KAPÍTLU 6
Stevon staba “xeiu di bondadi di Deus i puder”
Kuzê ki nu ta prende di kel tistimunhu ki Stevon da ku koraji na Sinédriu.
Ku bazi na Atus 6:8–8:3
1-3. (a) Ki situason difísil Stevon staba ta pasa pa el, i modi ki el reaji? (b) Ki perguntas nu sta ben responde?
STEVON sta dianti di kes algen na tribunal. Sta 71 ómi xintadu na un sala grandi ki talvês ta fika pértu di ténplu na Jiruzalen. Kel sala ta da algen medu. Kes juís di kel tribunal li, ki é Sinédriu, djunta pa julga Stevon. Es é ómis ki ten txeu puder i txeu di es ka ten ruspetu pa kel disiplu li di Jizus. Na verdadi, kel ómi ki djunta kes juís li é saserdóti prinsipal Kaifás, ki staba ta manda na Sinédriu kantu Jizus kondenadu i es mata-l alguns mês antis. Stevon sta ku txeu medu?
2 Na es momentu, róstu di Stevon sta diferenti. Kes juís djobe-l i es odja ma se róstu sta “sima róstu di un anju.” (Atus 6:15) Anjus ta leba mensajen di Jeová Deus, i pur isu es ten motivu pa ten koraji i pa es sta kalmu. Mésmu kuza kontise ku Stevon. Ti mésmu kes juís ki sta xeiu di ódiu konsigi odja kel-li. Kuzê ki djuda Stevon fika kalmu?
3 Oji, kristons pode prende txeu ku respósta pa kel pergunta li. Tanbê nu meste sabe pamodi ki Stevon staba na kel situason txeu difísil. Modi ki dja el difendeba se fé? I di ki maneras nu pode imita-l?
“Es poi povu... ta fika xatiadu” (Atus 6:8-15)
4, 5. (a) Pamodi ki Stevon tinha txeu valor pa kongregason? (b) Na ki sentidu Stevon staba “xeiu di bondadi di Deus i puder”?
4 Dja nu odja ma Stevon tinha txeu valor pa kel kongregason di kristons ki ka dura ki formadu. Na kel kapítlu ki pasa, nu odja ma el éra un di kes 7 ómi umildi ki seta un diziginason spesial di kes apóstlu. Se umildadi ta dexa-nu inda más dimiradu óras ki nu ta lenbra ma Deus abensua-l ku txeu kapasidadi. Na Atus 6:8, nu ta lé ma el dadu kapasidadi pa faze “grandis sinal i milagris” sima alguns di kes apóstlu faze. Tanbê el staba “xeiu di bondadi di Deus i puder”. Kuzê ki kel-li krê fla?
5 Stevon éra un algen ki ta mostraba bondadi i amor pa otus algen, i kel-la ta poba pesoas ta gostaba di el. Óras ki el ta papiaba, el ta konsigi konvenseba kes algen ki staba ta obi ma el éra sinseru, i ma kes verdadi ki el staba ta inxina ta djudaba es. El staba xeiu di puder pamodi el éra umildi i el dexa spritu di Jeová orienta-l. El ka bira orgulhozu pamodi kapasidadis ki el tinha. Envês di kel-li, el da tudu lovor pa Jeová i el mostra ma el ta inportaba ku kes algen ki el ta papiaba ku es. Kel-li ta djuda-nu intende pamodi ki se inimigus ta atxaba ma el éra un amiasa pa ses relijion!
6-8. (a) Ki dôs kuza inimigus di Stevon akuza-l ma el faze i pamodi? (b) Pamodi ki izénplu di Stevon ta djuda kristons oji?
6 Alguns ómi tenta diskuti ku Stevon, má “es ka konsigi aguenta Stevon, pamodi el staba ta pâpia ku txeu sabedoria i ku ajuda di spritu santu.” a Pamodi es ka konsigi prova ma es staba sértu, es bai ‘sukundidu i es konvense’ alguns ómi pa akuza Stevon, ki éra un sigidor di Kristu ki ka tinha ninhun kulpa. Tanbê es poi povu, kes instrutor di lei i kes ómi di idadi “ta fika xatiadu”. Pamodi kel-li, es leba Stevon aforsa pa Sinédriu. (Atus 6:9-12) Se inimigus akuza-l di faze dôs kuza mariadu. Es fla ma el pâpia kóntra Deus i ma el pâpia kóntra Muizés. Di ki maneras el faze kes kuza li?
