Romanus 14:1-23
14 Nhos resebe dretu kel ómi ki ten fé fraku, má ka nhos julga kes ki ten opinion diferenti di nhos.*
2 Un ómi ten fé pa kume tudu kuza, má kel ómi ki é fraku ta kume sô verdura.
3 Kel ki sta kume ka debe dispreza kel ki ka sta kume, i kel ki ka sta kume ka debe julga kel ki sta kume, pamodi Deus resebe-l dretu.
4 Bo é kenha pa julga sérvu di otu algen? Se própi dónu ta disidi si el ta fika di pé ô si el ta kai. Na verdadi, el ta fika di pé pamodi Jeová* ta pô-l ta fika di pé.
5 Un algen ta atxa ma un dia é más inportanti di ki kel otu, má otu algen ta atxa ma tudu dia é igual. Kada algen debe sta konvensidu ma kel ki el ta kridita na el sta sértu.
6 Ken ki ta guarda un dia, ta guarda-l pa Jeová.* I ken ki ta kume, ta kume pa Jeová,* pamodi el ta agradese Deus. I ken ki ka ta kume, ka ta kume pa Jeová,* i inda simé el ta agradese Deus.
7 Na verdadi, ninhun di nos ka ta vive sô pa nos kabésa, i ninhun di nos ka ta móre sô pa nos kabésa.
8 Pamodi si nu vive, nu ta vive pa Jeová,* i si nu móre, nu ta móre pa Jeová.* Pur isu ô nu vive ô nu móre, nos é di Jeová.*
9 É pamodi kel-li ki Kristu móre i el vive otu bês, pa el bira Sinhor di kes algen mortu i di kes algen bibu.
10 Má pamodi ki bu ta julga bu irmon? Ô pamodi ki bu ta dispreza bu irmon? Pamodi nos tudu nu ta ben fika di pé dianti di tribunal di Deus.
11 Pamodi sta skrebedu: “Jeová* fla: ‘Sima nhos ten serteza ma N sta bibu, nhos pode ten serteza tanbê ma tudu juelhu ta ben dobra nha dianti, i tudu algen* ta ben rekonhese ma mi é Deus.’”
12 Nton, kada un di nos ta ben presta kónta di nos kabésa pa Deus.
13 Pur isu, ka nu julga kunpanheru más, má envês di kel-li, nu sta disididu na ka poi un pédra di tropesu ô algun kuza dianti di nos irmon ki ta pô-l ta kai.
14 N ten serteza na Sinhor Jizus ma nada ki nu ta kume é ka inpuru. Sô óras ki un algen ta atxa ma un kuza é inpuru, nton é inpuru pa el.
15 Si bu irmon ta ofende pamodi kumida ki bu ta kume, bu ka sta anda más di akordu ku amor. Ka bu kaba ku* fé di kel algen ki Kristu móre pa el, sô pamodi kumida ki bu ta kume.
16 Ka nhos dexa ningen pâpia mal di kes kuza dretu ki nhos ta faze.
17 Reinu di Deus é ka sobri kuzê ki nu ta kume i kuzê ki nu ta bebe, má más inportanti é ser justu, ten pas i alegria ku spritu santu.
18 Pamodi kenha ki ta trabadja di kel manera li sima skravu pa Kristu, el ta agrada Deus i el ten aprovason di ómis.
19 Nton, nu debe faze kalker kuza pa nu pode faze pas i da kunpanheru forsa.
20 Nhos para di distrui óbra di Deus sô pamodi kumida. É verdadi ki tudu kuza é puru, má é mariadu kume algun kuza óras ki el ta poi un algen ta tropesa.
21 É midjór ka kume karni, nen bebe vinhu, nen faze nada ki ta poi bu irmon ta tropesa.
22 Kel fé ki bu ten, é un asuntu entri bo ku Deus. Filís é kel ómi ki ka ta kondena se kabésa pa kel ki el ta disidi faze.
23 Má, si un algen tene dúvida i el kume, dja el sta kondenadu, pamodi el ka sta kume di akordu ku fé. Na verdadi, tudu kuza ki nu ta faze sen fé é pekadu.
Nótas di rodapé
^ Ô talvês: “ki ten ses dúvida”.
^ Na gregu ta fla: “tudu língua”.
^ Ô: “Ka bu distrui”.
