1. Kuzê ki nu ten ki faze pa nu ten sertéza ma nos adorason ta agrada Jeová i pamodi?

 JIZUS fla: ‘Adoradoris verdaderu ta adora Pai ku spritu i verdadi. Pamodi, na verdadi, nha Pai sta ta djobe kes algen li pa adora-l.’ (João 4:23; 6:44 ) Kada un di nos sénpri ten ki ‘djobe dretu kal ki é vontadi di Sinhor.’ (Efésios 5:10 ) É ka tudu óra ki nu ta konsigi faze kel-li. Satanás ta tenta ngana-nu pa nu pode faze kuzas ki Jeová ka gosta. — Apocalipse 12:9.

2. Konta kuzê ki kontise pértu di Monti Sinai.

² Modi ki Satanás ta tenta ngana-nu? Un manera ki el ta tenta ngana-nu, é óras ki el ta konfundi-nu kabésa pa nu ka sabe kal ki é dretu i kal ki é mariadu. Repara kuzê ki kontise ku povu di Israel kantu es staba pértu di Monti Sinai. Muizes dja subiba monti i povu staba ta spera-l. Má kantu es kansa ku spéra es pidi Aron pa faze-s un deus. Aron faze un bixéru di oru. Nton, povu faze un fésta. Es badja na vólta di kel bixéru i es nbaxa na se frenti. Es atxa ma nbaxa na frenti di bixéru éra mésmu kuza ki adora Jeová. Es atxa ma kel-la éra un ‘fésta pa Jeová’, má es ka sta  fazeba kuza dretu. Pa Jeová, kel-la éra sima adora un deus falsu i pur isu txeu di es móre. (Êxodo 32:1-6, 10, 28 ) Kuzê ki nu ta prende ku kel-li? Nu debe toma kuidadu pa nu ka nganadu. Nu ka debe ‘toka na nada inpuru.’ Kel-li krê fla ma nu ka debe ten nada aver ku relijion falsu. Nu debe dexa Jeová inxina-nu kuzê ki é dretu i kuzê ki é mariadu. — Isaías 52:11; Ezequiel 44:23; Gálatas 5:9.

3, 4. Pamodi ki é bon nu sabe modi ki kumesa alguns tipu di féstas ki ta fazedu oji?

³ Kantu Jizus staba na Téra el inxina se apóstlus modi ki es ta adoraba Deus sima el ta krê. Dipôs ki el móre, apóstlus kontinua ta inxina algen sobri Jeová. Má, dipôs ki apóstlus móre, instrutoris falsu kumesa ta inxina kuzas mariadu i ta leba kustumus i komemorasons falsu pa déntu di kongregason. Ti es muda nómi di alguns tipu di féstas pa pode parseba ma es éra dretu pa kristons. (2 Tessalonicenses 2:7, 10; 2 João 6, 7 ) Txeu di kes fésta ô komemorasons bira normal oji. Má inda es sta ligadu ku ideias falsu i ti ku fitisaria ô bruxaria. * — Apocalipse 18:2-4, 23.

⁴ Na mundu interu, féstas i feriadus é txeu inportanti na vida di pesoas. Má sima bu ta ba ta prende sobri kuzê ki Jeová ta pensa sobri kes kuza li, talvês bu ta xinti ma bu meste muda bu manera di pensa sobri alguns komemorason. Pode ser difísil faze kel-li, má  bu pode ten sertéza ma Jeová ta djuda-u. Gósi nu ben odja modi ki kumesa alguns tipu di féstas ki pesoas ta faze. Kel-li ta djuda-nu sabe kuzê ki Jeová ta pensa sobri es.

