Karta di Tiagu 3:1-18
3 Nhas irmon, é ka txeu di nhos ki debe bira instrutor, pamodi nhos sabe ma nu ta ben resebe un julgamentu más pizadu.*
2 Pamodi nos tudu nu ta tropesa txeu bês. Si un algen ka ta tropesa* na palavra, el é un algen perfeitu, i ki tanbê ta konsigi kontrola se korpu interu.
3 Si nu ta poi freiu na bóka di kabalu pa pô-l ta obi ku nos, tanbê nu ta gia se korpu interu.
4 Tanbê nhos odja barku: enbóra el é grandi i é béntu fórti ki ta leba-l, é un lémi pikinotinhu ki ta gia-l pa undi ki kapiton krê pa el bai.
5 Di mésmu manera, língua é un párti pikinoti di korpu, má simé el ta ingaba di kuzas grandi. Nhos odja modi ki un lumi pikinoti ta kema un florésta grandi!
6 Língua tanbê é un lumi. Língua ta reprizenta un mundu di injustisa entri ménbrus di nos korpu, pamodi el ta kontamina korpu interu i el ta kema vida* interu di un algen, i se lumi ta ben di Jiena.*
7 Pamodi tudu tipu di animal brabu, di pasu, di animal ki ta rasta* i di animal di mar pode biradu mansu i pesoas sta ta bira-s mansu.
8 Má, ningen ka ta konsigi kontrola língua. El é diskontroladu i el ta prujudika algen. El sta xeiu di venénu ki ta mata.
9 Ku el nu ta lova Jeová,* nos Pai, i ku el nu ta maldísua ómis ki fazedu “sima Deus”.
10 Di mésmu bóka ta sai benson i maldison.
Nhas irmon, é ka dretu pa kuzas kontise di kel manera li.
11 Di un fonti ka ta sai agu dósi i agu margós di mésmu braku, ka simé?
12 Nhas irmon, un pé di figu pode da azeitóna ô un pé di uva pode da figu? Asi tanbê fonti di agu salgadu ka pode da agu dósi.
13 Ken ki ten sabedoria i intendimentu entri nhos? Kel algen debe mostra pa se bon konportamentu ma el ta faze tudu kuza ku brandura ki ta ben di sabedoria.
14 Má, si na nhos korason nhos tene siumis fórti i nhos ta kria konfuzon, ka nhos ingaba i ka nhos konta mintira kóntra verdadi.
15 Kel-li é ka sabedoria ki ta ben di riba. Kel tipu di sabedoria li é di téra, di animal, di dimónis.
16 Pamodi undi ki ten siumis i konfuzon, tanbê la ta ten dizórdi i tudu tipu di kuza mariadu.
17 Má kel sabedoria ki ta ben di riba, primeru di tudu el é puru, dipôs el é di pas, ikilibradu, prontu pa obi, xeiu di mizerikórdia i di bons frutu. El ta trata tudu algen igual i el é ka finjidu.
18 Tanbê, kel frutu di justisa ta simiadu undi ki ten pas pa kes ki ta inpenha pa pas.
Nótas di rodapé
^ Ô: “más duru”.
^ Ô: “fadja”.
^ Na gregu ta fla: “el ta kema róda di nasimentu (komésu)”.
^ Djobe Disionáriu di Bíblia.
^ Ô: “kóbra i lagartu”.
