Nu ta uza nos inerjia dretu óras ki nu ta poi métas spritual. (1Co 9:26) Métas spritual ta djuda-nu uza nos ténpu di midjór manera antis di txiga fin di es sistéma. (Ef 5:15, 16) Duránti nhos adorason na família, nhos pode pâpia sobri kes méta ki nhos pode poi pa kel novu anu di sirvisu. Pa djuda nhos, kel folhetu di studu li ten alguns artigu ku ideias di métas ki nhos pode ten. Nhos pidi ajuda di Jeová na orason sobri kel asuntu li. — Tg 1:5.

Pur izénplu, nhos pode trabadja djuntu pa djuda peloménus un algen na família ser pioneru fíksu? Si bu ka ten sertéza ma bu ta konsigi da tudu kes óra, pâpia ku alguns pioneru ki sta na mésmu situason ki bo. (Pr 15:22) Talvês ti bu pode entrivista un pioneru na bu adorason na família. Dipôs, pensa na un prugrama ki podia djudaba bo i skrebe-l. Si dja bu kustuma ser pioneru, analiza bu situason i djobe si gósi bu ta konsigi ser pioneru.

Alguns algen na bu família pode ser pioneru ajudanti pa un mês ô más? Si bu ka tene txeu forsa, bu pode ser pioneru ajudanti si bu trabadja sô un kuzinha tudu dia na pregason. Si bu ka ten txeu ténpu pamodi bu ta trabadja dia interu ô pamodi bu sta na skóla, bu pode skodje un mês ki ten un feriadu ô sinku fin di simana. Nhos skrebe na un kalendáriu kes mês ki nhos ta konsigi ser pioneru ajudanti i nhos faze un prugrama. — Pr 21:5.

ODJA VÍDIU NHOS TEN KORAJI. . . PIONERUS. DIPÔS RESPONDE KEL PERGUNTA LI:

• Kuzê ki spiriénsia di irman Emma ta inxina-nu sobri modi ki Jeová ta ama i ta kuida di kes ki ta faze sakrifisius pa ser pioneru?