1, 2. Kuzê ki Saulu sta ba fazeba na Damasku?

 UN GRUPU di ómi sta ta viaja na strada pértu di Damasku. Es sta disididu na ba faze un grandi maldadi la. Es sta ba forsa disiplus di Jizus pa sai di ses kaza, dipôs es ta ba maraba es, umilha-s i rasta-s pa Jiruzalen, pa Sinédriu ba kastiga-s.

² Líder di kel grupu éra un ómi ki txomaba Saulu. Dja el staba involvidu na mata algen. a Ka dura, kantu otus judeu fanátiku staba ta da Stevon, un fiel disiplu di Jizus ku pédra ti ki el móre, Saulu staba ta odja i ta konkorda ku kel-la. (Atus 7:57–8:1) Dipôs Saulu kumesa ta pirsigi disiplus di Jizus ki ta viveba na Jiruzalen. Tanbê é el ki staba ta orienta pa djobe i pirsigi disiplus di Jizus na otus sidadi. El krê kababa ku kel relijion prigozu ki es ta txomaba di “Kaminhu”. — Atus 9:1, 2; odja kuadru “ Autoridadi ki Saulu tinha na Damasku”.

3, 4. (a) Kuzê ki kontise ku Saulu? (b) Ki perguntas nu sta ben responde?

³ Dirapenti, un lus txeu fórti límia na vólta di Saulu. Kes ómi ki staba ta viaja ku el fika spantadu sen sabe kuzê ki es ta flaba. Kel lus sega Saulu i el kai na txon. Dipôs el obi un vós di séu ta fla: “Saulu, Saulu, pamodi ki bu sta pirsigi-m?” Saulu fika dizorientadu, i el pergunta: “Anho é kenha, Sinhor?” Saulu fika txeu spantadu kantu kel vós responde: “Ami é Jizus, kel ki bu sta ta pirsigi.” — Atus 9:3-5; 22:9.

⁴ Kuzê ki nu ta prende ku kes primeru palavra ki Jizus fla Saulu? Modi ki analiza kes kuza ki kontise kantu Saulu bira disiplu di Jizus pode djuda-nu? I kuzê ki nu pode prende di modi ki kongregason uza kel ténpu di pas dipôs ki Saulu bira kriston?

5, 6. Kuzê ki nu ta prende ku kes palavra ki Jizus fla Saulu?

⁵ Kantu Jizus para Saulu na strada di Damasku el ka pergunta-l:  “Pamodi ki bu sta pirsigi nhas disiplu?” Envês di kel-li el pergunta-l: “Pamodi ki bu sta pirsigi-m?” (Atus 9:4) Kel-li ta mostra ma óras ki disiplus di Jizus ta sufri, Jizus ta sufri tanbê. — Mat. 25:34-40, 45.

⁶ Si bu sta ta pirsigidu pamodi bu fé na Kristu, bu pode ten serteza ma Jeová ku Jizus sabe di kuzê ki bu sta ta pasa. (Mat. 10:22, 28-31) Jeová pode ka kaba ku kel provason gósi. Lenbra ma Jizus odja Saulu ta djuda na mata Stevon, i ta rasta kes disiplu fiel di ses kaza na Jiruzalen. (Atus 8:3) Má, Jizus ka para kel pirsigison lógu. Má simé, através di Kristu, Jeová da Stevon i kes otu disiplu kel forsa ki es mesteba pa es kontinuaba fiel.

7. Kuzê ki bu meste faze pa aguenta pirsigison?

⁷ Bo tanbê bu pode aguenta pirsigison si bu faze kes kuza li: (1) Sta disididu na kontinua lial pa Jeová ka ta inporta kuzê ki kontise. (2) Pidi ajuda di Jeová. (Flp. 4:6, 7) (3) Dexa vingansa na mô di Jeová. (Rom. 12:17-21) (4) Kunfia ma Jeová ta da-u forsa pa bu aguenta firmi ti ki el kaba ku kel provason. — Flp. 4:12, 13.

