1-3. Pamodi ki Paulu bai pa Korintu i kal ki é alguns prubléma ki el pasa pa el?

 ANU 50 D.K. sta kuazi na fin. Apóstlu Paulu sta na Korintu, ki é un sidadi riku ki pesoas ta faze nogósiu i ki ten txeu gregu, romanus i judeus. a Paulu ka sta li pa kunpra ô bende algun kuza ô pa djobe trabadju. El sta na Korintu pa un motivu mutu más inportanti, ki é da tistimunhu sobri Reinu di Deus. Má simé, Paulu meste di un lugar pa fika, i el sta disididu na ka ser un karga pa otus algen. El ka krê poi ningen ta pensa ma pamodi el ta inxina palavra di Deus, pesoas tinha obrigason di da-l dinheru. Kuzê ki el ta ba faze?

² Paulu ta faze ténda. Faze kel trabadju li ka é fásil, má el sta prontu pa faze-l pa el sustenta se kabésa. El ta atxa trabadju na kel sidadi li ki ten txeu algen? El ta atxa un lugar dretu pa el fika? Enbóra Paulu tene tudu kes kuza li pa faze, el ka ta skese di se trabadju prinsipal, ki é pregason.

³ Paulu fika algun ténpu na Korintu i el tevi bons rezultadu na pregason. Kuzê ki nu ta prende di kes kuza ki Paulu faze na Korintu, ki pode djuda-nu da un tistimunhu konplétu sobri Reinu di Deus na nos tiritóriu?

4, 5. (a) Undi ki Paulu fika na Korintu i ki trabadju ki el faze pa sustenta se kabésa? (b) Modi ki talvês Paulu prende faze ténda?

⁴ Algun ténpu dipôs ki Paulu txiga na Korintu, el konxe un kazal ki gostaba di resebe otus algen. Éra un judeu ki txomaba Ákila i se mudjer Prisila ô Priska. Kel kazal muda pa Korintu pamodi un órdi ki inperador Kláudiu da “pa tudu judeu saíba di Roma.” (Atus 18:1, 2) Ákila ku Prisila konvida Paulu pa fika na ses kaza, i tanbê pa el trabadja ku es. Bíblia ta fla: “Dja ki es tinha mésmu profison, el [Paulu] fika na ses  kaza i el trabadja ku es, pamodi es ta fazeba ténda.” (Atus 18:3) Duránti trabadju di pregason di Paulu na Korintu, el fika na kaza di kel kazal li ki ta mostraba bondadi i ki gostaba di resebe otus algen. Timenti Paulu staba na kaza di Ákila i Prisila, talvês el skrebe alguns di kes karta ki dipôs bira ta faze párti di Bíblia. b

⁵ Modi ki Paulu, un ómi ki idukadu “na pé di Gamaliel,” tanbê ta fazeba ténda? (Atus 22:3) Ta parse ma kes judeu na primeru séklu ka ta atxaba ma éra un vergónha inxina ses fidjus un profison, sikrê es staba na skóla. Paulu éra di Tarsu na Silísia, ki éra famozu pamodi la tinha un panu ki txomaba cilicium ki es ta uzaba pa fazeba ténda. Talvês Paulu prende faze kel trabadju li kantu el staba jóven. Faze ténda ka éra un trabadju fásil. Pa fazeba ténda, un trabadjador tinha ki koze kel tisidu di ténda ô korta-l i torna koze-l. Kel-li éra difísil pamodi kel material éra riju.

6, 7. (a) Kuzê ki Paulu ta atxaba di kel trabadju di faze ténda i kuzê ki ta mostra ma Ákila ku Prisila ta pensaba sima el? (b) Modi ki kristons oji ta sigi izénplu di Paulu, Ákila i Prisila?

⁶ Faze ténda ka éra kuza más inportanti pa Paulu. El ta fazeba kel trabadju li sô pa sustentaba se kabésa. Se obijetivu éra prega notísias sábi “sen ninhun rekonpénsa.” (2 Kor. 11:7) Kuzê ki Ákila ku Prisila ta atxaba di ses trabadju? Pamodi es éra kriston, es ta pensaba sima Paulu. Ákila i Prisila dexa ses trabadju i es muda ku Paulu pa Éfezu kantu Paulu sai di Korintu na anu 52 D.K. Na Éfezu, es uza ses kaza pa faze runion di kongregason. (1 Kor. 16:19) Dipôs, es bai pa Roma i es torna volta pa Éfezu. Kel kazal zelozu li poi Reinu na primeru lugar i es staba  dispostu na poi nisisidadi di otus algen na frenti di ses nisisidadi. Pamodi kel-li “tudu kes kongregason di kes otu nason” fika kontenti ku kel ki es faze. — Rom. 16:3-5; 2 Tim. 4:19.

