BU TA lenbra pamodi ki un di kes anju di Deus bira Satanás ô Diabu? — Pamodi el kria pa algen adora-l, el bira kóntra Deus. Otus anju djunta ku el? — Sin. Bíblia ta txoma-s di anjus di Satanás ô dimónis. — Apocalipse 12:9.

Kes anju mau, ô dimónis, ta kridita na Deus? — Bíblia ta fla ma ‘ti dimónis ta kridita’ na Deus. (Tiago 2:19) Má gósi es sta ku medu, pamodi es sabe ma Deus ta ben kastiga-s pamodi kes kuza mariadu ki es faze. Má ki kuzas mariadu ki es faze? —

Bíblia ta fla ma kes anju dexa ses kaza na Séu i es ben vive li na Téra sima ómis. Es faze kel-la pamodi es kria ben ten relason seksual ku kes mudjer bunita li na Téra. (Génesis 6:1, 2; Judas 6) Kuzê ki bu sabe sobri relason seksual? —

Relason seksual é óras ki un ómi i un mudjer ta fika djuntu ku kunpanheru di un manera spesial. Dipôs di kel-li, pode ser ki un bebé ta kumesa ta kria na bariga di kel mudjer. Má, é eradu anjus ten relason seksual. Deus fla ma sô un ómi i un mudjer ki é kazadu, ki pode ten relason seksual. Asi, si un bebé nase, kel ómi ku kel mudjer pode kuida di el.

Dipôs di kes anju faze korpu di ómi pa es i di es ten relason seksual ku kes mudjer li na Téra, ses fidju kumesa ta kria i es bira jiganti. Es éra mau i es ta maltrataba otus algen. Pur isu, Deus manda un grandi dilúviu pa kaba ku kes jiganti i ku tudu kes algen mau. Má el manda Nué faze un arka grandi pa salva kes algen ki ta fazeba kel ki é dretu. Grandi instrutor fla ma é inportanti nu lenbra di kuzê ki kontise na dilúviu. — Génesis 6:3, 4, 13, 14; Lucas 17:26, 27.

Kantu ki dilúviu ben, bu sabe kuzê ki kontise ku kes anju mau? — Es dexa di uza kes korpu di ómi ki es tinha fetu i es volta pa Séu. Má, dja ki es ka podia ser anjus di Deus más, nton es bira anjus di Satanás, ô dimónis. I kuzê ki kontise ku kes jiganti ki éra ses fidju? — Es móre na dilúviu. I tudu kes otu algen ki ka obi ku Deus tanbê móre.

Désdi dilúviu, Deus ka dexa más pa kes dimóni faze korpu di ómi otu bês. Sikrê nu ka ta konsigi odja-s, dimónis ta kontinua ta tenta poi pesoas ta faze kuza mariadu. Es sta ta faze más stragu di ki antis pamodi es tradu di Séu i es botadu li na Téra.

Bu sabe pamodi ki nu ka ta konsigi odja dimónis? — Pamodi es é spritu. Má nu pode ten sertéza ma es ta izisti. Bíblia ta fla ma Satanás ‘sta ta ngana Téra interu’ i se dimónis sta ta djuda-l. — Apocalipse 12:9, 12.

Diabu ku se dimónis pode ngana-nu tanbê? — Sin, si nu ka toma kuidadu es pode ngana-nu. Má nu ka meste ten medu. Grandi instrutor fla: ‘Diabu ka ten ninhun puder riba mi.’ Kel-li krê fla ma si nu kontinua ta ser amigu di Deus, el ta proteje-nu di Diabu i di se dimónis. — João 14:30.

É inportanti nu sabe ki kuzas mariadu ki dimónis pode pô-nu ta faze. Pensa na kel-li: Ki kuzas mariadu ki dimónis faze kantu ki es staba na Téra? — Antis di dilúviu, es tevi relason seksual ku kes mudjer, ki é un kuza ki anjus ka debe faze. Oji dimónis ta fika kontenti óras ki es ta odja ma pesoas ka ta obi ku kel lei ki Deus da sobri relason seksual. Dexa-m N faze-u un pergunta: Sô kenha ki debe ten relason seksual? — É kel-li própi, sô kenha ki é kazadu.

Oji, alguns minininha ku rapazinhus ta ten relason seksual. Má kel-li é mariadu. Bíblia ta pâpia di ‘órgon seksual’ di ómi ki txoma pénis. (Levítico 15:1-3) Órgon seksual di mudjer ta txomadu vajina. Jeová kria kes párti di korpu li pa un motivu spesial. Pur isu, é sô kenha ki é kazadu ki debe ten relason seksual. Dimónis ta fika kontenti óras ki es ta odja pesoas ta faze kuza ki Jeová ka gosta. Pur izénplu, dimónis ta fika kontenti óras ki es ta odja minininhas ku rapazinhus ta brinka ku pénis i vajina di kunpanheru. Nu ka krê dexa dimónis kontenti, ka simé? —

Ten más otu kuza ki dimónis gosta má ki Jeová ta ôdia. Nhos sabe é kuzê? — Violénsia. (Salmo 11:5) Violénsia é óras ki algen é mau i es ta maltrata otus di abuzu. Lenbra ma éra kel-li ki kes jiganti, fidjus di kes dimónis ta fazeba.

Dimónis tanbê gosta di poi algen medu. Txeu bês es ta finji ma es é kes algen ki dja móre. Es pode ti imita vós di kes algen ki dja móre. Di kel manera li, dimónis ta ngana txeu algen i es ta pô-s ta pensa ma kes algen ki dja móre sta bibu i ma es pode pâpia ku nos. É pur isu ki txeu algen ta kridita na fantasma.

Nton nu meste fika sienti pa Satanás ku se dimónis ka ngana-nu. Bíblia ta da-nu kel konsedju li: ‘Satanás ta finji ser anju di lus’. I se sérvus ta faze mésmu kuza. (2 Coríntios 11:14, 15) Má na verdadi dimónis é runhu. Nu ben odja modi ki es ta tenta pô-nu ta ser móda es.

Undi ki txeu algen ta prende sobri violénsia, konportamentu seksual mariadu i kuzas sobri spritus i fantasmas? — É ka na prugramas di tilivizon, filmis, jogus di konputador, internet i na alguns livru di stórias? Lé i odja kes kuza li ta pô-nu ta bira más amigu di Deus ô di Satanás i se dimónis? Kuzê ki bu ta atxa? —

Kenha ki bu ta atxa ma krê pa nu obi i odja kes kuza mariadu li? — Sin, é Satanás ku se dimónis. Kuzê ki nu meste faze? — Nu meste lé, obi i odja kes kuza dretu ki ta djuda-nu sirbi Jeová. Bu ta konsigi pensa na alguns di kes kuza dretu ki nu pode faze? —

Si nu faze kel ki é dretu nu ka meste xinti medu di dimónis. Jizus é más fórti di ki es i es ten medu di el. Un dia dimónis grita pa Jizus: ‘Bu ben distrui-nu?’ (Marcos 1:24) Bu ka ta atxa ma ta ben ser sábi óras ki Jizus ben kaba ku Satanás i se dimónis? — Timenti kel dia ka txiga, nu pode ten sertéza ma Jizus ta kontinua ta proteje-nu di dimónis si nu kontinua se amigu i amigu di se Pai ki sta na Séu.