Pregadoris di Reinu ki nu krê txeu:

Imajina ma bo é un di kes apóstlu ki sta na monti di Olivera. Jizus ta parse bu frenti. Un poku antis di el subi pa séu, el ta fla: “Óras ki spritu santu ben riba nhos, nhos ta resebe puder i nhos ta ben ser nhas tistimunha na Jiruzalen, na tudu Judea i Samaria, i ti na párti más lonji di téra.” (Atus 1:8) Modi ki bu ta xintiba?

Talvês bu ta xintiba ma kel ki Jizus sta ta fla-u pa bu faze é un kuza ki bu ka ta pode faze. Talvês bu pode pergunta: ‘Modi ki nos, un grupu pikinoti di disiplus, pode da tistimunhu “ti na párti más lonji di téra”?’ Pode ser ki bu ta lenbra di kel avizu ki Jizus da na kel noti antis di el móre: “Skravu é ka más ki se dónu. Si es pirsigi-m, es ta pirsigi nhos tanbê. Si es obi ku nhas palavra, es ta obi ku di nhos tanbê. Má, es ta ben faze tudu kes kuza li kóntra nhos pamodi nha nómi, pamodi es ka konxe Kel ki manda-m.” (Juan 15:20, 21) Óras ki bu ta pensa na kes palavra li, talvês bu pode pergunta: ‘Modi ki N ta konsigi da un tistimunhu konplétu sikrê ku opozison i pirsigison?’

Oji tanbê nu sta na un situason kuazi igual. Dja ki nos é Tistimunhas di Jeová, nu meste prega “ti na párti más lonji di téra” i pa “algen di tudu nason”. (Mat. 28:19, 20) Modi ki nu pode faze kel trabadju li, prinsipalmenti óras ki pesoas ta pirsigi-nu?

Livru di Atus ta konta un stória sábi ki ta mostra modi ki Jeová djuda kes apóstlu i kes otu kriston faze trabadju di pregason. Kel livru li, ki bu sta ta lé gósi, ta ben djuda-u prende sobri kes txeu kuza ki kontise ku kes kriston i xinti modi ki es staba animadu di odja trabadju di pregason ta omenta uma faxi. Bu ta ben fika dimiradu di odja ma txeu kuza ki kontise na ténpu di apóstlus, tanbê kontise ku povu di Deus oji. Bu ta ben odja ma kes kuza ta involve ka sô trabadju ki nu ta faze, má tanbê modi ki nu sta organizadu pa faze kel trabadju. Midita na kes stória, ta ben djuda-u ten más serteza inda ma Jeová Deus sta ta orienta kel párti di se organizason li na téra.

Nu ta ora i nu ta spera ma studa livru di Atus, ta fortalese bu kunfiansa ma Jeová ta djuda-u i ma el ta uza se spritu santu pa da-u kel forsa ki bu meste pa bu aguenta firmi. Tanbê nu ta spera ma ku ajuda di es livru, bu ta fika inkorajadu pa kontinua ta da un “tistimunhu konplétu sobri Reinu di Deus” i pa djuda otus algen konxe Jeová i ten speransa di vive pa tudu ténpu. —  Atus 28:23; 1 Tim. 4:16.