⁷ Oji, kristons ta sigi izénplu di Paulu, Ákila i Prisila. Kes irmon i irmans zelozu ta trabadja duru ‘pa es ka ser un karga’ pa otus algen. (1 Tes. 2:9) Txeu pioneru ta da un bon izénplu pamodi es ta trabadja alguns dia di simana ô alguns mês duránti anu pa es pode sustenta ses kabésa. Má ses trabadju di pioneru é más inportanti pa es. Sima Ákila ku Prisila, txeu sérvu di Jeová gosta di resebe enkaregadus di grupu di kongregason na ses kaza. Kes ki sénpri ta djobe manera di “resebe otus algen dretu” sabe ma faze kel-li ta anima i ta da algen koraji. — Rom. 12:13.

8, 9. Modi ki Paulu reaji kantu kes judeu fika kóntra se trabadju di pregason i undi ki el ba prega dipôs?

⁸ Otu kuza ki ta prova ma pa Paulu faze ténda éra sô un manera di el sustentaba se kabésa na trabadju di pregason, kontise kantu Silas i Timótiu txiga di Masedónia ku un grandi prezenti. (2 Kor. 11:9) Lógu, Paulu “kumesa ta uza tudu se ténpu ta prega palavra di Deus”. (Atus 18:5) Má pamodi Paulu staba ta prega ku zelu, kes judeu fika kóntra el. Es staba ta nega kel mensajen di Kristu ki pode salvaba es. Paulu krê mostraba es ma el ka éra responsável pa ses disizon. Nton, el sakudi se ropa i el fla kes algen ki fika kóntra el: “Anhos é responsável pa nhos mórti. N ka ten kulpa. Di gósi pa dianti, N ta bai pa kes algen di nason.” — Atus 18:6; Eze. 3:18, 19.

⁹ Undi ki Paulu ba prega dipôs? Un ómi ki txomaba Tísiu Justu, ki talvês éra un pruzélitu ki ta moraba na ladu di sinagóga, resebe Paulu na se kaza. Nton, Paulu para di prega na sinagóga i el kontinua ta prega na kaza di Justu. (Atus 18:7) Paulu kontinua ta mora ku Ákila i Prisila timenti el staba na Korintu, má el uza kaza di Justu pa faze kes atividadi ki tinha aver ku trabadju di pregason.

10. Kuzê ki ta mostra ma Paulu ka staba disididu na prega sô pa kes algen di nason?

¹⁰ Kantu Paulu fla ma el ta baba pa pesoas di nason, el ka krê flaba ma el ta paraba di prega pa kes judeu ô pruzélitus ki krê obiba el. Pur izénplu, “Krispu, prizidenti di sinagóga, bira ta kridita na Sinhor, djuntu ku tudu algen di se kaza.” Ta parse ma txeu judeu di kel sinagóga tanbê bira kriston, pamodi Bíblia ta fla: “Txeu algen di Korintu ki obiba kel mensajen bira ta kridita i es batizadu.” (Atus 18:8) Kongregason di Korintu, ki ka dura ki formadu, fika ta faze runion na kaza di Tísiu Justu. Si Lukas skrebe kes kuza na órdi ki es kontise, sima el ta kustuma fazeba, kel-li krê fla ma kes judeu ô pruzélitus bira kriston dipôs ki Paulu sakudi se ropa. Nton, Paulu staba dispostu na faze mudansas i prega pa kalker algen ki krê obiba el.

11. Modi ki oji Tistimunhas di Jeová ta imita Paulu óras ki es ta prega pa kes algen ki ta fla ma es é kriston?

¹¹ Oji pesoas di txeu lugar ta faze párti di kes relijion ki ta fla ma es ta sigi Jizus. Kes relijion dja ten txeu anu ta influensia ses vida. Na mundu interu, misionárius di kes relijion trabadja duru pa konverte pesoas. Pesoas ki ta fla ma es é kriston pode dexa kes kustumu di ses relijion influensia-s más txeu di ki ses amizadi ku Deus. É kel-li tanbê ki kontise ku kes judeu ki ta viveba na Korintu na ténpu di apóstlus. Má sima Paulu ki djuda kes judeu intende Skrituras, nos tanbê nu sta dispostu na djuda pesoas intende kuzê ki es ta lé na Bíblia. Mésmu  óras ki es ta fika kóntra nos ô kes xéfi di ses relijion ta pirsigi-nu, nu ta kontinua ta tenta djuda pesoas. Entri kes ki “ten zelu pa Deus, má ka di akordu ku konhisimentu izatu”, pode ten txeu algen ki krê sabe verdadi sobri Deus. Pur isu, nu meste atxa kes algen li. — Rom. 10:2