8, 9. Modi ki talvês Ananias xinti ku kel diziginason ki el dadu?

⁸ Dipôs di responde kel pergunta di Saulu: “Anho é kenha, Sinhor?” Jizus fla-l: “Labanta i entra na sidadi, i bu ta fladu kuzê ki bu debe faze.” (Atus 9:6) Dja ki Saulu ka staba ta odja, kes ómi ki staba ku el leba-l pa un kaza na Damasku undi el faze jejun i el ora pa três dia. Timenti kel-li staba ta kontise, Jizus pâpia sobri Saulu pa un di se disiplu ki txomaba Ananias ki ta moraba na Damasku. Ananias éra un disiplu ki “tudu judeu ki ta moraba la ta papiaba ben di el”. — Atus 22:12.

⁹ Imajina modi ki Ananias fika ta xinti ku kel-la! Jizus Kristu ki é kabésa di kongregason, i ki dja staba resusitadu, pâpia ku el i skodje-l pa un diziginason spesial. Kel-li éra un grandi priviléjiu, má tanbê el éra un diziginason difísil! Kantu  Jizus fla-l ma el tinha ki ba pâpia ku Saulu, Ananias responde: “Sinhor, N obi txeu algen ta pâpia sobri kel ómi li i di tudu kuza mariadu ki el faze pa bus santu na Jiruzalen. I li el ten autoridadi ki kes xéfi di saserdótis da-l pa prende tudu kes ki ta invoka bu nómi.” — Atus 9:13, 14.

10. Kuzê ki nu ta prende sobri Jizus pa manera ki el trata Ananias?

¹⁰ Jizus ka kritika Ananias pamodi el fla-l kuzê ki staba ta preokupa-l. Má, el da-l orientasons klaru. Jizus mostra ma el ta preokupaba ku kuzê ki Ananias ta xintiba, kantu el fla-l pamodi ki el krê pa el kunpriba kel diziginason. Jizus fla sobri Saulu: “Kel ómi li é un vazu ki N skodje pa leba nha nómi pa nasons i tanbê pa reis i fidjus di Israel.  Pamodi N ta ben mostra-l klaru kantu kuza ki el ten ki sufri pamodi nha nómi.” (Atus 9:15, 16) Ananias obi ku Jizus lógu. El ba atxa Saulu, kel ki staba ta pirsigi kristons, i el fla-l: “Saulu, nha irmon, Sinhor Jizus, ki parse pa bo na kel strada ki bu staba ta ben, manda-m, asi pa bu pode bira ta odja otu bês i pa bu fika xeiu di spritu santu.” — Atus 9:17.

11, 12. Kuzê ki nu ta prende na kel stória sobri Jizus, Ananias i Saulu?

¹¹ Nu ta prende txeu kuza na es stória sobri Jizus, Ananias i Saulu. Pur izénplu, nu ta prende ma Jizus sta ta orienta trabadju di pregason sima el prometeba. (Mat. 28:20) Enbóra Jizus ka ta pâpia ku nos oji, el sta ta orienta trabadju di pregason através di skravu fiel ki el skodje pa toma kónta di se disiplus. (Mat. 24:45-47) Dibaxu di orientason di Grupu Enkaregadu di Óbra, publikadoris i pionerus ta mandadu pa ba djobe kes algen ki krê prende más sobri Jizus. Sima nu odjaba na kel kapítlu ki pasa, txeu di kes algen li ora ta pidi Deus orientason, i lógu dipôs, Tistimunhas di Jeová prega pa es. — Atus 9:11.