7 Kes algen ki akuza Stevon fla ma el pâpia kóntra Deus kantu el pâpia kóntra “es lugar santu”, ki é ténplu na Jiruzalen. (Atus 6:13) Es fla ma el staba ta muda kes kustumu ki Muizés inxina povu, i pur isu el staba ta pâpia kóntra Lei di Muizés i ta disruspeta Muizés. Kel-li éra un akuzason txeu sériu, pamodi pa judeus di kel ténpu, Lei di Muizés, ténplu i txeu otus tradison ki es poi na Lei éra más inportanti di ki kalker otu kuza. Nton, kes algen ki staba ta akuza Stevon staba ta fla ma el éra un amiasa pa ses relijion i ma el debe moreba!
8 Infilismenti, txeu bês pesoas relijiozu ta faze mésmu kuza pa kria sérvus di Deus prubléma. Ti na nos ténpu, kes algen li ta poi autoridadis ta pirsigi Tistimunhas di Jeová. Modi ki nu debe reaji óras ki pesoas ta konta mintira pa akuza-nu? Nu pode prende txeu kuza ku izénplu di Stevon.
Un tistimunhu ku koraji sobri “kel Deus di glória” (Atus 7:1-53)
9, 10. Kuzê ki alguns algen ki kritika kel diskursu ki Stevon faze na Sinédriu fla, i kuzê ki nu meste lenbra?
9 Sima nu odja na komésu di kel kapítlu li, róstu di Stevon staba kalmu, sima di un anju, kantu el staba ta obi kes akuzason kóntra el. Kaifás vira pa el i el pergunta: “Kel-li é verdadi?” (Atus 7:1) Gósi é vês di Stevon pâpia. Nton el faze un diskursu ku koraji!
10 Alguns algen ki kritika kel diskursu ki Stevon faze, fla ma enbóra el faze un diskursu kunpridu, el ka prova ma el éra inosenti. Má na verdadi, Stevon da-nu un bon izénplu di modi ki nu ta “difende” notísias sábi. (1 Ped. 3:15) Lenbra ma Stevon akuzadu di ka mostra ruspetu pa Deus kantu el pâpia kóntra ténplu, i tanbê el akuzadu ma el ka mostra ruspetu pa Muizés kantu el pâpia kóntra Lei. Na kel diskursu ki Stevon faze, el pâpia sobri três fazi di stória di Israel i el distaka alguns kuza ku kuidadu. Nu ben odja kada un di kes três fazi.
11, 12. (a) Modi ki Stevon uza dretu izénplu di Abraon? (b) Pamodi ki Stevon pâpia di Juzé na se diskursu?
11 Ténpu di kes xéfi di família. (Atus 7:1-16) Stevon kumesa ta pâpia sobri Abraon, ki judeus ta ruspetaba txeu pamodi se fé. El kumesa ta pâpia sobri kel asuntu inportanti li, pamodi el sabia ma tudu kes algen ta konkordaba ku el. El distaka ma Jeová, “kel Deus di glória”, parse pa primeru bês pa Abraon na Mezopotámia. (Atus 7:2) Na verdadi, Abraon éra stranjeru na kel Téra ki Deus prometeba el. Abraon ka tinha nen ténplu nen Lei di Muizés. Nton, ningen ka pode fla ma nos fé na Deus ta dipende di kes kuza la.
12 Kes algen ki staba ta obi Stevon tanbê tinha txeu ruspetu pa Juzé ki éra disendenti di Abraon. Má Stevon lenbra-s ma própi irmons di Juzé, ki é pai di kes tribu di Israel, pirsigi Juzé, ki éra un ómi justu, i es bende-l sima un skravu. Má simé, Deus uza-l pa salva Israel di fómi. Stevon sabia ma spiriénsia di Juzé ta parseba ku spiriénsia di Jizus Kristu di txeu manera. Má el ka konpara Juzé ku Jizus na se diskursu, asi pa kes algen ki staba la pode kontinua ta obi-l pa más ténpu.