12. Ki mensajen di Jizus da Paulu forsa?

¹² Paulu talvês ka tinha serteza si el debe kontinuaba ta prega na Korintu. Má dipôs ki Jizus parse pa el na un noti, el fika ta sabe kuzê ki el tinha ki fazeba. Jizus fla-l: “Ka bu ten medu, má kontinua ta pâpia i ka bu fika kaladu, pamodi N sta ku bo i ningen ka ta ataka-u pa faze-u mal. Pamodi N tene txeu algen na kel sidadi li.” (Atus 18:9, 10) Kel mensajen di Jizus da Paulu txeu forsa! Jizus garanti Paulu ma el ta protejeba el di se inimigus i ma tinha txeu algen na kel sidadi ki el kreba pa Paulu pregaba pa es. Kuzê ki Paulu faze dipôs ki el resebe kel mensajen di Jizus? Bíblia ta fla: “El fika la un anu i meiu ta inxina-s palavra di Deus.” — Atus 18:11.

13. Kuzê ki Paulu talvês pensa na el timenti el staba ta txiga pértu di tribunal i modi ki el sabia ma es ka ta mataba el?

¹³ Dipôs ki Paulu tevi más ô ménus un anu na Korintu, kontise un kuza ki da-l serteza ma Sinhor staba ku el. “Kes judeu djunta pa ataka Paulu i es leba-l pa tribunal,” ki txomaba béma. (Atus 18:12) Alguns ta fla ma kel tribunal éra un lugar planu, más altu ki txon ki ta fikaba pértu di séntru di prasa di Korintu. El éra di mármori branku i azul i el tinha imajens bunitu na el. Na frenti di kel tribunal, tinha spasu ki ta txigaba pa un monti di algen fikaba djuntu. Alguns storiador ta kridita ma kel tribunal ta fikaba pértu di sinagóga, i pur isu, el ta fikaba pértu di kaza di Tísiu Justu. Kantu Paulu txiga pértu di béma, talvês el lenbra di kantu es da Stevon ku pédra, ki foi kel primeru kriston ki matadu pamodi el da tistimunhu di Jizus. Paulu, ki na kel ténpu es ta txomaba di Saulu, “konkorda  pa es mata-l.” (Atus 8:1) Ta kontiseba mésmu kuza ku Paulu? Nau, pamodi Jizus dja prometeba el: “Ningen ka ta... faze-u mal.” — Atus 18:10.

14, 15. (a) Ki akuzason kes judeu faze kóntra Paulu i pamodi ki Gáliu ka krê involveba na ses diskuson? (b) Kuzê ki kontise ku Sóstinis i talvês kal ki foi rezultadu?

¹⁴ Kuzê ki kontise kantu Paulu txiga na tribunal? Kel juís, ki txomaba Gáliu, éra governador di Akaia i irmon más bédju di Seneka, ki éra un filózofu romanu. Kes judeu akuza Paulu: “Kel ómi li sta ta konvense pesoas pa adora Deus di un manera ki ta bai kóntra lei.” (Atus 18:13) Kes judeu fla ma Paulu viola lei pamodi el konvense alguns judeu pa bira kriston. Má, Gáliu odja ma Paulu ka fazeba nada “mariadu” i nen el ka éra kulpadu di ninhun “krimi gravi”. (Atus 18:14) Gáliu ka krê involveba na kes diskuson di judeus. Paulu ka meste nen difendeba se kabésa, pamodi Gáliu fla lógu kal ki éra se disizon. Kes judeu fika txeu xatiadu i es ba diskonta ses raiba na Sóstinis, ki talvês fika prizidenti di sinagóga na lugar di Krispu. Es pega Sóstinis “i es sota-l na frenti di tribunal.” — Atus 18:17.

¹⁵ Pamodi ki Gáliu ka inpidi kel monti di algen di sota Sóstinis? Talvês Gáliu pensa ma Sóstinis éra xéfi di kel monti di algen ki atakaba Paulu, i pur isu el staba ta resebe kel ki el mereseba. Sikrê Sóstinis ka éra xéfi di kel monti di algen, kel kuza li ki kontise tevi un bon rezultadu. Alguns anu dipôs ki Paulu skrebe se primeru karta pa kongregason na Korintu, el pâpia di un irmon ki txomaba Sóstinis. (1 Kor. 1:1, 2) El éra kel mésmu Sóstinis ki sotadu na Korintu? Si éra el, talvês kel spiriénsia kasábi ki el tevi djuda-l bira un kriston.