5. Kuzê ki ta mostra ma Jizus ka nase na dia 25 di dizénbru?

⁵ Na txeu párti di mundu, ta fazedu fésta di Natal na dia 25 di dizénbru, pamodi txeu algen ta atxa ma é na kel dia la ki Jizus nase. Bíblia ka ta fla na ki dia ki Jizus nase. Má el ta fla modi ki ténpu staba kantu Jizus nase. Lúkas skrebe ma kantu Jizus nase na Belen, ‘pastoris [staba] ta vive na kanpu’ ta kuida di ses ribanhu. (Lúkas 2:8-11, BPK ) Na Belen na mês di dizénbru ta txobe, ta faze friu i névi ta kai. Pur isu, pastoris ka ta fikaba na kanpu ku ses ribanhu di noti. Kuzê ki nu ta prende? Kantu ki Jizus nase staba bon ténpu, nton kel-li ta mostra ma el ka nase na mês di dizénbru. Kuzê ki Bíblia ta fla i kuzê ki stória ta konta, ta mostra ma Jizus nase entri kes mês ki gósi nu konxe-s pa setenbru i otubru.

6, 7. (a) Modi ki txeu kustumu di Natal kumesa? (b) Pamodi ki nu debe da prezentis?

⁶ Nton, modi ki Natal kumesa ta fazedu? El ben di féstas di relijion falsu, sima kes fésta di Roma ki txomaba saturnalia. Kes saturnalia éra féstas ki es ta fazeba pa Saturnu, deus di agrikultura. Un ensiklopédia * ta fla: “Txeu kustumu ki ta fazedu na Natal, ben di kes saturnalia, kes fésta ki romanus ta fazeba na mês di dizénbru. Pur izénplu, é di kel fésta li ki ben kel  kustumu di faze un kumida spesial, da prezentis i sende vélas.” Tanbê, éra na dia 25 di dizénbru ki es ta komemoraba nasimentu di deus-sól di Pérsia, ki es ta txomaba di Mitra.

⁷ Má maioria di algen ki ta festeja Natal, nen ka ta pensa ma el é un fésta ki ben di relijion falsu. Kes algen li, ta atxa ma Natal é un momentu pa es sta ku família, kume un bon kumida i da prezentis. É klaru ki nu gosta di sta ku nos família i amigus. I Jeová krê pa  se sérvus ser algen ki gosta di da. Sima 2 Coríntios 9:7 ta fla-nu, ‘Deus gosta di ken ki ta da ku alegria.’ Má, Jeová ka krê pa nu da prezentis sô na ténpu di féstas. Povu di Jeová gosta di da prezentis i di sta djuntu ku ses amigus i família na kalker ténpu di anu, sen spéra ma algen ta da-s algun kuza. Es ta da prezentis pamodi es ta ama kunpanheru. — Lucas 14:12-14.

8. Kes astrólugu da Jizus prezenti lógu dipôs ki el nase? Splika.

⁸ Txeu algen ta fla ma es ta da prezentis na Natal, pamodi três rei sábiu da Jizus prezentis kantu ki el nase na un lugar ki es ta poba animal. É verdadi ki un grupu di ómis bai vizita Jizus i es da-l prezentis. Na kel ténpu, éra normal da prezentis pa un algen inportanti. (1 Reis 10:1, 2, 10, 13 ) Má bu sabia ma Bíblia ta fla ma kes ómi éra astrólugu? Es ta fazeba majia i es ka ta adoraba Jeová. Tanbê es ka bai vizita Jizus kantu el éra un bebé, na kel lugar ki el nase. Es ba djobe-l dipôs, kantu el éra ‘un mininu’ i el ta moraba na un kaza. — Mateus 2:1, 2, 11.

9. Ki dôs fésta di anu Bíblia ta pâpia di el?

⁹ Dia ki un mininu nase é un dia sábi. (Salmo 127:3 ) Má kel-li ka krê fla ma nu debe faze fésta di anu. Pensa na kel-li: Bíblia ta pâpia sô di dôs fésta di anu. Un di kes fésta di anu éra di Faraó di Ijitu i kel otu éra di Eródis Antípas. (Lé Génesis 40:20-22; Marcos 6:21-29.) Má ninhun di es ka ta sirbiba Jeová. Tanbê, Bíblia ka ta fla ma sérvus di Jeová ta fazeba fésta di anu.