¹² Ananias obidese Jizus, el seta kel diziginason i el foi abensuadu. Bu sta ta obi ku kel mandamentu di da un tistimunhu konplétu, mésmu óras ki kel-li ta dexa-u preokupadu? Alguns algen pode xinti ansiadadi óras ki es ta prega di kaza en kaza i óras ki es ta pâpia ku un algen stranhu. Otus algen ta atxa difísil prega pa kes algen ki sta ta trabadja na lójas ô na otus lugar, na rua, pa tilifóni ô pa kartas. Ananias vense se medu i el tevi priviléjiu di djuda Saulu resebe spritu santu. b Ananias tevi bons rezultadu, pamodi el kunfia na Jizus i el odja Saulu sima un algen ki pode ben biraba se irmon. Nu pode vense nos medu si sima Ananias nu kunfia ma Jizus sta ta orienta trabadju di pregason, nu poi na lugar di pesoas, i nu odja kes algen ki más ta odia-nu sima un algen ki pode ben bira nos irmon. — Mat. 9:36.

13, 14. Si bu sta ta studa Bíblia má inda bu ka batiza, kuzê ki bu pode prende ku izénplu di Saulu?

¹³ Lógu Saulu faze mudansas ku bazi na kel ki el prende. Dipôs ki el kuradu, el batiza i el kumesa ta djunta ku kes disiplu na Damasku. Má el faze más di ki sô kel-la. “Lógu dipôs el kumesa ta prega sobri Jizus na kes sinagóga, ta fla ma Jizus é Fidju di Deus.” — Atus 9:20.

¹⁴ Si bu sta ta studa Bíblia má inda bu ka batiza, bu ta ben sigi  izénplu di Saulu i aji faxi pa aplika kel ki bu sta prende? É verdadi ma Saulu odja un milagri ki Kristu faze, i di serteza kel-la motiva-l pa el aji. Má otus algen tanbê odja Jizus ta faze milagris, má es ka xinti motivadu pa faze mudansas. Pur izénplu, un grupu di farizeu odja Jizus ta kura un ómi ki tinha un mô manku, i txeu judeu odja Jizus ta resusita Lázaru. Má txeu di es ka xinti motivadu na sigi Jizus, i alguns ti bira kóntra el. (Mar. 3:1-6; Juan 12:9, 10) Má diferenti di es, Saulu muda se manera di pensa. Pamodi ki Saulu bira un disiplu di Kristu má otus algen nau? Pamodi el tinha más ruspetu pa Deus di ki pa ómis, i el staba gratu pamodi Kristu mostra-l mizerikórdia. (Flp. 3:8) Si bu faze mésmu kuza, nada ka ta inpidi-u di faze trabadju di pregason i di kualifika pa batiza.

15, 16. Kuzê ki Saulu ta fazeba na sinagógas, i modi ki judeus na Damasku reaji?

¹⁵ Imajina modi ki kes monti di algen reaji kantu Saulu kumesa ta prega sobri Jizus na Sinagógas. Alguns algen fika dimiradu i otus fika xatiadu. Es ta perguntaba: “É ka kel ómi li ki staba ta ataka ku violénsia kes algen na Jiruzalen ki staba ta invoka kel nómi li?” (Atus 9:21) Óras ki Paulu ta splikaba pamodi ki el muda se atitudi, el ta “mostraba klaru ma Jizus é Kristu.” (Atus 9:22) Má un splikason klaru ka ta konvense tudu algen. El ka ta muda manera di pensa di pesoas ki ta insisti na vive di akordu ku tradison ô di pesoas ki é orgulhozu. Má simé Saulu kontinua ta prega.

¹⁶ Dipôs di três anu, inda kes judeu na Damasku staba ta diskuti ku Saulu. Dipôs es tenta mata-l. (Atus 9:23; 2 Kor. 11:32, 33; Gál. 1:13-18) Kantu Saulu fika ta sabe ma es staba ta tenta mata-l, el disidi dexa sidadi sukundidu. El konkorda pa alguns algen dixi-l na un sestu pa un abertura ki tinha na muralha di sidadi. Lukas txoma kes algen ki djuda Saulu skapa na kel noti, di “se disiplus” ô disiplus di Saulu. (Atus 9:25) Kes palavra li ta mostra ma alguns algen ki obi Saulu na Damasku, muda ses atitudi i es bira ta sigi Kristu.

