1, 2. Pamodi ki bu ta ama Jeová?

 BU TA ama Deus? Talvês bu ta ama-l tantu txeu ki bu da bu vida pa el. Bu pode xinti ma el é bu midjór Amigu. Má, mésmu antis di bu ama Jeová, dja el ta amaba bo primeru. Bíblia ta fla: ‘Nu ta ama pamodi el ama-nu primeru.’ — 1 João 4:19.

² Pensa na un monti manera ki Jeová mostra se amor pa nos. El da-nu Téra ki é un kaza bunitu i tudu kuza ki nu meste pa nu vive sábi. (Mateus 5:43-48; Apocalipse 4:11 ) El krê pa nu ser se amigu i el ranja manera di nu prende sobri el. Jeová ta pâpia ku nos óras ki nu ta lé Bíblia. Tanbê, el ta obi-nu óras ki nu ta faze orason. (Salmo 65:2 ) El ta orienta-nu i el ta da-nu forsa ku puder di se spritu santu. (Lucas 11:13 ) Tanbê el manda se Fidju ki el krê más txeu pa Téra, pa libra-nu di pekadu ku mórti. — Lé João 3:16; Romanos 5:8.

3. Modi ki nu pode kontinua amigu di Jeová?

 ³ Pensa na un algen ki nhos é txeu amigu. Un algen ki ta sta ku bo na óra sábi ku na óra kasábi. Pa un amizadi sima kel-li fika sénpri fórti, nu ten ki sforsa. Nu meste faze mésmu kuza pa nu kontinua amigu di Jeová, ki é midjór amigu ki nu pode ten. Nos amizadi ku el pode dura pa tudu ténpu. Pur isu, Bíblia ta fla: ‘Nhos kontinua na amor di Deus’. (Judas 21 ) Modi ki nu pode faze kel-li? Bíblia ta responde: ‘Amor di Deus ta siginifika kel-li: pa nu obi ku se mandamentus, pamodi se mandamentus é ka pizadu’. — 1 João 5:3.

4, 5. (a) Kuzê ki siginifika ‘amor di Deus’? (b) Konta modi ki bu kumesa ta xinti amor pa Jeová.

⁴ Di akordu ku Bíblia, kuzê ki siginifika ‘amor di Deus’? É amor ki Deus ten pa nos? Nau. El sta pâpia di nos amor pa el. Bu ta lenbra kantu ki bu kumesa ta xinti amor pa Jeová?

⁵ Bu ta lenbra modi ki bu xinti, kantu bu kumesa ta prende ma Jeová krê pa bu vive pa tudu ténpu, na se mundu novu? Dja bu prende tudu kuza ki el faze pa kel-li pode kontise. Tanbê bu sabe ma Jeová da-nu un prezenti di grandi valor kantu el manda se Fidju pa Téra. (Mateus 20:28; João 8:29; Romanos 5:12, 18 ) Kantu bu ntende ma Jeová ten txeu amor pa bo, kel-la mexe ku bu korason i bu kumesa ta ama-l tanbê. — Lé 1 João 4:9, 10.

6. (a) Modi ki nu ta mostra ma nu ta ama un algen? (b) Kuzê ki bu amor pa Deus pô-u ta faze?

 ⁶ Má, kel amor ki bu xintiba pa Deus éra sô komésu. Pamodi? Pamodi ama un algen é mutu más di ki sô fla “N ta ama-u”. Amor ki nu ten pa un algen, ta pô-nu krê faze kuzas ki el gosta. Di mésmu manera, bu amor pa Jeová ta pô-u vive di un manera ki el ta fika kontenti ku bo. Sima kel amor ba ta kria, talvês bu da bu vida pa Jeová i bu batiza. Kantu bu faze kel-la, bu promete sirbi-l pa tudu ténpu. (Lé Romanos 14:7, 8.) Modi ki bu pode kunpri bu promésa?

7. (a) Si nu ta ama Jeová, kuzê ki nu ta faze? (b) Kal ki é alguns di se mandamentus?

⁷ Nos amor pa Jeová, ta pô-nu ‘obi ku se mandamentus’. Modi ki nu ta faze kel-li? É óras ki nu ta faze kel ki el ta manda-nu. Dja nu prende na Bíblia modi ki Jeová krê pa nu vive. Pur izénplu, el ta fla-nu ma nu ka debe bebe dimás, furta, konta mintira, faze séksu ku algen ki nos é ka kazadu ku el i adora algen ô kalker otu kuza ki é ka el. — 1 Coríntios 5:11; 6:18; 10:14; Efésios 4:28; Colossenses 3:9.