16. Modi ki kes palavra di Jizus, “kontinua ta pâpia i ka bu fika kaladu pamodi N sta ku bo”, ta da-nu forsa pa nu kontinua ta prega?

¹⁶ Lenbra ma foi dipôs ki kes judeu nega pregason di Paulu, ki Sinhor Jizus garanti-l: “Ka bu ten medu, má kontinua ta pâpia i ka bu fika kaladu, pamodi N sta ku bo”. (Atus 18:9, 10) Nu debe lenbra di kes palavra li, prinsipalmenti óras ki pesoas ta nega kel mensajen ki nu ta prega. Nunka ka bu skese ma Jeová ta odja korason i el ta atrai kes algen ki é sinseru. (1 Sam. 16:7; Juan 6:44) Kel-li ta pô-nu ta krê mante okupadu na nos trabadju di pregason. Tudu anu, milharis di algen ta batiza, kel-li krê fla ma tudu dia ta batiza senténas di algen. Jizus ta garanti tudu kes ki ta obi ku se órdi di ‘inxina algen di tudu nason pa es bira se disiplus’: “N sta ku nhos tudu dia, ti fin di es mundu.” — Mat. 28:19, 20.

17, 18. Kuzê ki talvês Paulu pensa na el timenti el staba ta bai pa Éfezu?

¹⁷ Nu ka sabe si foi kel disizon di Gáliu ki djuda pa ten pas na kel  novu kongregason na Korintu. Má, Paulu “pasa txeu dia la” antis di el dispidi di irmons. Na primavéra di anu 52 D.K., el faze planu pa viaja di barku di Senkrea, ki ta fikaba uns 11 kilómetru pa lésti di Korintu, pa el bai pa Síria. Má antis di Paulu sai di Senkrea, el “korta kabélu baxu, pamodi el fazeba un promésa.” c (Atus 18:18) Dipôs di kel-li, el leba Ákila ku Prisila djuntu ku el i es trabesa mar Ejeu pa es bai pa Éfezu na Ázia Menór.

¹⁸ Timenti Paulu staba ta sai di Senkrea, talvês el pensa na kuzê ki kontise na Korintu. El tinha bons lenbransa i txeu motivu pa el xintiba kontenti. Trabadju ki el faze la duránti kel un anu i meiu tevi bons rezultadu. Kel primeru kongregason na Korintu dja staba formadu i es ta fazeba runion na kaza di Tísiu Justu. Krispu i se família, Tísiu Justu i txeu otus algen bira kriston na Korintu. Paulu ta amaba kes novu irmon li pamodi el djuda-s bira kriston. Dipôs, el skrebe-s ta fla ma es éra sima un karta di rekumendason ki skrebedu na se korason. Nos tanbê nos é amigu di kes ki nu djuda kumesa ta adora Jeová. Tanbê, nu ta xinti sábi di odja kes irmon ku irmans li ki é sima “kartas di rekumendason”! — 2 Kor. 3:1-3.

19, 20. Kuzê ki Paulu faze kantu el txiga na Éfezu i kuzê ki nu ta prende sobri modi ki nu ta organiza nos vida pa nu sirbi Deus más txeu?

¹⁹ Kantu Paulu txiga na Éfezu, el kumesa se trabadju lógu. El “entra na sinagóga i el rasusina ku kes judeu.” (Atus 18:19) Di es bês, Paulu ka fika txeu ténpu na Éfezu. Enbóra es pidi-l pa el fika más ténpu, “el ka seta”. Kantu el staba ta dispidi di kes algen di Éfezu, el fla-s: “Si Jeová krê, N ta torna ben pa li.” (Atus 18:20, 21) Paulu sabia ma inda el tinha ki pregaba pa txeu algen na Éfezu. El krê voltaba pa Éfezu otu bês. Má, el disidi dexa kel asuntu li na mô di Jeová. Nu pode imita kel bon izénplu di Paulu. Nu krê organiza nos vida di un manera ki ta dexa-nu sirbi Deus más txeu. Má, sénpri nu debe kunfia na orientason di Jeová i djobe manera di aji di akordu ku se vontadi. — Tia. 4:15.

²⁰ Dipôs di dexa Ákila ku Prisila na Éfezu, Paulu viaja di barku pa Sezarea. Ta parse ma el “subi” pa Jiruzalen i el kunprimenta kel kongregason di la. (Atus 18:22) Dipôs, Paulu bai pa Antiokia di Síria. El ta fikaba la óras ki el ka staba ta viaja. Se sugundu viajen misionáriu tirmina ku bons rezultadu. Gósi, nu ben odja kuzê ki kontise na se últimu viajen misionáriu.