Imajina ma bu nase na ténpu di Jizus i bu ta moraba na Galilea. Bu bai pa Fésta di Baraka na Jiruzalen i sidadi staba xeiu di algen! Otus sérvu di Jeová ben di lonji i es sta ta vizita sidadi. Bu krê oferese Jeová un sakrifisiu. Nton, bu sta ta bai pa ténplu, ku un bódi maradu na kórda. Sta difísil pa bu pasa, pamodi rua sta ku txeu algen. Óras ki bu txiga na ténplu, bu ta atxa txeu algen. Tudu algen krê oferese un sakrifisiu. Ti ki enfin, dja txiga bu vês di ntrega saserdóti bu bódi. Má kel óra, bu ta lenbra ma un irmon ten algun kuza kóntra bo. Kel irmon pode sta na meiu di kes monti di algen. Kuzê ki bu ta fazeba? Jizus splika kuzê ki bu debe faze. (Lé Mateus 5:24.) Modi ki bo ku kel irmon pode mostra ma nhos ta npenha pa pas? Na kada un di kes lista ki sta dibaxu, marka kal ki é respósta sértu.

BU DEBE. . .

• pâpia ku bu irmon sô si bu atxa ma bo é kulpadu

• tenta konvense bu irmon ma el sta ta izajera i ma el é kulpadu

• obi bu irmon ku paxénxa óras ki el ta fla-u kuzê ki el sta xinti. Sikrê bu ka ntende dretu, pidi diskulpa pamodi bu poi bu irmon fika tristi i pamodi kes prubléma ki bu pô-l ta pasa sen bu krê

BU IRMON DEBE. . .

• fla tudu algen na kongregason ma bu ofende-l

• kritika-u i pô-u ta lenbra tudu kuza ki kontise i obriga-u seta ma bu fadja

• rekonhise ma bu tevi koraji i umildadi pa bai pâpia ku el, i el debe purdua-u di korason

Oji nu ka ta faze sakrifisius di animal. Má Jizus dexa klaru ma npenha pa pas ku nos irmons ta faze párti di nos adorason pa Jeová. Kuzê ki bu prende ku kel-li?