KAPÍTLU 8

Modi ki N pode faze amigus di verdadi?

“Si N sta xatiadu, N ta meste di un algen pa N dizabafa. Si N sta tristi, N ta meste di un algen pa konsola-m. Si N sta kontenti, N ta meste di un algen pa N fla-l pamodi ki N sta xinti si. Pa mi, ten un amigu é un nisisidadi.” — Brittany.

TA FLADU ma un mininu meste di un koléga pa brinka i ma un jóven meste di un amigu. Kal ki é diferénsa?

Un koléga é un algen ki ta faze-u konpanhia.

Un amigu é un algen ki ten kes mésmu prinsípiu ki bo.

Alén di kel-li, Bíblia ta fla: ‘Un amigu di verdadi ta ama tudu óra i el é un irmon ki nase pa ténpu di frónta.’ (Provérbios 17:17) Amizadi ki kel testu li ta pâpia di el é más fórti di ki kel amizadi ki bu tinha ku kes koléga ki bu ta brinkaba ku el kantu bo éra mininu!

Verdadi: Sima bu ta ba ta kria bu ta meste di amigus ki:

1. Ten bons kualidadi

2. Ten bons prinsípiu

3. Ta influensia-u di un manera puzitivu

Pergunta: Na undi ki bu pode atxa amigus di kel tipu li? Nu ben analiza kada un di kes três kuza ki sta di riba.

Primeru — Bons kualidadi

Kuzê ki bu debe sabe. Nen tudu algen ki ta fla ma é bu amigu, é ka un amigu di verdadi. Bíblia ta fla ma ‘ten amigus ki sta prontu pa kaba ku kunpanheru’. (Provérbios 18:24) Kel-li pode parse un izajeru. Má para i pensa: algun bês un “amigu” pruveta di bo? El pâpia mal di bo na bu kósta ô el spadja algun mintira sobri bo? Situasons sima kes-li pode pô-u ta perde kunfiansa na kel amigu. * Lenbra ma más inportanti é ka kantu amigu ki bu ten, má é si bus amigu ten bons kualidadi!

Kuzê ki bu pode faze. Skodje un amigu ki ten kualidadis ki bale péna imita.

“Tudu algen ta pâpia dretu di nha amiga Fiona. N krê pa pesoas fla mésmu kuza sobri mi. N krê ten kes mésmu kualidadi ki el. Se kualidadis ta dexa-m dimiradu.” — Yvette, ki ten 17 anu.

Sprimenta faze kel-li.

1. Lé Gálatas 5:22, 23.

2. Pergunta bu kabésa: “Nhas amigu ta mostra kes kualidadi ki ta faze párti di ‘frutu di spritu’?”

3. Skrebe dibaxu nómi di bus midjór amigu i na ladu di kada un di es skrebe ses midjór kualidadi.

Nómi

․․․․․

Kualidadi

․․․․․

Sujiston: Si bu konsigi lenbra sô di kualidadis mariadu, nton sta na óra di bu djobe amigus más midjór!

Sugundu — Bons prinsípiu

Kuzê ki bu debe sabe. Si bu sta txeu dizusperadu pa ranja amigus, é más fásil bu ranja maus amigu. Bíblia ta fla: ‘Ken ki ta sta djuntu ku algen ki ka ten juís, ta ten prublémas.’ (Provérbios 13:20) Kes palavra ‘ka ten juís’ ka krê fla un algen ki ta panha maus nóta na skóla ô ki é ka intilijenti. Má el krê fla kes algen ki ta konporta di un manera mariadu ô ki é rebéldi. Kes tipu di amigu li ka ta faze-u falta!

Kuzê ki bu pode faze. Skodje dretu bus amigu. Ka bu skodje kalker algen pa ser bu amigu. (Salmo 26:4) Kel-li ka krê fla ma bu ten ki faze diskriminason. Má krê fla ma bu ta konsigi ‘odja diferénsa entri un algen justu i un algen mau, entri ken ki ta sirbi Deus i ken ki ka ta sirbi-l.’ — Malaquias 3:18.

“N ta agradese nha pai ku nha mai txeu pamodi es djuda-m atxa amigus di nha idadi ki ta vive di akordu ku prinsípius di Deus.” — Christopher, ki ten 13 anu.

Responde kes pergunta li:

Óras ki N ta sta ku nhas amigu N ta xinti medu, pamodi es pode faze-m preson pa N faze kuzas ki N sabe ma é mariadu?

□ Sin

□ Nau

N ten medu pa nha pai ku nha mai konxe nhas amigu, pamodi N ta atxa ma es pode ka gosta di nhas amigu?

□ Sin

□ Nau

Sujiston: Si bu responde sin na tudu kes pergunta ki sta di riba, nton djobe amigus ki ten bons prinsípiu, ki ta da bon izénplu i ki ta sirbi Deus.

