Komemorason ta da-nu bon oportunidadi pa nu pensa na bensons ki nu ta ben ten na futuru, pamodi resgati. Un di kes é resureison. Jeová nunka ka kreba pa algen móre. É pur isu ki mórti di algen ki nu ta ama é un di kes kuza ki más ta mexe ku nos sentimentu. (1Co 15:26) Jizus fika tristi kantu el odja se disiplus ta txora mórti di Lázaru. (Jo 11:33-35) Dja ki Jizus é imaji perfetu di se Pai, nu pode kúnfia ma Jeová tanbê ta fika tristi óras ki el ta odja-nu ta sufri pamodi algen ki nu ta ama móre. (Jo 14:7) Jeová tene gana pa txiga ténpu ki el ta resusita se sérvus ki móre. — Jó 14:14, 15.

Modi ki Jeová ta ben faze resureison? El ka fla-nu txeu kuza. Má dja ki Jeová é Deus di órdi, kel-li é un razon pa nu kridita ma resureison ta fazedu di manera organizadu. (1Co 14:33, 40) Enbês di nu ba intera algen, nu ta ben pripara pa resebe kes resusitadu. Bu ta pensa na resureison, prinsipalmenti óras ki bu ta sufri? (2Co 4:17, 18) Bu ta agradise Jeová pamodi el da-nu resgati i el fla na Bíblia ma kes algen ki sta mortu ta ben vive otu bês? — Col 3:15.

• Ki amigu ô família bu tene gana odja otu bês?

• Ki algen ki Bíblia ta fala di el bu tene gana konxe i fala ku el?