8, 9. Modi ki nu ta sabe kuzê ki Jeová krê óras ki Bíblia ka ten un lei ki ta fla-nu klaru kuzê ki nu debe faze? Da un izénplu.

⁸ Má, pa nu agrada Jeová nu meste faze más di ki sô obi ku se mandamentus. Pur isu, el ka da-nu un lista di leis pa kada situason na nos vida. Nton, óras ki Bíblia ka ten un lei ki ta fla-nu klaru kuzê  ki nu debe faze, modi ki nu pode toma bons disizon? (Efésios 5:17 ) Na Bíblia nu ta atxa prinsípius ô konsedjus. Es é verdadis prinsipal ki ta inxina-nu modi ki Jeová ta pensa. Óras ki nu ta lé Bíblia, nu ta konxe Jeová más midjór. Nu ta ntende modi ki el ta pensa, kuzê ki el gosta i kuzê ki el ka gosta. — Lé Salmo 97:10; Provérbios 6:16-19 ; djobe párti PRENDE MÁS n^u 1.

⁹ Pur izénplu, modi ki nu ta disidi kuzê ki nu debe odja na tilivizon ô na internet? Jeová ka ta fla-nu klaru kuzê ki nu debe faze na kes situason la. Má, el ta da-nu konsedjus ki ta djuda-nu toma bons disizon. Txeu diverson oji sta xeiu di violénsia i séksu. Má na Bíblia, Jeová ta fla-nu ma ‘el ta ôdia kenha ki gosta di violénsia’ i ma el ‘ta ben julga kes ki ta faze konportamentu seksual mariadu’. (Salmo 11:5; Hebreus 13:4 ) Modi ki kes konsedju li ta djuda-nu toma bons disizon? Es ta djuda-nu ivita kuzas ki Jeová ta ôdia ô konportamentu mariadu.

10, 11. Pamodi ki nu debe obi ku Jeová?

¹⁰ Pamodi ki nu ta obi ku Jeová? Nu ka ta obi ku el sô pa el ka kastiga-nu ô pa nu ka pasa pa prublémas. (Gálatas 6:7 ) Má, nu ta obi ku Jeová pamodi nu ta ama-l. Sima un mininu ki krê pa se pai fika kontenti ku el, nos tanbê nu krê pa nos Pai na Séu, fika kontenti ku nos. Ka ten kuza más sábi di ki sabe ma Jeová sta kontenti ku nos! — Salmo 5:12; Provérbios 12:2 ; djobe párti PRENDE MÁS n^u 2.

 ¹¹ Nu ka ta obi ku Jeová sô óras ki é fásil ô óras ki nu ka ten otu soluson. I tanbê nu ka ta skodje ki leis i orientasons di Deus ki nu ta sigi ô kes ki nu ka ta sigi. (Deuteronómio 12:32 ) Má, nu ta obi ku el na tudu kuza. Sima un skritor di Salmu fla: ‘N gosta txeu di bus mandamentu, sin, N ta ama bus mandamentu.’ (Salmo 119:47; Romanos 6:17 ) Nu krê ser sima Nué, ki mostra se amor pa Jeová i el faze tudu kuza ki Jeová manda-l. Bíblia ta fla ma Nué ‘faze sima el mandadu.’ (Génesis 6:22 ) Bu ka ta krê pa Jeová fla mésmu kuza di bo?

12. Modi ki Jeová pode fika kontenti ku nos?

¹² Modi ki Jeová ta xinti óras ki nu ta obi ku el? Nu ta poi se ‘korason fika kontenti’. (Provérbios 11:20; 27:11 ) Pensa na kel-li: nu ta dexa Kriador di Séu ku Téra kontenti óras ki nu ta obi ku el! Má el ka ta obriga ningen faze kel-li. É pur isu, ki el da-nu liberdadi di skodje faze kuzê ki é dretu i kuzê ki é mariadu. Jeová krê pa nos amor pa el djuda-nu toma bons disizon, pa nu pode ten un vida dretu. — Deuteronómio 30:15, 16, 19, 20 ; djobe párti PRENDE MÁS n^u 3.

13, 14. Modi ki nu sabe ma mandamentus di Deus é ka difísil dimás di obidese? Da un izénplu.