13. Modi ki kel ki Stevon fla sobri Muizés mostra ma se inimigus staba eradu, i kuzê ki el dexa klaru?
13 Ténpu di Muizés. (Atus 7:17-43) Stevon pâpia txeu kuza sobri Muizés. El mostra sabedoria pamodi txeu di kes algen ki ta fazeba párti di Sinédriu éra saduseus, ki ta setaba sô kes livru di Bíblia ki Muizés skrebeba. Lenbra tanbê, ma kes inimigu di Stevon akuza-l di disruspeta Muizés. Kel respósta di Stevon prova ma se inimigus staba eradu, pamodi el mostra ma el tinha txeu ruspetu pa Muizés i pa Lei. (Atus 7:38) El fla ma irmons di Muizés nega Muizés enbóra el staba ta tenta salva-s. Se irmons nega-l kantu ki el tinha 40 anu. I más di 40 anu dipôs, es rabela kóntra el txeu bês. b Di kel manera li, Stevon mostra klaru ma povu di Deus dja negaba txeu bês kes algen ki Deus skodje pa tomaba kónta di es.
14. Ki kuzas inportanti Stevon prova kantu el uza izénplu di Muizés?
14 Stevon lenbra kes algen ki staba ta obi-l ma Muizés dja flaba ma ta ben parseba un proféta sima el na Israel. Kenha ki ta ba sérba kel proféta i modi ki es ta ba trataba el? Stevon dexa pa responde kes pergunta li na fin di se diskursu. Stevon distaka otu kuza inportanti: Muizés dja prendeba ma kalker txon pode biraba santu, sima kel txon ki tinha kel pé di spinhu ta pega lumi, di undi ki Jeová papiaba ku el. Nton, Jeová krê pa nu adora-l sô na un úniku lugar, sima pur izénplu na ténplu na Jiruzalen? Nu ben odja.
15, 16. (a) Pamodi ki foi inportanti Stevon pâpia di tabernáklu na diskursu ki el faze? (b) Pamodi ki Stevon pâpia di ténplu di Salumon na se diskursu?
15 Tabernáklu i ténplu. (Atus 7:44-50) Stevon lenbra kes algen di tribunal ma antis di izistiba kalker ténplu na Jiruzalen, Deus dja mandaba Muizés pa fazeba un tabernáklu, ki éra un ténda ki es pode mudaba di un lugar pa kel otu, pa es pode fazeba ses adorason. Ningen ki staba la djuntu ku Stevon ka ta pode flaba ma tabernáklu éra ménus inportanti di ki ténplu, pamodi Muizés ta adoraba Jeová na tabernáklu.
16 Dipôs, kantu Salumon konstrui ténplu na Jiruzalen, el fla un kuza txeu inportanti na se orason. I Stevon fla mésmu kuza na kel diskursu ki el faze. El fla: “Kel Más Grandi ka ta mora na kaza ki é mô di ómis ki faze”. (Atus 7:48; 2 Cró. 6:18) Jeová pode uza un ténplu pa kunpri se vontadi, má el pode faze-l sen un ténplu. Nton pamodi ki kes algen ki ta adora-l debe atxaba ma adorason puru ta dipende di un konstruson ki é ómis ki faze? Stevon tirmina se diskursu ku kes palavra ki sta na livru di Isaías: “Séu é nha tronu i téra é nha bankinhu ki N ta poi pé. Ki tipu di kaza é ki es ta faze pa mi? É Jeová ki fla. Undi ki é nha lugar di diskansu? É ka nha mô ki faze tudu kes kuza li?” — Atus 7:49, 50; Isa. 66:1, 2.
17. (a) Modi ki kel diskursu ki Stevon faze dexa klaru ma kes algen ki staba ta obi-l tinha un atitudi mariadu? (b) I modi ki el prova na se diskursu ma el ka fazeba nada mariadu?
