Romanus 6:1-23
6 Nton, kuzê ki nu ta fla? Nu ta kontinua na pekadu asi pa kel grandi bondadi bira más txeu?
2 Klaru ki nau! Dja ki pekadu ka sta kontrola-nu más, modi ki nu pode kontinua ta vive na el?
3 Ô nhos ka sabe ma nos tudu ki batizadu na Kristu Jizus nu batizadu na se mórti?
4 Nton, nu interadu djuntu ku el, através di nos batismu na se mórti. I sima Kristu resusitadu* através di puder* di se Pai, gósi nu ta vive un vida novu.
5 Si nu sta unidu ku el na un mórti sima di sel, tanbê nu ta sta unidu ku el na un resureison sima di sel.
6 Pamodi nu sabe ma nos manera di ser bédju pregadu na staka djuntu ku el, pa nos korpu ki ten pekadu perde se puder, asi pa nu ka kontinua ta ser skravu di pekadu.
7 Pamodi óras ki algen móre se pekadu dja purduadu.*
8 Tanbê, si nu móre ku Kristu, nu ta kridita ma nu ta ben vive ku el tanbê.
9 Pamodi nu sabe ma gósi ki Kristu resusitadu,* el ka ta móre más, pamodi mórti ka ten puder riba di el.
10 Kel tipu di mórti ki el móre, el móre un bês pa tudu ténpu pa kaba ku pekadu. Má kel tipu di vida ki el sta ta vive, el ta vive-l pa faze vontadi di Deus.
11 Di mésmu manera, nhos odja nhos kabésa sima ki nhos móre pa pekadu, má nhos vive pa faze vontadi di Deus sima sigidoris di Kristu Jizus.
12 Pur isu, ka nhos dexa pekadu kontinua ta reina na nhos korpu ki ta móre, i poi nhos ta obi ku dizeju di nhos korpu.
13 Nen ka nhos kontinua ta oferese nhos korpu* pa pekadu sima armas di injustisa. Má nhos oferese nhos kabésa pa Deus, sima pesoas ki pasa di mórti pa vida. Tanbê nhos oferese nhos korpu* pa Deus, sima armas di justisa.
14 Pamodi pekadu ka debe manda na nhos, dja ki nhos ka sta dibaxu di lei, má dibaxu di kel grandi bondadi di Deus.
15 Kuzê ki nu ta fla nton? Nu ta faze pekadu dja ki nu ka sta dibaxu di lei, má dibaxu di kel grandi bondadi? Klaru ki nau!
16 Nhos ka sabe ma si nhos oferese nhos kabésa pa obidese un algen sima se skravu, nhos sta ta faze nhos kabésa skravu di kel algen? Nton, ô anhos é skravu di pekadu ki ta leba pa mórti, ô anhos é skravu di obidiensa ki ta leba pa justisa.
17 Má nu ta agradese Deus, pamodi enbóra un bês nhos éra skravu di pekadu, gósi anhos é obidienti di korason pa kel tipu di ensinu ki nhos resebe.
18 Sin, désdi ki nhos libertadu di pekadu, nhos bira skravu di justisa.
19 N sta ta pâpia palavras ki nhos ta intende pamodi frakéza di nhos karni. Sima nhos oferese nhos korpu* pa ser skravu di kuza ki é inpuru i di maldadi pa faze kel ki é mau, gósi nhos oferese nhos korpu* pa ser skravu di justisa pa faze kel ki é santu.
20 Pamodi kantu nhos éra skravu di pekadu, nhos ka meste fazeba kuzê ki é justu.
21 Kal ki éra rezultadu di nhos konportamentu na kel ténpu? Nhos ta fazeba kuzas ki gósi nhos ta xinti vergónha. I kes kuza ta leba pa mórti.
22 Má, gósi ki nhos sta livri di pekadu i nhos bira skravus di Deus, nhos sta ta faze kel ki é santu, i rezultadu é vida pa tudu ténpu.
23 Pamodi pagamentu di pekadu é mórti, má prezenti ki Deus ta da é vida pa tudu ténpu através di Kristu Jizus, nos Sinhor.
Nótas di rodapé
^ Na gregu ta fla: “labantadu di mórti”.
^ Na gregu ta fla: “glória”.
^ Ô: “pagadu”.
^ Na gregu ta fla: “labantadu di mórti”.
^ Na gregu ta fla: “ménbru”.
^ Na gregu ta fla: “ménbru”.
^ Na gregu ta fla: “ménbru”.
^ Na gregu ta fla: “ménbru”.
