Nu ten kuatu vídiu sobri studu di Bíblia ki nu ta uza na pregason. Kal ki é obijetivu di kada un di es?

• Pamodi ki nu debe studa Bíblia? — Vídiu konplétu. El fazedu pa djuda pesoas kria interesi na Bíblia, ka ta nporta es é di ki relijion. El ta insentiva pesoas pa djobe na Bíblia respóstas pa kes pergunta inportanti di vida i el ta mostra alguns respósta ki Bíblia ta da ki ta faze sentidu. I el ta splika modi ki bu pode pidi un studu di Bíblia.

• Pamodi ki nu debe studa Bíblia? (un párti). El é igual ku kel vídiu konplétu má, el é más kurtu. El ta da más rezultadu na kes tiritóriu undi pesoas ka ten txeu ténpu pa pâpia.

• Kuzê ki é un studu di Bíblia? El fazedu pa djuda pesoas kria interesi pa nos prugrama di studu di Bíblia di grasa i pa da respósta pa kes pergunta ki más algen ta faze. Tanbê el ta mostra modi ki es pode pidi un studu di Bíblia.

• Modi ki é un studu di Bíblia. El fazedu pa mostra studantis di Bíblia. Nbóra kel vídiu li sta na pájina 2 di livru Vive filís pa tudu ténpu, nu pode mostra studanti el timenti nu sta studa bruxura Vive filís pa tudu ténpu. Vídiu ta pâpia di kes asuntu ki sta na livru i kuzê ki studantis ta ben prende na ses studu.

Nbóra kada un di kes vídiu li fazedu ku un obijetivu, nu pode mostra-s ô manda-s pa kenha ki nu ta atxa ma meste. Publikadoris ta insentivadu pa konxe-s dretu i uza-s di midjór manera na pregason.