Karta di Tiagu 5:1-20
5 Gósi, nhos ki é riku, nhos obi! Nhos txora i nhos lamenta pamodi kes disgrasa ki sta ta ben riba di nhos.
2 Nhos rikéza dja podrise i bitxu dja kume nhos ropa.
3 Ferújen dja kume nhos oru i nhos prata, i ses ferújen ta ben sirbi di tistimunhu kóntra nhos i el ta ben kume nhos karni. Kuzê ki nhos djunta ta ser sima un lumi na ténpu di fin.
4 Nhos odja! Kes trabadjador ki kodje na nhos kanpu sta ta grita pamodi nhos ka paga-s, i kes gritu pa pidi ajuda di kes ki faze kodjéta dja txiga na obidu di Jeová* di izérsitu.
5 Nhos leba un vida di luxu na téra i nhos faze tudu kuza ki nhos dizeja. Nhos ingorda nhos korason na dia di matansa.
6 Nhos kondena i nhos mata algen justu. El ka ta ben fika kóntra nhos?
7 Pur isu, irmons, nhos ten paxénxa ti prezénsa di Sinhor. Nhos odja modi ki agrikultor ta kontinua ta spera ku paxénxa kel frutu di téra ki ten valor, ti ki txiga kes primeru i kes últimu txuba!
8 Nhos tanbê, nhos ten paxénxa. Nhos bira nhos korason firmi, pamodi prezénsa di Sinhor sta ta txiga.
9 Irmons, ka nhos rasmunga* kóntra kunpanheru, pa nhos ka julgadu. Nhos odja! Kel Juís sta na pórta.
10 Irmons, nhos sigi kel bon izénplu di kes proféta ki pâpia na nómi di Jeová.* Es aguenta sufrimentu i es mostra paxénxa.
11 Nhos odja! Nu ta atxa ma kes ki aguenta firmi é filís.* Nhos obi ta papiadu ma Jó aguenta firmi i nhos odja kuzê ki Jeová* faze pa el na fin. Nhos odja ma Jeová* ten txeu konpaxon i mizerikórdia.
12 Nhas irmon, antis di tudu, nhos para di jura ô pa séu ô pa téra i nhos para di faze kalker otu juramentu. Má pa nhos “sin” ser sin, i nhos “nau”, nau, asi pa nhos ka julgadu.
13 Sta algen na nhos meiu ki sta ta sufri? Pa el kontinua ta ora. Sta algen ki sta animadu? Pa el kanta salmu.
14 Sta algen na nhos meiu ki sta duenti? Pa el txoma ansion di kongregason, i pa es ora pa el i pô-l óliu na nómi di Jeová.*
15 I kel orason di fé ta poi kel algen duenti* ta bira bon, i Jeová* ta labanta-l. Tanbê, si el faze pekadu, el ta purduadu.
16 Pur isu, nhos konfesa klaru nhos pekadu pa kunpanheru i nhos ora pa kunpanheru, asi pa nhos pode kuradu. Orason* di algen justu ten txeu forsa, pamodi el ta obidu.*
17 Elias éra un ómi ku sentimentus sima di nos, má kantu el ora ku zelu pa ka txobeba, ka txobe na kel téra pa três anu i meiu.
18 Dipôs el ora otu bês, i séu da txuba i téra da frutu.
19 Nhas irmon, si algun di nhos disviadu di verdadi i otu pô-l ta volta,
20 nhos sabe ma ken ki poi un pekador ta volta di se mau kaminhu, el ta salva-l* di mórti i el ta kubri un monti di pekadu.
Nótas di rodapé
^ Ô: “ka nhos jeme; ka nhos reklama”. Na gregu ta fla: “ka nhos suspira”.
^ Ô: “abensuadu”.
^ Ô talvês: “kansadu”.
^ Ô: “Súplika”.
^ Na gregu ta fla: “ten txeu forsa óras ki el ta aji”.
^ Ô: “salva se alma”.
