Neemias 3:1-32
-
Es konpo kes paredi (1-32)
3 Eliazibi, ki éra saserdóti prinsipal, i se irmons, ki éra saserdótis, kumesa ta konpo kel Porton di Ovelha. Es santifika-l* i es poi kes pórta. Es santifika kel párti ki ta bai di Tori di Meá ti Tori di Ananel.
2 Kes ómi di Jerikó konpo kel otu párti. I Zakur, fidju di Inri, konpo kel otu párti.
3 Kes fidju di Asená konpo kel Porton di Pexi. Es poi kes viga pa kes pórta i dipôs es poi pórta, kes fexu i kes tranka.
4 Meremote, fidju di Urias, fidju di Akôs, konpo kel otu párti di paredi. Mezulon, fidju di Berekias, fidju di Mezezabel, konpo kel otu párti di paredi. Zadoki, fidju di Baana, konpo kel otu párti di paredi.
5 I kes algen di Tekoa konpo kel otu párti di paredi, má ses ómi inportanti ka seta trabadja pa kes enkaregadu di óbra, pamodi es ka krê rabaxaba ses kabésa.
6 Joiada, fidju di Pazeia, i Mezulon, fidju di Bezodeias, konpo kel Porton di Sidadi Antigu. Es poi kes viga pa kes pórta i dipôs es poi pórta, kes fexu i kes tranka.
7 Melatias, kel jibionita, i Jadon, kel meronotita, konpo kel otu párti di paredi. Es éra ómi di Jidion i di Mispá ki staba dibaxu di autoridadi di governador di kel ladu oésti di riu Eufratis.*
8 Uziel, fidju di Araías, ki éra un di kes ómi ki ta trabadjaba ku oru, konpo kel otu párti di paredi. Ananias, ki éra un di kes ómi ki ta fazeba óliu purfumadu,* konpo kel otu párti di paredi. Es faze kaminhu di pédra di Jiruzalen ti Paredi Largu.
9 Refaías, fidju di Ur, konpo kel otu párti di paredi. El éra prínsipi di metadi di kel distritu di Jiruzalen.
10 Jedaías, fidju di Arumafe, konpo kel otu párti di paredi ki ta fikaba frenti di se kaza. I Atuxi, fidju di Azabineias, konpo kel otu párti di paredi.
11 Malkias, fidju di Arin, i Asube, fidju di Pate-Moabe, konpo kel otu párti di paredi i tanbê Tori di Fornu.
12 I Salun, fidju di Aloés i ki éra prínsipi di metadi di distritu di Jiruzalen, konpo kel otu párti di paredi, djuntu ku se fidjus-fémia.
13 Anun i kes algen di Zanoa konpo kel Porton di Vali. Es konpo i es poi kes pórta, kes fexu i kes tranka. Tanbê es konpo uns 445 métru* di paredi ti Porton di Monti di Sinza.
14 Malkias, fidju di Rekabi i ki éra prínsipi di distritu di Bete-Akeren, konpo Porton di Monti di Sinza. El konpo-l i el poi kes pórta, kes fexu i kes tranka.
15 Salun, fidju di Kolozé i ki éra prínsipi di distritu di Mispá, konpo Porton di Fonti. El konpo pórta i tedja, i el poi kes pórta, kes fexu i kes tranka. Tanbê el konpo kel paredi di Tanki di Kanal, ki ta fikaba pértu di Jardin di Rei, ti kes skada ki ta dixi di Sidadi di Davidi.
16 Neemias, fidju di Asbuke i ki éra prínsipi di metadi di distritu di Bete-Zur, konpo un párti di paredi. El kumesa na frenti di Simitériu di Davidi* i el bai ti kel tanki ki fazedu i ti Kaza di kes Poderozu.
17 Reun, fidju di Bani, orienta kes levita pa konpo kel otu párti di paredi. Azabias, ki éra prínsipi di metadi di distritu di Keila, konpo kel otu párti di paredi pa reprizenta se distritu.
