Sima tudu kes otu runion, Jeová tanbê da-nu runion pa pregason, ki é un manera di nu insentiva kunpanheru pa amor i pa bons óbra. (He 10:24, 25) El debe dura di sinku ti seti minutu. Kel-li krê fla ma ken ki sta faze runion pa pregason debe uza kel ténpu la pa faze par, dizigina tiritóriu i faze orason. (Óras ki el ta fazedu dipôs di un runion di kongregason, runion pa pregason debe dura ménus ténpu.) Kel algen ki sta faze runion pa pregason debe pripara un asuntu ki ta ba djuda kes irmon na pregason duránti kel dia. Pur izénplu, na sábadu ki é un dia ki txeu irmons ta sisti runion pa pregason, el pode da alguns ideia di kuzê ki irmons pode pâpia ku algen na tiritóriu, dja ki alguns publikador ka ta konsigi prega tudu dia di simana. Ki otus asuntu el pode pâpia di el?

• Un di kes ideia pa pâpia sobri Bíblia ki sta na Folhetu di studu pa runion ‘Nos vida i nos trabadju di pregason’

• Modi ki nu pode uza un notísia ô algun kuza ki kontise pa kumesa un konbérsu

• Modi ki nu pode responde óras ki un algen korta-nu konbérsu

• Modi ki nu pode responde un algen ki ka ta kridita na Deus, un algen ki ta kridita na ivoluson, un algen ki ta pâpia otu língua ô un algen ki ta faze párti di un relijion ki nu ka ta mutu atxa na nos tiritóriu

• Modi ki nu pode uza alguns funson di jw.org, di aplikativu JW Library^® ô di Bíblia

• Modi ki nu pode uza un di kes Feraménta prinsipal pa inxina

• Modi ki nu pode partisipa na maneras diferenti di faze pregason, sima tistimunhu pa tilifóni, skrebe karta, tistimunhu pa públiku, revizitas ô studus di Bíblia

• Modi ki nu pode ser idukadu na pregason, ser ikilibradu, pensa di manera puzitivu, preokupa ku nos suguransa ô otus asuntu sima kes-li

• Un lison ô un vídiu di bruxura Midjora bu manera di lé i inxina

• Modi ki nu pode nkoraja i djuda nos kunpanheru di pregason

• Un testu ki ten aver ku pregason ô algun spiriénsa ki ta nkoraja irmons