10. Kuzê ki kes primeru kriston ta atxaba di faze fésta di anu?

 ¹⁰ Un ensiklopédia * ta fla ma kes primeru kriston ta atxaba ma faze fésta di anu éra un kustumu di relijion falsu. Alguns di kes kustumu ben di kes krénsa falsu. Pur izénplu, gregus di ténpu antigu ta kriditaba ma kada algen tinha un spritu ki ta odjaba el ta nase i ta protejeba el. Tanbê, es ta pensaba ma kel spritu staba ligadu ku un deus ki naseba na mésmu dia ki kel algen. Es ta kriditaba ma kel algen tinha ki fazeba fésta di anu sénpri, pa kel spritu pode kontinuaba ta proteje-l. Tanbê, kes fésta di anu staba ligadu ku astrolojia i síginu.

11. Kuzê ki Jeová ta krê pa nu faze?

¹¹ Txeu algen ta atxa ma dia ki es ta faze anu é un dia spesial, ki es debe tratadu ku amor i karinhu. Má nu pode mostra amor pa nos famílias i amigus duránti anu interu, ka sô na un dia spesial. Jeová ta krê pa nu trata otus ku bondadi i sénpri pa nu da-s kuzas ki nu ten. (Lé Atos 20:35.) Nu ta agradise Jeová tudu dia pa vida ki el da-nu, envês di faze-l sô na kel dia ki nu ta faze anu. — Salmo 8:3, 4; 36:9.

12. Modi ki dia ki algen móre é más midjór di ki dia ki el nase?

¹² Eclesiastes 7:1 ta fla: ‘Un bon nómi é midjór di ki un bon ólhu, i dia di mórti é midjór di ki dia ki algen nase.’ Modi ki dia ki algen móre é más midjór di ki dia ki algen nase? Óras ki algen nase inda el ka faze nada na vida, nen dretu nen mariadu. Má óras ki nu uza nos vida pa sirbi Jeová i nu faze kuzas dretu pa otus, nu sta ta faze ‘un bon  nómi’ i Jeová ka ta skese di nos mésmu dipôs ki nu móre. (Jó 14:14, 15 ) Sérvus di Jeová ka ta faze fésta pa komemora ses aniversáriu i nen di Jizus. Má, úniku komemorason ki Jizus manda-nu pa nu faze é Komemorason di se mórti. — Lucas 22:17-20; Hebreus 1:3, 4.

13, 14. Modi ki kumesa ta fazedu Páskua?

¹³ Txeu algen ta kridita ma óras ki es ta faze fésta di Páskua, es sta ta komemora resureison di Jizus. Má, txeu kustumu di Páskua ki ta fazedu oji, sima kuedju i ovu di Páskua, sta ligadu ku relijion falsu. Dja ten txeu ténpu ki relijions ki ka ta sigi Kristu, ta uza kuedju pa reprizenta kapasidadi di ten txeu fidju. Un disionáriu * ta fla ma kel brinkadera di djobe ovu di Páskua ta ben di ‘un kustumu di fertilidadi.’ Kel-li ta mostra klaru ma Páskua ka ten nada aver ku resureison di Jizus.

¹⁴ Modi ki Jeová ta fika óras ki el ta odja gentis ta mistura kuzas di relijion falsu ku resureison di se Fidju? É klaru ki el ka ta fika kontenti. (2 Coríntios 6:17, 18 ) Na verdadi nunka el ka pidi-nu pa nu komemora resureison di Jizus.

15. Modi ki kumesa ta fazedu fésta di anu novu?

¹⁵ Kada país ten se manera di komemora Anu Novu. Má, na txeu lugar, é normal pesoas faze un fésta grandi na noti di 31 di dizénbru. Na kel fésta, pesoas ta faze txeu konportamentu mariadu i es ta bebe dimás. Kel fésta li tanbê kumesa ta fazedu pamodi relijions falsu. Un ensiklopédia * ta fla: “Kes romanu ta fazeba [fésta di anu novu] pa deus Janu, ki éra deus di portons, di pórtas i di komésus. Mês di janeru resebe  kel nómi li pamodi kel deus Janu. El tinha dôs róstu, un viradu pa frenti i kel otu viradu pa tras.”