17 Óras ki nu ta pensa na tudu kel ki Stevon fla ti gósi, nu ta odja ma el dexa klaru ma kes algen ki staba ta akuza-l tinha un atitudi mariadu. El mostra ma Jeová sta prontu pa faze mudansas i el pode kunpri se vontadi di txeu manera. El ka ta dipende di situasons ô tradisons. Kes algen ki staba ta obi Stevon, ta amaba kel ténplu bunitu na Jiruzalen i kes tradison ki ómis poi na Lei di Muizés. Má, es ka intende pamodi ki Jeová da Lei i pamodi ki el manda faze ténplu! Éra sima si Stevon staba ta faze kel pergunta inportanti li: Obi ku Jeová é ka midjór manera di ruspeta Lei i ténplu? Kes palavra di Stevon prova ma el ka fazeba nada mariadu, pamodi na verdadi, el staba ta obi ku Jeová di midjór manera ki el ta podeba.
18. Di ki maneras nu meste sforsa pa imita Stevon?
18 Kuzê ki nu ta prende ku kel diskursu ki Stevon faze? El konxeba Skrituras dretu. Di mésmu manera, nu meste studa Palavra di Deus ku kuidadu si nu krê uza “palavra di verdadi dretu.” (2 Tim. 2:15) Tanbê nu pode prende ku manera ki Stevon pâpia ku pesoas ku bondadi i sen ofende-s. Sikrê kes algen ki staba ta obi-l éra txeu violéntu, ti undi ta daba, el pâpia di kuzas ki es tudu ta konkordaba. El faze kel-li, pamodi kes kuza éra txeu inportanti pa kes ómi. Tanbê el mostra ruspetu pa kes ómi i el txoma-s di “gentis grandi”. (Atus 7:2) Nos tanbê nu debe pâpia di kes verdadi di Palavra di Deus “ku brandura i ku txeu ruspetu.” — 1 Ped. 3:15.
19. Modi ki Stevon pâpia ku koraji na Sinédriu sobri mensajen di julgamentu di Jeová?
19 Má, nu ka ta dexa medu di ofende pesoas inpidi-nu di pâpia sobri kes verdadi di Palavra di Deus. Tanbê, nu ka ta muda kes mensajen di julgamentu di Jeová pa agrada otus algen. Stevon é un bon izénplu pa nos. El da kónta ma tudu kes próva ki el mostra na Sinédriu ka poi kes juís ki éra orgulhozu ta muda di ideia. Asi, ku ajuda di spritu santu, el tirmina se diskursu ta mostra ku koraji ma es éra sima ses gentis grandi ki negaba Juzé, Muizés i tudu kes otu proféta. (Atus 7:51-53) Na verdadi, kes juís di Sinédriu mataba Misías, ki Muizés i tudu kes otu proféta dja flaba ma ta binha. Es dizobidese Lei di Muizés di piór manera ki ten!
“Sinhor Jizus, resebe nha spritu” (Atus 7:54–8:3)
“Kantu es obi kes kuza li, es fika ku txeu raiba na ses korason, i es kumesa ta rintxa denti kóntra el.” — Atus 7:54
20, 21. Modi ki kes algen na Sinédriu reaji ku kuzê ki Stevon fla i modi ki Jeová inkoraja-l?
20 Kes juís ka pode negaba ma kel ki Stevon fla éra verdadi. Pur isu es fika txeu xatiadu. Es ka konsigi fika kalmu i es kumesa ta rintxa denti kóntra Stevon. Kel ómi fiel li, talvês odja ma es staba ta ba kondenaba el sima dja es kondenaba se Líder, Jizus.
21 Stevon mesteba di koraji pa aguentaba kuzê ki staba kuazi ta ba kontiseba ku el. Nu ka ten dúvida ma el fika txeu inkorajadu ku kel vizon ki Jeová da-l ku bondadi na kel momentu. Stevon odja glória di Deus i el odja Jizus di pé, na ladu direita di Jeová! Timenti Stevon staba ta konta sobri kel vizon, kes juís tapa ses obidu ku mô. Pamodi ki es faze kel-la? Algun ténpu antis, Jizus dja flaba kel tribunal ma el éra Misías i ma ka ta duraba el ta ba staba na ladu direita di se Pai. (Mar. 14:62) Kel vizon di Stevon prova ma Jizus staba ta pâpia verdadi. Na verdadi, kes algen ki ta fazeba párti di Sinédriu traíba i mataba Misías! Tudu es djunta kóntra Stevon omésmu ténpu, pa da-l ku pédra ti ki el móre. c
22, 23. Modi ki mórti di Stevon foi sima mórti di Jizus, i modi ki kristons oji pode kunfia na Jeová sima Stevon faze?