Tirseru — Ki ta influensia-u di un manera puzitivu

Kuzê ki bu debe sabe. Bíblia ta fla: ‘Maus koléga ta straga bons ábitu.’ (1 Coríntios 15:33) Un jóven ki txoma Lauren fla: “Nhas koléga di skóla ta setaba pa N ser ses amigu sô si N fazeba kes kuza ki es ta kreba. Kómu N ta xintiba mi sô, N ta fazeba kuzê ki es ta fazeba, asi pa N podia ser ses amigu”. Lauren da kónta ma si bu faze sô kuzê ki bus amigu ta fla-u pa bu faze, es ta kontrola-u. Má bu merese más di ki kel-li!

kuzê ki bu pode faze. Fika lonji di kes algen ki ta krê pa bu vive sima es. Si bu faze si talvês bu pode fika ku ménus amigu, má bu ta xinti más midjór. Tanbê bu ta abri pórta pa novus amizadi, ki ta influensia-u di un manera puzitivu. — Romanos 12:2.

“Nha amigu Clint é un algen ikilibradu i ki ta ntende sentimentus di otus. El é un algen ki ta nkoraja-m txeu.” — Jason, ki ten 21 anu.

Pergunta bu kabésa:

N ta muda nha manera di bisti, di pâpia ô aji di manera mariadu sô pa N agrada nhas amigu?

□ Sin

□ Nau

N ta ba lugaris ki normalmenti N ka ta baba, sô pa N agrada nhas amigu?

□ Sin

□ Nau

Sujiston: Si bu responde sin na tudu kes pergunta ki sta di riba, pidi bu pai ku bu mai ô un algen maduru pa da-u konsedju. Si bo é un Tistimunha di Jeová, pidi un ansion pa djuda-u skodje amigus ki ta ser un bon influénsia pa bo.

LÉ MÁS SOBRI KEL ASUNTU LI NA VOLUMI 2, KAPÍTLU 9

NA KEL OTU KAPÍTLU

Un algen ki ta fla ma el é bu amigu ô talvês bus própi dizeju sta pô-u xinti tentadu pa faze kuzas mariadu? Odja modi ki bu pode rezisti!

[Nóta di rodapé]

TESTU DI BÍBLIA

‘Ten un amigu ki ta pega na bo más di ki un irmon.’ — Provérbios 18:24.

UN IDEIA

Vive di akordu ku prinsípius di Bíblia i asi kes ki ta sforsa pa faze mésmu kuza, talvês ta krê ser bu amigu. Kes-li é kes midjór tipu di amigu ki bu pode ten!

BU SABIA MA. . .

Deus ka ta faze diferénsa, má el ta skodje ku txeu kuidadu kenha ki el ta ‘konvida pa entra na se ténda.’— Salmo 15:1-5.

FAZE UN PLANU

Pa N atxa bons amigu, N meste ․․․․․

Alguns di kes algen más grandi ki mi ki N ta gostaba di konxe midjór é ․․․․․

Kuzê ki N ta gostaba di pergunta nha pai ku nha mai sobri kel-li é ․․․․․

KUZÊ KI BU TA ATXA?

● Ki kualidadis ki más bu gosta na un amigu i pamodi?

● Ki kualidadis ki bu meste dizenvolve pa bu ser un amigu midjór?

[Lejenda]

Kantu nha pai ku nha mai fla-m pa N afasta di uns amigu ki N tinha, N ka fika kontenti ku kes kuza ki es fla-m, pamodi es éra kes tipu di algen ki N ta gostaba di ser ses amigu. Má es da-m un bon konsedju. Dipôs ki N pensa na kel-li, N da kónta ma N podia ten más amigu i ki tinha bons kualidadi.’’ — Cole

[Kuadru]

Tenta faze kes kuza li

Pâpia ku bu pai i ku bu mai sobri bus amizadi. Pergunta-s ken ki éra ses amigu kantu ki es tinha bu idadi. Es rapende di algun amizadi ki es faze? Si es rapende, pamodi? Pergunta-s modi ki bu pode ivita alguns di kes prubléma ki es pasa pa el.

Aprizenta bus amigu pa bu pai ku bu mai. Si bu sta ku medu di faze kel-li, pergunta bu kabésa, ‘Pamodi ki N tene medu?’ Bus amigu ta faze algun kuza ki bu pai ku bu mai ka gosta? Na kel kazu li, talvês bu meste skodje midjór bus amigu.

Obi ku atenson. Mostra bus amigu má bu ta preokupa ku es. — Filipenses 2:4.

Púrdua sénpri. Lenbra ma ningen é ka perfeitu. ‘Nos tudu nu ta fadja txeu bês.’ — Tiago 3:2.

Mostra ruspetu óras ki bu amigu krê fika el sô. Bu ka meste sta tudu óra koladu na bu amigu. Óras ki bu meste, kes amigu di verdadi ta sta la pa bo. — Eclesiastes 4:9, 10.

[Dizenhu]

Si bu faze sô kuzê ki bus amigu ta fla-u pa bu faze, es ta kontrola-u.