Ebreus 11:1-40
11 Fé é kel kunfiansa sértu ma kel ki nu sta ta spera ta ben kontise. El é kel próva klaru* ma kel ki nu ka ta odja ta izisti mê.
2 Através di el, kes ómi di ténpu antigu* resebe tistimunhu.*
3 Pamodi fé, nu ta intende ma palavra di Deus poi tudu kuza ta izisti* na órdi, pur isu kel ki nu ta odja pasa ta izisti di kes kuza ki nu ka ta odja.
4 Pamodi fé, Abel oferese Deus un sakrifisiu ki ten más valor ki kel di Kain. Através di es fé, el resebe tistimunhu ma el éra justu, pamodi Deus staba kontenti ku* se oférta. I enbóra el móre, inda el sta pâpia através di se fé.
5 Pamodi fé, Enoki transfiridu pa el ka odjaba mórti, i el ka atxadu na ninhun lugar pamodi Deus dja transfiriba el.* Pamodi antis di el transfiridu, el resebe tistimunhu ma el agradaba Deus.
6 Alén di kel-li, sen fé nu ka ta pode agrada Deus, pamodi ken ki ta txiga na Deus ten ki kridita ma el ta izisti i ma el ta rekonpensa kes ki ta djobe-l asériu.
7 Pamodi fé, Nué, dipôs ki el resebe avizu di Deus di kuzas ki staba pa kontise má ki inda ka odjadu, el mostra grandi ruspetu pa Deus i el faze un arka pa salva se família. I através di es fé, el kondena mundu, i el bira erderu di justisa ki é rezultadu di fé.
8 Pamodi fé, Abraon obidese kantu el txomadu, i el bai pa un lugar ki el ta resebeba di eransa. El bai, enbóra el ka sabeba pa undi ki el staba ta bai.
9 Pamodi fé, el vive sima stranjeru na kel téra di promésa, sima si el staba na un téra stranjeru, ta mora na ténda djuntu ku Izaki i Jakó, ki éra erderu ku el di kel mésmu promésa.
10 Pamodi el staba ta spera kel sidadi ki ten alisérsi di verdadi, ki é Deus ki dizenha i ki faze.*
11 Tanbê, pamodi fé, Sara resebe puder pa el fika grávida di un disendenti,* mésmu kantu dja el pasaba di idadi, dja ki el ta atxaba ma Kel ki fazeba promésa é fiel.*
12 Pur isu, sô di un ómi ki dja staba sima ki mortu, nase txeu fidju. Es éra txeu dimás sima strélas di séu i ki ka ta da pa konta sima areia na bera-mar.
13 Tudu es móre ku fé, enbóra es ka resebe kes kuza ki es prometedu, má es odja-s di lonji, es seta-s ku alegria i es mostra pa tudu algen ma es éra stranjeru i ma es ta moraba na kel téra pa poku ténpu.
14 Pamodi kes ki ta pâpia asi, sta ta djobe ku inpenhu un lugar pa es.
15 Má, si es kontinuaba ta lenbra di kel lugar undi ki es saíba, es ta tinha xansi di voltaba pa la.
16 Má, es sta ta sforsa pa es konsigi un lugar midjór, kel-li krê fla, un lugar ki é di séu. Pur isu, Deus ka xinti vergónha di es, nen pa el txomadu di ses Deus, pamodi el pripara-s un sidadi.
17 Pamodi fé, kantu Abraon provadu, é sima ki el oferese Izaki. Sin, kel ómi ki resebe kes promésa ku alegria tenta oferese se úniku fidju,*
18 enbóra Deus dja flaba el: “Kel ki ta ben txomadu di bu disendenti* ta ben ser através di Izaki.”
19 Má el ta kriditaba ma Deus éra kapás di resusitaba Izaki,* i el resebe-l di mórti sima un izénplu.
20 Tanbê pamodi fé, Izaki abênsua Jakó i Izaú sobri kes kuza ki staba pa ben kontise.
21 Pamodi fé, kantu Jakó staba ta móre, el abênsua kada un di kes fidju di Juzé i el adora Deus timenti el staba ta aguenta na se pó.