22 Sima Jizus, Stevon móre ku pas na korason i ku txeu kunfiansa na Jeová i el púrdua kes algen ki mata-l. El fla: “Sinhor Jizus, resebe nha spritu.” El fla kel-li talvês pamodi inda el staba ta odja kel vizon di Fidju di ómi djuntu ku Jeová. Nu ka ten dúvida ma Stevon konxeba kes palavra di Jizus, ki ta da algen koraji: “Ami é resureison i vida”. (Juan 11:25) Pa tirmina, Stevon ora diretamenti pa Deus ku vós altu i el fla: “Jeová, ka bu kulpa-s pa es pekadu.” Dipôs ki el fla kel-li, el móre. — Atus 7:59, 60.
23 Stevon foi kel primeru sigidor di Kristu ki se inimigus mata ô ki foi un mártir. (Odja kadru “ Pamodi ki Stevon foi un ‘mártir’?”) Má infilismenti, el ka ta sérba kel últimu. Désdi kel ténpu ti gósi, kes algen relijiozu ki é fanátiku, alguns pulítiku i otus inimigu kruel dja mata alguns sérvu fiel di Jeová. Má simé, nu pode kunfia na Jeová sima Stevon faze. Gósi, Jizus é Rei i Jeová da-l txeu puder. Nada ka ta ben inpidi-l di resusita se sigidoris fiel. — Juan 5:28, 29.
24. Kuzê ki Saulu faze kantu Stevon staba ta matadu, i modi ki mórti di Stevon afeta otus algen di manera puzitivu duránti txeu ténpu?
24 Un jóven ki txoma Saulu staba la kantu Stevon matadu. El konkorda pa Stevon matadu i ti mésmu el fika ta toma kónta di kes ropa di kes algen ki staba ta da Stevon ku pédra. Lógu dipôs di mórti di Stevon, el kumesa ta pirsigi disiplus di Jizus di manera kruel. Má mórti di Stevon ta ben afetaba otus algen di manera puzitivu duránti txeu ténpu. Se izénplu djuda otus kriston kontinua fiel pa Jeová ti es móre. Tanbê Saulu, ki dipôs ben txomadu di Paulu, fika txeu rapendidu pamodi el konkordaba pa Stevon matadu. (Atus 22:20) Enbóra el djudaba pa Stevon matadu, más tardi el fla: “N ta papiaba kóntra Deus, N ta pirsigiba se povu i mi éra orgulhozu.” (1 Tim. 1:13) Kel-li ta mostra klaru ma Paulu nunka ka skese di Stevon i di kel grandi diskursu ki el faze na kel dia. Na verdadi, alguns diskursu i karta di Paulu ta pâpia di alguns kuza ki Stevon fla na se diskursu. (Atus 7:48; 17:24; Ebr. 9:24) Ku ténpu, Paulu prende sigi izénplu di fé i di koraji di Stevon, ki éra un ómi “xeiu di bondadi di Deus i puder”. Má pergunta é kel-li: “Nos tanbê nu ta ben sigi izénplu di Stevon?”
a Alguns di kes inimigu li ta fazeba párti di “Sinagóga di Libertus”. Talvês es foi prézu pa romanus i dipôs es foi libertadu ô talvês es éra skravus ki libertadu i ki bira pruzélitu. Alguns di es éra di Silísia, sima Saulu di Tarsu. Kel stória ka ta mostra si Saulu éra un di kes algen di Silísia ki ka foi kapás di prova ma es staba sértu, kantu es diskuti ku Stevon.
b Diskursu di Stevon ten informasons ki nu ka ta atxa na ninhun otu párti di Bíblia, sima informasons sobri idukason ki Muizés resebe na Ijitu, idadi ki el tinha kantu el fuji pa primeru bês di Ijitu i kantu ténpu ki el pasa na Midian.
c Ta parse ma lei di Roma ka daba Sinédriu autoridadi pa mata algen. (Juan 18:31) Nton ta parse ma Stevon ka matadu pamodi tribunal ki disidi, má pamodi un grupu di algen ki staba ku txeu raiba disidi mata-l.