17. (a) Di ki maneras pesoas ta reaji óras ki es obi verdadis di Bíblia? (b) Kuzê ki nu debe kontinua ta faze i pamodi?

¹⁷ Kantu bu kumesa ta pâpia ku bus família, bus amigu i otus algen sobri kes kuza ki bu staba ta prende, talvês bu pensa ma es ta setaba kes verdadi di Bíblia lógu pamodi es é klaru. Pode ser ki alguns di es seta, má txeu di es ka seta. Na verdadi, talvês un algen di bu família trata-u sima un inimigu. (Mat. 10:32-38) Má, si bu kontinua ta midjora bu kapasidadi di rasusina ku bazi na Skrituras i bu mante un konportamentu di un kriston, ti mésmu kes algen ki fikaba kóntra bo pode ben muda di atitudi. — Atus 17:2; 1 Ped. 2:12; 3:1, 2, 7.

18, 19. (a) Kal ki foi rezultadu di kel ajuda ki Barnabé da Saulu? (b) Modi ki nu pode imita Barnabé ku Saulu?

¹⁸ Ta da pa intende pamodi ki kantu Saulu entra na Jiruzalen kes  disiplu ka kridita ma gósi el éra un disiplu. Kantu Barnabé fla-s ma gósi Saulu dja biraba un disiplu, kes apóstlu seta-l i el kontinua ku es pa algun ténpu. (Atus 9:26-28) Saulu ta tomaba kuidadu, má el ka tinha vergónha di notísias sábi. (Rom. 1:16) El prega ku koraji na Jiruzalen, ki é kel mésmu lugar ki el kumesa ta pirsigi kes disiplu di Jizus Kristu. Kes judeu na Jiruzalen fika txeu xatiadu kantu es da kónta ma kel ómi ki es ta pensaba ma ta ba orientaba kel pirsigison pa kaba ku kristons, dja biraba un kriston. I gósi es krê mataba el. Bíblia ta fla: “Kantu kes irmon fika ta sabe di kel-li, es leba [Saulu] pa baxu ti Sezarea i es manda-l pa Tarsu.” (Atus 9:30) Saulu obi ku kel orientason di Jizus ki el da através di irmons. I kel-li djuda el ku kongregason.

¹⁹ Repara ma Barnabé toma disizon di djuda Saulu. Kel bondadi ki Barnabé mostra di serteza djuda pa el ku Saulu bira bons amigu. Sima Barnabé, bu gosta di djuda kes novu na kongregason? Bu gosta di trabadja ku es na pregason i djuda-s bira más amigu di Jeová? Si bu faze si, bu ta resebe txeu benson. Si é gósi ki bu sta kumesa ta sai na pregason, bu ta seta ajuda di otus algen sima Saulu seta? Óras ki bu ta trabadja djuntu ku kes publikador ki ten más spiriénsia, kel-li ta djuda-u midjora bus kapasidadi na pregason, bu ta ser más filís i bu ta faze amizadis ki pode dura pa tudu ténpu.

20, 21. Modi ki sérvus di Deus di pasadu i di nos ténpu pruveta dretu kel ‘ténpu di pas’?

²⁰ Dipôs ki Saulu bira un disiplu i el skapa di Jiruzalen ku suguransa, “tudu kongregason na Judea, Galilea i Samaria entra na un ténpu di pas”. (Atus 9:31) Modi ki disiplus uza kel ténpu di pas? (2 Tim. 4:2) Kel stória ta mostra ma es “fika kada bês más fórti”. Kes apóstlu i otus irmon ki éra responsável, fortalese fé di disiplus i es djuda kongregason ‘anda ku grandi ruspetu pa Jeová i resebe konsolu di spritu santu’. Pur izénplu, Pedru uza se ténpu pa fortalese kes disiplu na sidadi di Lida, ki ta fikaba na un lugar planu ki txomaba Saron. Sforsu ki el faze djuda pa txeu algen na Lida i na kes lugar pértu di la bira ta kridita “na Sinhor.” (Atus 9:32-35) Kes disiplu ka dexa pa otus kuza distrai-s, má es sforsa pa kuida di kunpanheru i pa prega notísias sábi. Pamodi kel-li, kongregason “kontinua ta bira más txeu.”

