia dipôs, rei Agripa ku Berenisi txiga na Sezarea pa vizita Festu.
14 Dja ki es staba ta pasa txeu dia la, Festu konta rei kazu di Paulu, i el fla-l:
“Ten un ómi ki Félis dexa prézu,
15 i kantu N staba na Jiruzalen, kes xéfi di saserdótis i kes ansion di judeus, akuza-l i es pidi-m pa N kondena-l.
16 Má N fla-s ma lei romanu ka ta dexa pa un algen kondenadu sen primeru el difende se kabésa dianti di kes algen ki akuza-l.
17 Nton, kantu N txiga li, N ka perde ténpu, má na kel otu dia N xinta na tribunal i N manda pa es traze-m kel ómi.
18 Kantu kes algen ki staba ta akuza-l labanta pa pâpia, es ka akuza-l di ninhun kuza mariadu ki N staba ta spera.
19 Má éra kuzas di ses própi relijion* ki es tinha kóntra el i sobri un tal ómi ki txomaba Jizus, ki móre, má ki Paulu staba ta insisti ma el staba bibu.
20 I sen N sabe modi ki N ta rezolveba kel prubléma li, N pergunta-l si el ta gostaba di bai Jiruzalen pa el julgadu sobri kes kuza li.
21 Má kantu Paulu pidi pa el kontinua prézu timenti el ta spera disizon di Augustu,* N da órdi pa el kontinua prézu ti ki N manda-l pa Séza.”
22 Nton, Agripa fla Festu: “Ami tanbê N ta gostaba di obi es ómi.” El fla: “Manhan nho ta obi-l.”
23 Nton, na kel otu dia Agripa i Berenisi txiga ku txeu grandéza i es entra na sala di audiénsia djuntu ku kes komandanti di trópa i kes ómi inportanti di sidadi. I kantu Festu da órdi, es traze Paulu.
24 I Festu fla: “Rei Agripa i tudu nhos ki sta li, nhos odja es ómi. É el ki tudu judeu na Jiruzalen i kes algen ki sta li, pidi-m ta grita ma el ka debe kontinua ta vive.
25 Má N da kónta ma el ka faze nada ki el merese móre. Nton, kantu el pidi bai pa Augustu, N disidi manda-l.
26 Má N ka sabe kuzê ki N pode skrebe pa inperador* sobri el. Nton N traze-l nhos dianti, i prinsipalmenti dianti di nho, rei Agripa, asi pa dipôs ki nho faze-l pergunta, pa N ten algun kuza pa N skrebe.
27 Pamodi ka parse-m dretu manda un prézu sen fla tanbê sobri kuzê ki el akuzadu.”
Nótas di rodapé
^ Na gregu ta fla: “ta pidi-l favor kóntra el”.
^ Ô: “ses própi adorason pa kes deus”.
^ Titlu di inperador romanu.
^ Na gregu ta fla: “pa Sinhor”.
