Ebreus 6:1-20
6 Pur isu, gósi ki dja nu tirmina di prende kes primeru ensinu sobri Kristu, nu kontinua ta bira maduru, sen torna lansa un alisérsi. Kel-li krê fla pa nu ka ben prende otu bês sobri rapendimentu di óbras mortu, fé na Deus,
2 ensinu sobri batismu, poi mô riba di algen, resureison di mortu i julgamentu pa tudu ténpu.
3 I nu ta kontinua ta bira maduru, si Deus dexa.
4 Pamodi kes ki resebe lus di Deus, ki prova kel prezenti ki ben di séu, ki resebe spritu santu
5 i ki resebe kel palavra di Deus ki é bon i ki odja kes benson* ki ta ben ten na futuru,*
6 má ki disvia, ka ta da pa torna djuda-s pa es rapende, pamodi es mê es torna prega Fidju di Deus na staka i es pô-l ta pasa vergónha na frenti di tudu algen.
7 Sénpri ki ta txobe é un benson di Deus pa txon pamodi el ta rega téra, asi pa kes kodjéta pode kria pa pruvetu di kes ki ta kultiva-l.
8 Má si el da spinhu, el ka ta sirbi pa nada i el sta kuazi ta maldisuadu, i na fin el ta kemadu.
9 Má nhas irmon ki N krê txeu, enbóra nu sta pâpia si, nu ten serteza di kes midjór benson ki ta ben kontise pa nhos, kes kuza ki ten aver ku salvason.
10 Pamodi Deus é ka injustu pa skese di nhos óbra i di amor ki nhos mostra pa se nómi, pamodi nhos sirbi kes santu i nhos ta kontinua ta sirbi-s.
11 Má nu krê pa kada un di nhos mostra kel mésmu zelu, pa nhos pode ten tudu serteza di nhos speransa ti fin,
12 asi pa nhos ka bira prigisozu, má pa nhos imita kes ki pamodi ses fé i paxénxa ta erda kes promésa.
13 Pamodi kantu Deus faze se promésa pa Abraon, dja ki el ka podia juraba pa algen más grandi ki el, el jura pa el mê,
14 ta fla: “Di serteza N ta ben abensua-u i di serteza N ta ben poi bu disendenti ta bira txeu.”
15 Nton dipôs ki Abraon mostra paxénxa, el resebe kel promésa li.
16 Pamodi ómis ta jura pa algen más grandi ki es, i ses juramentu ta kaba ku tudu diskuson, dja ki el ta sirbi di garantia pa es.
17 Di mésmu manera, kantu Deus disidi mostra más klaru pa kes erderu di promésa ma se vontadi* ka pode muda, el garanti-l ku un juramentu.
18 Asi através di kes dôs kuza ki ka pode muda, ki ta mostra ma Deus ka pode konta mintira, nos ki fuji pa resebe proteson, nu pode ten txeu koraji pa nu pega riju na kel speransa ki sta nos dianti.
19 Nu ten kel speransa li sima un ánkura pa alma,* ki é suguru i firmi i el ta entra na kel lugar ki sta di kel otu ladu di kurtina.
20 Jizus entra la nos frenti, pa abri i pripara-nu kaminhu. El bira saserdóti prinsipal pa tudu ténpu sima Melkizideki.
Nótas di rodapé
^ Na gregu ta fla: “puder”.
^ Ô: “di kel sistéma ki sta pa ben”. Djobe Disionáriu di Bíblia.
^ Ô: “konsedju”.
^ Ô: “pa nos vida”.