16, 17. Kuzê ki nu debe faze si nu sta ta pensa na kaza?

¹⁶ Kazamentu é un momentu filís. Kes kustumu ki ta sigidu na féstas di kazamentu, ta dipende di un país pa kel otu. Má txeu algen ka ta para pa pensa di undi ki kes kustumu ben. Talvês es ka sabe ma alguns di kes kustumu ta ben di relijion falsu. Má un ómi ku mudjer ki ta sirbi Jeová i ki krê kaza, ta faze tudu kel ki es pode pa Jeová fika kontenti ku ses fésta di kazamentu. Es ta faze piskiza pa es pode sabe di undi ki ben alguns kustumu di kazamentu na ses país. Asi es ta konsigi toma bons disizon. — Marcos 10:6-9.

¹⁷ Alguns kustumu ki ta fazedu na kazamentu é óras ki es ta dizeja ‘boa sórti’ pa kes algen ki kaza. (Isaías 65:11 ) Pur izénplu, na alguns lugar pesoas ta bota arôs ô otus kuza na noivu ku noiva. Es ta atxa ma si es faze kel-la, es sta ta djuda kel kazal ten fidju, ser filís, vive pa txeu ténpu i proteje-s di mal. Má kristons, meste toma kuidadu pa es ka faze nada ki sta ligadu ku relijion falsu. — Lé 2 Coríntios 6:14-18.

18. Ki otus konsedju di Bíblia nu debe sigi, óras ki nu ta faze un fésta di kazamentu?

¹⁸ Maridu ku mudjer ki ta sirbi Jeová, ta krê pa ses fésta di kazamentu ser un momentu di txeu alegria i ruspetu. Tanbê es ta krê pa tudu kes algen ki es konvida pa xinti dretu. Pur izénplu, si un di kes algen ki bu konvida krê fla alguns palavra pa tudu algen obi, el ka debe fla nada mariadu, nada ki ten aver ku séksu ô ki  ta mostra falta di ruspetu pa kes noivu i pa otus algen. (Provérbios 26:18, 19; Lucas 6:31; 10:27 ) Tanbê, kes algen ki sta kaza ka debe faze un fésta grandi sô pa es ‘izibi kuzê ki es ten’. (1 João 2:16 ) Si bu sta ta pensa na faze fésta di kazamentu, faze tudu kel ki bu pode pa bu lenbra di kel dia ku txeu alegria. — Djobe párti PRENDE MÁS n^u 28.

19, 20. Modi ki kumesa kel kustumu di faze txin-txin?

¹⁹ Alguns algen ta kustuma faze txin-txin na féstas di kazamentu i na otus momentu. Óras ki un algen ta faze txin-txin, el ta pidi un kuza dretu i kes otu algen ta labanta ses kópu pa konkorda ku el. Má, un kriston debe faze kel-li?

²⁰ Un livru * ta fla ma faze txin-txin, ben di un kustumu antigu di relijion falsu, ki es ta ofereseba sangi ô vinhu pa deuzis. Es ta fazeba el “pa es resebeba kuza ki es pidiba na orason, i dipôs es ta flaba ‘vida kunpridu!’ ô ‘saúdi!’”. Na ténpu antigu, pesoas tinha kustumu di labantaba ses kópu pa pidiba ses deus pa abensua-s. Má, nu ka meste faze kel-la pa Jeová abensua-nu. — João 14:6; 16:23.

