Filipensis 3:1-21
3 Nton nhas irmon, nhos kontinua kontenti pamodi Sinhor. N ka ta kansa di skrebe nhos kes mésmu kuza, i es é pa nhos proteson.
2 Nhos toma kuidadu ku kes algen ki é sima katxor,* ku kes ki ta faze maldadi i ku kes ki ta krê pa nhos faze sirkunsizon.*
3 Pamodi nos é kes ki ten kel sirkunsizon di verdadi, ki ta sirbi Deus ku orientason di se spritu, ki ten orgulhu na Kristu Jizus i ki ka ta poi nos kunfiansa na kuzas di ómi,
4 enbóra N ten motivus pa kunfia na kuzas di ómi* más di ki kalker algen.
Si ten algun algen ki ten motivu pa kunfia na kuzas di ómi, ami N ten mutu más inda:
5 N sirkunsidadu na oitavu dia, ami é di nason di Israel, di tribu di Benjamin, ami é un ebreu ku pai ku mai ebreu i N ta sigiba lei sima un farizeu.
6 Pamodi zelu ki N tinha, N ta pirsigiba kongregason. Pamodi kuzas ki N faze dretu di akordu ku lei, N prova ma N ka tinha kulpa di nada.
7 Má kes kuza ki tinha txeu valor pa mi, gósi es ka ten ninhun valor* pamodi Kristu.
8 Tanbê, ninhun di kes kuza li ka ten valor pa mi, konparadu ku kel grandi valor di konhisimentu di Kristu Jizus, nha Sinhor. Pamodi el, N dizisti di tudu kuza, i N ta odja-s sima lixu pa N pode ganha Kristu,
9 i pa pesoas rekonhese ma N ta sigi-l. Má N ka ta atxa ma mi é justu pamodi N sigi Lei, má é pamodi N faze kel ki é dretu ku fé na Kristu. Na verdadi, pa Deus, kes algen ki ten fé é justu.
10 Kuzê ki N krê é konxe Kristu i konxe puder di kel algen ki resusita-l. N krê sufri sima el i tanbê N krê móre sima el.
11 Asi, pa N odja si N ta konsigi resebe kel resureison di mortus ki ta kontise más sédu.
12 É ka pamodi dja N resebe-l ô ma dja N bira perfeitu, má N sta ta sforsa pa N odja si N ta konsigi kel ki Kristu Jizus skodje-m pa N resebe.
13 Irmons, inda N ka ta atxa ma dja N resebe-l, má un kuza é sértu: N ta skese di kes kuza ki sta pa tras i N ta stika pa N konsigi kes kuza ki sta pa frenti.
14 N sta ta faze nha midjór pa N pode konsigi nha obijetivu di resebe kel prémiu di xamada pa séu, ki ta ben di Deus, através di Kristu Jizus.
15 Nton, nos tudu ki ten un fé fórti, nu debe ten kel mésmu manera di pensa li. I si algun di nhos pensa di otu manera, Deus ta djuda nhos pensa di manera sértu.
16 Di kalker manera, ka ta inporta kal ki é prugrésu ki dja nu faze, nu kontinua ta anda na es mésmu kaminhu.
17 Irmons, nhos tudu nhos debe imita-m, i nhos kontinua ta imita tanbê kes ki sta ta sigi izénplu ki nu dexa nhos.
18 Pamodi ten txeu, ki gósi sta ta aji sima inimigus di staka di tortura* di Kristu. Un bês N ta papiaba txeu di es, i gósi tanbê N ta pâpia di es má ta txora.
19 Ses fin é distruison, ses deus é ses bariga, es ta xinti orgulhu di kuzas ki es devia xintiba vergónha i es ta pensa sô na kuzas di mundu.
20 Má nos é di séu* i nu sta spera ku txeu vontadi pa nos salvador, ki é Sinhor Jizus Kristu.
21 El ta ben muda nos korpu fraku pa bira na un korpu ku glória sima* di sel. El ta ben uza se grandi puder pa el faze kel-li, kel mésmu puder ki ta pô-l ta poi tudu kuza dibaxu di se autoridadi.
Nótas di rodapé
^ Ô: “kes algen ki é inpuru”.
^ Ô: “kes ki ta korta korpu”.
^ Na gregu ta fla: “na karni”.
^ Ô talvês: “N larga-s di mi pa mi”.
^ Djobe Disionáriu di Bíblia.
^ Na gregu ta fla: “é sidadon di séu”.
^ Na gregu ta fla: “ku kel mésmu fórma ki”.