¹³ I si nu atxa ma mandamentus di Jeová é difísil di obidese ô ma es pode ka dexa-nu faze kel ki nu gosta? Bíblia ta fla klaru: ‘Se mandamentus é ka pizadu’. (1 João 5:3 ) Na gregu, palavra ‘pizadu’  ta siginifika ‘karga’. Na otus testu di Bíblia, el ta uzadu pa pâpia di régras difísil di sigi ô di algen ki ta tenta kontrola i prujudika otus. (Mateus 23:4; Atos 20:29, 30 ) Nton, mandamentus di Jeová é ka di kes tipu li, es é ka “pizadu” ô difísil di obidese. Jeová sénpri ta pidi-nu kel ki nu ta pode faze.

¹⁴ Pur izénplu, imajina ma bu sta djuda un amigu muda pa un otu kaza. Dja el poi tudu se kuzas na kaxótis. Alguns kaxóti é lébi i faxi di karega, má otus é pizadu dimás ki pa karega-s ten ki ser dôs algen. Bu ta atxa ma bu amigu ta pidiba bo pa bu karega kes kaxa más pizadu bo sô? É klaru ki nau! Pamodi? Pamodi el ka krê prujudika-u. Jeová é kel tipu di amigu li. Nunka el ka ta pidi-nu pa nu faze kuzas ki é difísil dimás. (Deuteronómio 30:11-14 ) Jeová konxe-nu i el ‘sabe dretu di kuzê ki nu fazedu, el ta lenbra ma nos é di téra.’ — Salmo 103:14.

15. Pamodi ki nu pode ten sertéza ma mandamentus di Jeová é pa nos ben?

¹⁵ Muizes flaba israelitas ma mandamentus di Jeová éra pa ‘ses ben pa tudu ténpu’ i si es obiba ku el, es ta ‘kontinuaba bibu’. (Deuteronómio 5:28-33; 6:24 ) Ta kontise mésmu kuza oji. Tudu kel ki Jeová ta pidi-nu pa nu faze é pa nos ben. (Lé Isaías 48:17.) Nos Pai Jeová, sénpri sabe kuzê ki é midjór pa nos. (Romanos 11:33 ) Bíblia ta fla: ‘Deus é amor.’ (1 João 4:8 ) Kel-li ta mostra ma tudu kuza ki Jeová ta fla i ki el ta faze é pamodi el ta ama-nu.

16. Modi ki nu sabe ma nu pode obi ku Deus sikrê nos é ka perfetu i nu sta vive na un mundu mau?

 ¹⁶ É ka tudu óra ki é fásil nu obi ku Deus. Nu sta vive na un mundu mau ki é governadu pa Diabu. El ta tenta poi algen ta faze kuzas mariadu. (1 João 5:19 ) Tanbê, nu ten ki luta kóntra pensamentus i sentimentus mariadu ki pode inpidi-nu di obi ku Deus. (Romanos 7:21-25 ) Má, nos amor pa Jeová ta da-nu forsa pa nu faze kel ki é dretu. El ta odja sforsu ki nu ta faze pa obi ku el i el ta da-nu se spritu santu pa djuda-nu. (1 Samuel 15:22, 23; Atos 5:32 ) Spritu santu ta djuda-nu ten kualidadis ki ta fika más fásil nu obi ku Deus. — Gálatas 5:22, 23.

17, 18. (a) Kuzê ki nu ta ben prende na kel livru li? (b) Kuzê ki nu ta ben prende na kel otu kapítlu?

¹⁷ Na kel livru li, nu ta ben prende modi ki nu pode vive di un manera ki Deus ta fika kontenti ku nos. Tanbê nu ta ben prende modi ki nu pode sigi se konsedjus i konporta sima el ta krê. Ka bu skese ma Jeová nunka ka ta obriga ningen pa obi ku el. Óras ki nu ta skodje obi ku el, nos vida ta fika más midjór i nu ta ten un futuru rei di sábi. Más inportanti inda, óras ki nu ta obi ku Deus, nu sta ta mostra modi ki nu ta ama-l. — Djobe párti PRENDE MÁS n^u 4.

¹⁸ Jeová da-nu konsénsia pa djuda-nu sabe kuzê ki é dretu i kuzê ki é mariadu. Si nu trena nos konsénsia, el pode djuda-nu ‘obi ku se mandamentus’. Má, kuzê ki é konsénsia i modi ki nu pode trena-l? Nu ta ben odja na kel otu kapítlu.