²¹ Pa vólta di anu 1990, Tistimunhas di Jeová di txeu país entra na un “ténpu di pas” sima kel-li. Govérnus ki pirsigi povu di Deus pa txeu anu, dirapenti perde ses puder. Pur isu, fika más fásil prega na kes país undi trabadju di pregason staba proibidu, i na alguns kazu  kabadu ku tudu kes proibison. Milharis di Tistimunha di Jeová pruveta kel oportunidadi li pa prega na públiku, i txeu algen obi notísias sábi.

22. Modi ki bu pode uza dretu kel liberdadi ki bu ten gósi?

²² Bu sta ta uza dretu kel liberdadi ki bu ten gósi? Si bu ta mora na un país ki ten liberdadi di adora Deus, Satanás ta tenta pô-u ta gasta más ténpu ta inpenha pa kuzas material envês di sirbi Jeová. (Mat. 13:22) Ka bu fika distraídu. Uza kel ténpu di pas ki bu ten gósi ku sabedoria. Odja kel ténpu li sima un oportunidadi pa da un tistimunhu konplétu i pa djuda kongregason fika más fórti. Lenbra ma bu situason pode muda di un óra pa kel otu.

23, 24. (a) Kuzê ki nu ta prende ku kel ki kontise ku Tabita? (b) Kuzê ki nu debe sta disididu na faze?

²³ Odja kuzê ki kontise ku un mudjer ki ta sigiba Jizus ki txomaba Tabita ô Dorkas. El ta moraba na Jopi ki éra un sidadi ka mutu lonji di Lida. Kel irman fiel li uza ku sabedoria se ténpu i kuzas ki el tinha pa faze txeu “bons óbra i el ta djudaba txeu algen póbri.” Má dirapenti, el duense i el móre. c Se mórti dexa kes disiplu na Jopi txeu tristi, prinsipalmenti kes viúva ki el ta mostraba bondadi. Kantu Pedru txiga na kel kaza undi se korpu staba ta priparadu pa interu, el faze un milagri ki ninhun di kes apóstlu di Jizus Kristu inda ka fazeba. Pedru ora i el resusita Tabita! Bu ta konsigi imajina alegria ki kes viúva i kes otu disiplu xinti kantu Pedru fla-s pa es entra na kuartu i es odja Tabita bibu otu bês? Di serteza kes kuza ki kontise da-s forsa pa es infrenta kes provason ki staba pa binha! Ta da pa intende pamodi ki “tudu algen na Jopi fika ta sabe di kel [milagri] i un monti di algen bira ta kridita na Sinhor.” — Atus 9:36-42.

²⁴ Nu pode prende dôs kuza inportanti ku kuzê ki kontise ku Tabita. (1) Nu pode perde nos vida di un óra pa kel otu. Nton é inportanti nu faze un bon nómi pa Deus timenti nu ta pode! (Ecl. 7:1) (2) Kel speransa di resureison é un kuza sértu. Jeová odja tudu kes kuza ki Tabita dja fazeba ku bondadi i el rekonpensa-l. El ta ben lenbra di tudu kel trabadju duru ki  nu faze i el ta ben resusita-nu si nu móre antis di Armajedon. (Ebr. 6:10) Pur isu, ô nu sta na un “ténpu difísil” ô nu sta na un “ténpu di pas”, nu debe kontinua ta da un tistimunhu konplétu sobri Kristu. — 2 Tim. 4:2.