Lukas 3:1-38
3 Na anu 15 di govérnu di Tibériu Séza, kantu Pónsiu Pilatus éra governador di Judea, Eródis* éra governador di pruvínsia* di Galilea, se irmon Filipi éra governador di pruvínsia di Iturea i Trakoniti, i Lizánias éra governador di pruvínsia di Abilene,
2 na ténpu di xéfi di saserdótis Anás i di Kaifás, Juan, fidju di Zakarias, resebe mensajen di Deus na dizértu.
3 El ta baba pa tudu ladu na bera di Jurdon, ta fla pesoas ma es devia batizaba, pa mostra ma es rapende i pa ses pekadu pode purduadu,
4 sima sta skrebedu na livru di proféta Izaías: “Un algen sta ta grita na dizértu: ‘Nhos pripara kaminhu di Jeová!* Nhos bira se strada rétu.
5 Tudu rubera ten ki intxidu, i tudu montanha grandi ku pikinoti ten ki biradu planu. Kes kaminhu tórtu ten ki biradu rétu, i kes kaminhu mariadu ten ki konpodu.
6 I tudu algen* ta ben odja salvason di Deus.’”*
7 Nton, el ta flaba kes monti di algen ki ta txigaba na el pa el batiza-s: “Fidjus di kóbra venenozu! Ken ki fla nhos ma nhos ta pode fuji di kel raiba ki sta pa ben?
8 Pur isu, nhos faze kuzas ki ta mostra ma dja nhos rapende. Ka nhos kumesa ta fla: ‘Abraon é nos pai.’ Pamodi N ta fla nhos ma Deus pode poi ta sai di kes pédra li fidjus pa Abraon.
9 Na verdadi, matxadu dja sta prontu pa korta raís di arvis. Tudu arvi ki ka ta da bon fruta ta ben kortadu i ta botadu na lumi.”
10 Kes monti di algen staba ta pergunta-l: “Nton, kuzê ki nu debe faze?”
11 El responde-s: “Kel ómi ki tene dôs ropa,* pa el da kel ómi ki ka tene ninhun. I kel ki tene algun kuza pa kume pa faze mésmu kuza.”
12 Ti kes kobrador di inpostu bai tanbê pa es batizadu, i es pergunta-l: “Instrutor, kuzê ki nu debe faze?”
13 El fla-s: “Ka nhos kobra más inpostu ki kel ki nhos debe kobra.”*
14 Kes trópa tanbê pergunta-l: “Kuzê ki nu debe faze?” El fla-s: “Ka nhos prujudika ningen,* nen ka nhos konta mintira sobri ningen, má nhos kontenta ku kel ki nhos ta ganha.”*
15 Povu staba ku speransa i tudu es ta perguntaba* si Juan éra Kristu.
16 Juan responde es tudu: “Ami N ta batiza nhos ku agu, má kel ki sta ben é más fórti ki mi, i N ka merese dismara kórda di se sandália. El ta ben batiza nhos ku spritu santu i ku lumi.
17 El tene se pá na mô pa sipara trigu di padja, i el ta linpa tudu kel lugar di digudja.* El ta djunta trigu na se armazén, má el ta kema kel padja na lumi ki ka ta pode pagadu.”
18 Tanbê Juan da povu txeu otus konsedju i el kontinua ta pâpia ku es di notísias sábi.
19 Má, el ta korijiba* Eródis, ki éra governador di pruvínsia di Galilea, pamodi Erodias, ki éra mudjer di irmon di Eródis, i pamodi tudu kes kuza mariadu ki dja el fazeba.
20 Alén di tudu kes kuza li, Eródis faze más un otu krimi. El poi Juan na kadia.
21 Nton, kantu tudu algen batizadu, Jizus tanbê batizadu. Timenti el staba ta ora, séu abri,
22 i spritu santu parse sima un ponba i dixi riba di el. I ben un vós di séu ta fla: “Abo é nha Fidju, ki N ta ama, ki ta da-m txeu alegria.”
23 Kantu Jizus kumesa se trabadju, el tinha uns 30 anu. Sima gentis ta pensaba, el éra fidju,di Juzé,fidju di Eli,
24 fidju di Matate,fidju di Levi,fidju di Melki,fidju di Janai,fidju di Juzé,
25 fidju di Matatias,fidju di Amós,fidju di Naun,fidju di Esli,fidju di Nagai,
26 fidju di Maate,fidju di Matatias,fidju di Semei,fidju di Juzeki,fidju di Jodá,
27 fidju di Joanan,fidju di Reza,fidju di Zorobabel,fidju di Sealtiel,fidju di Neri,
28 fidju di Melki,fidju di Adi,fidju di Kozan,fidju di Elmadan,fidju di Er,
29 fidju di Jizus,fidju di Eliézer,fidju di Jorin,fidju di Matate,fidju di Levi,
30 fidju di Simion,fidju di Judas,fidju di Juzé,fidju di Jonan,fidju di Eliakin,
31 fidju di Meleá,fidju di Mena,fidju di Matatá,fidju di Natan,fidju di Davidi,
32 fidju di Jesé,fidju di Obedi,fidju di Boás,fidju di Salmon,fidju di Nazon,
33 fidju di Aminadabi,fidju di Arni,fidju di Esron,fidju di Peres,fidju di Judá,
34 fidju di Jakó,fidju di Izaki,fidju di Abraon,fidju di Tera,fidju di Naor,
35 fidju di Seruge,fidju di Ragau,fidju di Faleke,fidju di Éber,fidju di Selá,
36 fidju di Kainan,fidju di Arpaxadi,fidju di Sen,fidju di Nué,fidju di Lameki,
37 fidju di Metuzalen,fidju di Enoki,fidju di Jaredi,fidju di Malaliel,fidju di Kainan,
38 fidju di Enus,fidju di Seti,fidju di Adon,fidju di Deus.
Nótas di rodapé
^ Kel-li krê fla Eródis Antipas. Djobe Disionáriu di Bíblia.
^ Na gregu ta fla: “ki éra tetrarka”. Djobe Disionáriu di Bíblia.
^ Na gregu ta fla: “tudu karni”.
^ Ô: “kel ki Deus ta uza pa salva”.
^ Ô: “un otu ropa”.
^ Ô: “toma”.
^ Ô: “Ka nhos toma dinheru di ningen aforsa”.
^ Ô: “kel ki nhos ta pagadu”.
^ Na gregu ta fla: “es staba ta pensa na ses korason”.
^ Djobe Disionáriu di Bíblia.
^ Ô: “reprendeba”.