18 Bavai, fidju di Enadade i ki éra prínsipi di metadi di distritu di Keila, orienta se irmons pa konpo kel otu párti di paredi.
19 Ezer, fidju di Jezua i ki éra prínsipi di Mispá, konpo kel otu párti di paredi ki ta fikaba na frenti di subida pa Kaza di Arma, djuntu di kel pilar ki ta aguenta paredi.
20 Baruki, fidju di Zabai, trabadja ku zelu na konpo kel otu párti di paredi ki ta baba désdi kel pilar ki ta aguenta paredi ti entrada di kaza di Eliazibi, kel saserdóti prinsipal.
21 Meremote, fidju di Urias, fidju di Akôs, konpo kel otu párti di paredi ki ta baba di entrada di kaza di Eliazibi ti pónta di se kaza.
22 Kes saserdóti, ki éra di distritu di Jurdon,* konpo kel otu párti di paredi.
23 Benjamin i Asube konpo kel otu párti di paredi ki ta fikaba frenti di ses kaza. Azarias, fidju di Mazeias, fidju di Ananias, konpo kel otu párti di paredi ki ta fikaba pértu di se kaza.
24 Binui, fidju di Enadade, konpo kel otu párti di paredi ki ta baba désdi kaza di Azarias ti kel pilar ki ta aguenta paredi i ti kantu di kel paredi.
25 Palal, fidju di Uzai, konpo kel párti di paredi ki ta fika frenti di kel pilar ki ta aguenta paredi i di kel tori ki sta pegadu ku Kaza* di Rei, ki ta fika más pa riba na Pátiu di Guarda. Pedaías, fidju di Parós, konpo kel otu párti di paredi.
26 Kes sérvu di ténplu* ki ta moraba na Ofel, konpo kel otu párti di paredi ki ta fika na frenti di Porton di Agu, na ladu lésti, i frenti di kel tori altu.
27 Kes algen di Tekoa konpo kel otu párti di paredi ki ta fika na frenti di kel tori grandi ki ta bai ti kel paredi di Ofel.
28 Kes saserdóti konpo kel otu párti di paredi ki ta fika pa riba di Porton di Kabalu. Kada un di es trabadja na frenti di ses kaza.
29 Zadoki, fidju di Imer, konpo kel otu párti di paredi na frenti di se kaza.
Semaías, fidju di Sekanias i ki éra guarda di Porton di Lésti, konpo kel otu párti di paredi.
30 Ananias, fidju di Selemias, i Anun, ki é sestu fidju di Zalafe, konpo kel otu párti di paredi.
Mezulon, fidju di Berekias, konpo kel otu párti di paredi na frenti di se kaza.
31 Malkias, ki ta trabadja ku oru, konpo kel otu párti di paredi, ti kaza di sérvus di ténplu* i di kes komersianti, ki ta fika pértu di Porton di Inspeson, i ti sala ki ta fika na altu di kantu di paredi.
32 Kes algen ki ta trabadja ku oru i kes komersianti konpo kel otu párti di paredi désdi sala ki ta fika na altu di kantu di paredi ti Porton di Ovelha.
Nótas di rodapé
^ Ô: “didika-l”.
^ Na ebraiku ta fla: “di Riu”.
^ Ô: “ki ta misturaba purfumu”.
^ Talvês kel-li éra kel simitériu ki Davidi i kes otu rei di Judá interadu.
^ Ô talvês: “distritu pértu di la”.
^ Ô: “Palásiu”.
^ Ô: “Kes netineu”. Na ebraiku ta fla: “Kes ki dadu”. Kel-li krê fla kes ki dadu pa sirbi Deus.
^ Ô: “Kes netineu”. Na ebraiku ta fla: “Kes ki dadu”. Kel-li krê fla kes ki dadu pa sirbi Deus.