22 Pamodi fé, kantu Juzé staba kuazi na fin di se vida, el fla ma fidjus di Israel ta sai di Ijitu, i el da-s instruson* sobri se osu.*
23 Pamodi fé, mai ku pai di Muizés sukundi-l pa três mês dipôs ki el nase, pamodi es odja ma kel mininu éra bunitu i es ka xinti medu di kel órdi di rei.
24 Pamodi fé, kantu Muizés bira grandi, el ka seta pa el txomadu fidju di fidju-fémia di Faraó.
25 El skodje ser maltratadu djuntu ku povu di Deus envês di goza pa poku ténpu kes sabura di pekadu,
26 pamodi el ta atxaba ma kel dizónra pamodi Kristu ten mutu más valor di ki kes tizoru di Ijitu, dja ki el tinha odju fíksu na pagamentu di rekonpénsa.
27 Pamodi fé, el sai di Ijitu, má sen xinti medu di raiba di rei, pamodi el kontinua firmi sima ki el staba ta odja Kel ki é invizível.
28 Pamodi fé, el komemora Páskua i el brufa sangi na kes aru di pórta, asi pa kel distruidor ka prujudikaba* ses primeru fidju.
29 Pamodi fé, povu trabesa mar Brumedju sima ki es staba ta anda na téra séku, má kantu kes algen di Ijitu tenta faze mésmu kuza, mar inguli-s.
30 Pamodi fé, kes muralha di Jerikó kai dipôs ki povu anda na ses vólta duránti 7 dia.
31 Pamodi fé, Raabi, kel prostituta, ka móre djuntu ku kes ki dizobidese, pamodi el resebe kes spion ku pas.
32 I kuzê más ki N ta fla? Ténpu ta faltaba mi si N papiaba sobri Jidion, Baraki, Sanson, Jefté, Davidi, tanbê Samuel i kes otu proféta.
33 Pamodi fé, es vense reinus, es faze justisa, es resebe promésa, es fitxa bóka di lion,
34 es paga forsa di lumi, es skapa di fiu di spada, es staba fraku má es bira fórti, es bira poderozu na géra i es vense trópa ki ba invadi ses téra.
35 Alguns mudjer resebe ses mortu na resureison, má otus ómi torturadu pamodi es ka seta fika livri através di un resgati, asi pa es pode resebe un resureison midjór.
36 Sin, otus podu na próva pamodi es fazedu trósa i es sotadu. Na verdadi, más di ki kel-li, es prendedu ku korenti i es podu na kadia.
37 Es dadu ku pédra ti ki es móre, es podu na próva, es seradu déntu meiu,* es matadu ku spada, es ta bistiba ku péli di ovelha i ku péli di kabra, es pasa nisisidadi, es sufri tribulason, es maltratadu,
38 i mundu ka mereseba es. Es ta viveba na dizértu, na montanha, na kavérna i na braku na txon.
39 Enbóra tudu es resebe tistimunhu di Deus pamodi ses fé, es ka resebe kes kuza ki prometedu,
40 dja ki Deus dja tinha na menti un kuza midjór pa nos, asi pa es ka sérba perfeitu sen nos.
Nótas di rodapé
^ Ô: “próva ki ta konvense”.
^ Ô: “nos gentis grandi”.
^ Ô: “resebe próva ma Deus staba kontenti ku es”.
^ Ô: “sistéma”. Djobe Disionáriu di Bíblia.
^ Ô: “Deus da tistimunhu ma el rekonhese”.
^ Kel-li krê fla manera ki Enoki móre. Pode ser ki Deus leba-l i dexa-l móre na pas, envês di dexa se inimigus mata-l.
^ Ô: “ki é Deus ki é arkitétu i konstrutor”.
^ Na gregu ta fla: “simenti”.
^ Ô: “di kunfiansa”.
^ Na gregu ta fla: “fidju unijénitu”.
^ Na gregu ta fla: “simenti”.
^ Na gregu ta fla: “labantaba el di mórti”.
^ Ô: “un órdi”.
^ Ô: “se intéru”.
^ Na gregu ta fla: “tokaba na”.
^ Ô: “seradu padás-padás”.