21. Ki otus tipu di komemorason un kriston ka debe partisipa?

²¹ Antis di bu disidi si bu ta partisipa ô nau na un fésta ô komemorason, pergunta bu kabésa: ‘Modi ki kel komemorason ta poi algen ta pensa i ta aji?’ Pur  izénplu, na alguns fésta i komemorason, pesoas ta badja di un manera ki ta poi algen ta pensa na séksu, ta bebe dimás i ti ta faze konportamentu seksual mariadu. Tanbê ta pô-nu pensa ma nos país ô nos rasa é midjór di ki otus, i ma é normal ser omoseksual ô lésbika. Si nu partisipa na un di kes kuza li, nu ka sta ta ôdia kes kuza ki Jeová ta ôdia. — Salmo 1:1, 2; 97:10; 119:37.

22. Kuzê ki pode djuda un kriston disidi si el pode partisipa na un komemorason?

²² Kristons meste toma txeu kuidadu pa ka partisipa na ninhun tipu di komemorason ki ta mostra falta di ruspetu pa Jeová. Apóstlu Polu skrebe: ‘Ô nhos kume, ô nhos bebe, ô nhos faze kalker otu kuza, nhos faze tudu kuza pa glória di Deus.’ (1 Coríntios 10:31; djobe párti PRENDE MÁS n^u 29.) É klaru ki é ka tudu tipu di komemorason ki sta ligadu ku konportamentu seksual mariadu, relijion falsu ô ki ta pô-nu xinti ma nos país ô nos rasa é midjór di ki otu. Si un komemorason ka ta bai kóntra ninhun prinsípiu di Bíblia, kada un di nos meste disidi si nu ta partisipa ô nau. Tanbê nu meste pensa na kuzê ki otus ta atxa di nos disizon.

23, 24. Modi ki bu pode splika bus família pamodi ki bu ka ta partisipa más na alguns komemorason?

²³ Talvês bu ka sta partisipa más na ninhun tipu di komemorason ô festa ki ta mostra falta di ruspetu pa Jeová. Pur isu, alguns di bus família ki é ka Tistimunhas di Jeová pode atxa ma bu ka sta gosta di es más i  ma bu ka krê fika djuntu ku es. Talvês es ta atxa ma é sô na kes komemorason ki família ta konsigi fika djuntu. Kuzê ki bu pode faze? Ten txeu manera ki bu pode mostra ma bu ta ama-s i ma es é inportanti pa bo. (Provérbios 11:25; Eclesiastes 3:12, 13 ) Bu pode konvida-s pa es bai pasa ténpu ku bo na otus momentu.

²⁴ Má i si bus família krê sabe pamodi ki bu ka ta partisipa na algun festa ô komemorason? Bu pode faze piskiza na nos publikasons i na nos site jw.org, pa djuda-u sabe modi ki bu ta splika-s. Má ka bu tenta mostra-s ma bo ki sta dretu i ma es ki sta mariadu i nen ka bu tenta obriga-s pensa sima bo. Djuda bu família odja ma bu studa kel asuntu dretu antis di bu toma bu disizon. Fika kalmu i uza palavras ‘sábi, tenpradu ku sal’. — Colossenses 4:6.

25, 26. Modi ki pai ku mai ta djuda ses fidju ama konsedjus di Bíblia?

²⁵ É inportanti nu ntende dretu pamodi ki nu ka ta partisipa na alguns komemorason. (Hebreus 5:14 ) Nu krê pa Jeová fika kontenti ku nos. I si nos é pai ku mai, nu ten ki tra ténpu pa nu djuda nos fidjus ntende i ama konsedjus di Bíblia. Óras ki Jeová bira un algen rial pa es, es tanbê, es ta krê pa Jeová fika kontenti ku es. — Isaías 48:17, 18; 1 Pedro 3:15.

²⁶ Jeová ta fika kontenti óras ki el ta odja-nu ta faze tudu kel ki nu pode pa nu adora-l sima el ta krê. (João 4:23 ) Má tanbê, el ta fika kontenti óras ki nos é onéstu. Má, nu ta konsigi ser onéstu na mundu di oji? É kel-li ki nu sta ben odja na kel otu studu.