Romanus 3:1-31
3 Nton, kal ki é vantajen di ser judeu, ô kal ki é valor di faze sirkunsizon?
2 Ten txeu vantajen. Primeru di tudu, Deus da judeus Skrituras sagradu.
3 I si alguns judeu ka mostra fé? Kel-li krê fla ma Deus é ka fiel pamodi ses falta di fé?
4 Klaru ki nau! Má, pa Deus ser verdaderu, sikrê tudu ómi é mintirozu, sima sta skrebedu: “Pa bus palavra mostra ma bo é justu i pa bu ganha óras ki bu julgadu.”
5 Má, kuzê ki nu ta fla si nos injustisa ta mostra klaru justisa di Deus? Pur akazu Deus é injustu óras ki el ta mostra se raiba? (N sta ta pâpia sima alguns algen ta pensa.)
6 Klaru ki nau! Sinon, modi ki Deus ta ben julga mundu?
7 Má, si mintira ki N sta konta ta mostra ma kuzê ki Deus ta fla é verdadi i sta ta poi pesoas ta da-l glória, nton pamodi ki N sta julgadu sima un pekador?
8 I pamodi ki nu ka ta fla: “Nu faze kuzas mariadu asi pa kuzas dretu pode ben”, sima alguns ómi ta akuza-nu ku falsidadi ma nu ta fla? Kes ómi ki ta fla kes kuza li ta ben julgadu di akordu ku justisa.
9 Kuzê ki nu ta fla nton? Nu sta na un situason midjór? Klaru ki nau! Pamodi dja nu mostra klaru ma kes judeu i tanbê kes gregu, tudu es, sta dibaxu di pekadu;
10 sima sta skrebedu: “Ka ten ninhun ómi justu, nen mésmu un.
11 Ka ten ningen ki ten intendimentu. Ka ten ningen ki ta djobe Deus.
12 Tudu ómi disvia, tudu es bira sen valor. Ka ten ningen ki ta mostra bondadi, nen mésmu un.”
13 “Ses garganta é un sipultura abértu. Es ta ingana ku ses língua.” “Venénu di kóbra sta déntu ses bóka.”
14 “Ses bóka sta xeiu di maldison i di rankor.”*
15 “Ses pé ta kóre faxi pa baza sangi.”*
16 “Na ses kaminhu ten distruison i disgrasa,
17 i es ka konxe kaminhu di pas.”
18 “Es* ka ten ruspetu pa Deus.”
19 Má nu sabe ma tudu kuza ki Lei ta fla, é pa kes ki sta dibaxu di Lei, asi pa tudu bóka fika kaladu i pa mostra ma mundu interu é kulpadu dianti di Deus i es merese kastigu.
20 Pur isu, Deus ka ta txoma ningen* di justu pamodi el faze kuzas ki lei ta fla. Na verdadi, lei ta pô-nu ta intende pekadu más dretu.
21 Má gósi, sen dipende di lei, Deus mostra se justisa, sima Lei i Profétas dja flaba.
22 Sin, justisa di Deus mostradu através di fé na Jizus Kristu, pa tudu kes ki ten fé. Pamodi ka ten diferénsa.
23 Pamodi tudu algen peka i es ka ta pode alkansa glória di Deus.
24 I é sima un prezenti* ki es ta txomadu justu pamodi se grandi bondadi, através di salvason di resgati ki Kristu Jizus paga.
25 Deus aprizenta Jizus sima un oférta pa nu faze pas ku el,* através di fé na se sangi. Deus faze kel-li pa mostra se própi justisa, pamodi el mostra paxénxa i el púrdua pekadus ki fazedu na pasadu.
26 El faze kel-la pa mostra se justisa gósi, asi pa el ser justu mésmu óras ki el fla ma kel ómi ki ten fé na Jizus é justu.
27 Nton, ten algun motivu pa nu ten orgulhu? Klaru ki nau. Nu debe ten orgulhu pamodi nu ta obi ku lei? Nau. Nu debe ten orgulhu sô si nu sigi lei di fé.
28 Nu sabe ma un ómi ka ta txomadu justu pamodi el sta tenta faze kel ki lei ta fla, má pamodi fé.
29 Ô el é Deus sô di judeus? El é ka Deus di pesoas di nason tanbê? Sin, el é Deus di pesoas di nason tanbê.
30 Dja ki Deus é sô un, el ta ben txoma kes algen ki sirkunsidadu di justu pamodi ses fé i tanbê el ta ben txoma kes ki ka sirkunsidadu di justu pamodi ses fé.
31 Nton, nu ta kaba ku lei pamodi nos fé? Klaru ki nau! Envês di kel-li, nu ta apoia lei.
Nótas di rodapé
^ Ô: “amargura”.
^ Ô: “pa mata”.
^ Na gregu ta fla: “Na ses odju es”.
^ Na gregu ta fla: “ninhun karni”.
^ Ô: “prezenti di grasa”.
^ Ô: “pa kubri pekadu”.
