Na mês di setenbru nu ta ben sforsa txeu pa oferese tudu algen studu di Bíblia na bruxura Vive filís pa tudu ténpu!. Publikadoris pode skodje ser pioneru ajudanti pa 30 óra. Modi ki es kanpanha spesial ta ben fazedu?

• Na tistimunhu: Uza kel últimu párti di bruxura pa djuda kel algen kria interesi i tenta mostra modi ki é un studu di Bíblia. Ka bu skese di kes ki mostra interesi i di bus revizita. Mésmu si kes algen ka setaba un studu di Bíblia antis, talvês es pode mostra interesi na kel novu manera di studa Bíblia i na kel bruxura. Nu ka debe dexa kel bruxura na kes kaza ki nu ka atxa algen i nen nu ka debe manda-l pa kes algen ki antis ka mostra interesi. Kumison di Sirvisu di kongregason pode organiza pa faze más runion pa pregason duránti kel mês.

• Otus oportunidadi: Si bu kongregason ta uza karinhu di publikasons, poi bruxura Vive filís pa tudu ténpu! na el. Fla kes algen ki mostra interesi ma óras ki es leba kel bruxura, es pode ten un studu di Bíblia di grasa. Si ta da, mostra kel algen di manera brévi modi ki ta fazedu un studu di Bíblia, ô konbina ku el pa mostra-l na otu óra. Enkaregadu pa pregason pode skodje publikadoris ki ten spiriénsia pa bai na kes tiritóriu ki ta fazedu nogósiu pa oferese pesoas studu di Bíblia. Tanbê bu pode oferese studus di Bíblia pa kolégas di trabadju ô pa pesoas ki bu ta nkontra ku el na tistimunhu informal.

Jizus da-nu órdi pa ‘faze disiplus’ i ‘inxina-s’. (Mt 28:19, 20) Nu ta spéra ma kel kanpanha spesial ki nu ta ben uza bruxura Vive filís pa tudu ténpu!, ta djuda-nu kunpri es obijetivu.