PÁRTI 8
Óras ki kontise un disgrasa
‘Nhos ta xinti txeu alegria, nbóra si meste, duránti algun ténpu, nhos fika tristi pamodi txeu tipu di provason’. — 1 Pedro 1:6
Sikrê bu sta tenta pa bu kazamentu i bu família ser filís, pode kontise kuza ki bu ka sta ta spéra i kaba ku bu alegria. (Eclesiastes 9:11 ) Má, nos Deus ta djuda-nu ku amor pa nu lida ku kalker prubléma. Si bu sigi kes konsedju di Bíblia, abo ku bu família ta konsigi lida dretu ti ku kes situason más piór ki ten.
1 KUNFIA NA JEOVÁ
KUZÊ KI BÍBLIA TA FLA: ‘Nhos bota tudu nhos preokupason riba di el, pamodi el ta kuida di nhos.’ (1 Pedro 5:7 ) Lenbra sénpri ma Deus é ka kulpadu pa bus prubléma. (Tiago 1:13 ) Sima bu ta ba ta fika más amigu di Jeová, el ta djuda-u di kel midjór manera ki ten. (Isaías 41:10 ) ‘Nhos konta-l tudu kel ki sta na nhos korason.’ — Salmo 62:8.
Tanbê bu pode xinti konsoladu óras ki bu ta lé i studa Bíblia tudu dia. Kel-li ta djuda-u xinti modi ki Jeová ‘ta konsola-nu na tudu nos prubléma’. (2 Coríntios 1:3, 4; Romanos 15:4 ) El ta promete ma el ta da-u ‘pas di Deus, ki ningen ka ta konsigi ntende’. — Filipenses 4:6, 7, 13.
KUZÊ KI BU PODE FAZE:
-
Pidi Jeová na orason pa djuda-u fika kalmu i pensa dretu.
-
Djobe tudu kes kuza ki bu pode faze i skodje kal ki é midjór pa bo.
2 KUIDA DI BO I DI BU FAMÍLIA
KUZÊ KI BÍBLIA TA FLA: ‘ Korason di ken ki ten ntendimentu ta ganha konhisimentu, i obidu di algen ki ten sabedoria ta djobe konhisimentu.’ (Provérbios 18:15 ) Tenta sabe tudu informason. Djobe kuzê ki kada algen di bu família meste. Pâpia ku es i obi-s. — Provérbios 20:5.
I si móre un algen ki bu krê txeu? Ka bu ten medu di mostra kuzê ki bu sta xinti. Lenbra ma ti Jizus ‘txora.’ (João 11:35; Eclesiastes 3:4 ) Tanbê é inportanti durmi i diskansa kel ki bu korpu meste. (Eclesiastes 4:6 ) Asi, ta fika más fásil lida ku kalker situason ki pode dizanima-u.
KUZÊ KI BU PODE FAZE:
-
Antis di kontise un disgrasa, kria ábitu di pâpia ku bu família. Asi, óras ki kontise prublémas, es ta xinti más avontádi pa pâpia ku bo.
-
Pâpia ku otus algen ki pasa pa mésmu situason.
3 DJOBE AJUDA KI BU MESTE
KUZÊ KI BÍBLIA TA FLA: ‘Un amigu di verdadi ta ama tudu óra i el é un irmon ki nase pa ténpu di frónta.’ (Provérbios 17:17 ) Bus amigu krê djuda-u, má es pode ka sabe modi ki es ta faze-l. Pur isu, ka bu xinti vergónha di fla-s kuzê ki bu meste di verdadi. (Provérbios 12:25 ) Tanbê, djobe ajuda di Deus na kes algen ki ta ntende Bíblia. Es pode da-u orientason di Bíblia ki ta djuda-u. — Tiago 5:14.
Bu pode atxa ajuda ki bu meste óras ki bu ta sta djuntu ku kes algen ki ten fé na Deus i ki ta kunfia na se promésas. Tanbê, bu ta xinti txeu konsoladu óras ki bu ta djuda kes ki meste konsolu. Pâpia ku es sobri bu fé na Jeová i na se promésas. Mante okupadu na djuda kes ki meste i ka bu fika lonji di kes algen ki ta ama-u i ki ta preokupa ku bo. — Provérbios 18:1; 1 Coríntios 15:58.
KUZÊ KI BU PODE FAZE:
-
Pâpia ku un amigu di kunfiansa i dexa-l djuda-u.
-
Fla klaru kuzê ki bu meste.
