1. Pamodi ki Jizus staba preokupadu ku se disiplus, na kel noti antis di el móre?

 NA KEL últimu noti antis di Jizus móre, el staba preokupadu ku se disiplus. Pamodi? Pamodi Jizus ka krê pa es fazeba párti di mundu. (João 15:19 ) Tanbê, el pidi Jeová pa proteje se disiplus. El fla: ‘Es ka ta faze párti di mundu, sima mi N ka ta faze párti di mundu.’ (João 17:15, 16 ) Kuzê ki Jizus krê flaba ku kel-li?

2. Kuzê ki Jizus krê flaba kantu el uza palavra ‘mundu’?

² Kantu Jizus uza palavra ‘mundu’, el staba ta pâpia di pesoas ki ka ta faze vontadi di Deus i ki é governadu pa Satanás. (João 14:30; Efésios 2:2; Tiago 4:4; 1 João 5:19 ) Na kel kapítlu li, nu sta ben odja modi ki nu ta mostra ma nu ‘ka ta faze párti di mundu’. Primeru, nu meste kontinua lial pa Reinu di Deus i ka mete na pulítika nen na géra. Sugundu, nu meste ivita spritu di mundu. Tirseru, nu debe toma kuidadu ku nos manera di bisti i di konpo. Kuartu, nu ka debe pensa sô na dinheru. I kintu, nu debe uza armadura konplétu di Deus. — Djobe párti PRENDE MÁS n^u 16.

3. Modi ki nu sabe ma Jizus ka mete na pulítika?

³ Kantu Jizus staba na Téra, el ta odjaba ma pesoas tinha txeu prubléma i ma ses vida éra konplikadu. El ta preokupaba ku es di verdadi. Má, el tinha ki meteba na pulítika pa el djudaba es? Nau. El sabia ma pesoas mesteba di Reinu ô govérnu di Deus. Éra Jizus ki ta ben sérba Rei di kel Reinu. I se pregason ta papiaba di Reinu más ki kalker otu asuntu. (Daniel 7:13, 14; Lucas 4:43; 17:20, 21 ) Jizus ka mete na pulítika, sénpri el foi lial pa Reinu di Deus. Kantu el staba na frenti di un governanti romanu ki txomaba Pônsiu Pilatus, el fla: ‘Nha Reinu ka ta faze párti di kel mundu li.’ (João 18:36 ) Kes disiplu di Jizus tanbê ka mete na pulítika. Un livru * di stória, ta fla ma kes primeru sigidor di Jizus ‘ka ta setaba ninhun trabadju na pulítika’. Kes ki ta sigi Jizus Kristu oji, ta faze sima kes kriston na ténpu antigu. Es é lial pa Reinu di Deus i es ka ta mete na pulítika. — Mateus 24:14.

4. Modi ki kristons verdaderu ta mostra ma es ta apoia Reinu di Deus?

⁴ Apóstlu Polu fla pa kes kriston skodjedu ku spritu santu: ‘Anos é enbaxadoris na lugar di Kristu’. (2 Coríntios 5:20 ) Kuzê ki é un enbaxador? É un algen ki ta trabadja na un otu país pa reprizenta govérnu di se país. Pur isu, el ka ta mete na pulítika di kel país undi ki el ta trabadja. É kel-li ki ta kontise ku kes kriston skodjedu ku spritu santu, ki ta ba governa ku Jizus Kristu na Séu. Es ta reprizenta govérnu di Deus  i pur isu, es ka ta mete na pulítika. (Filipenses 3:20 ) Envês di mete na pulítika, es ta djuda milhons di algen prende sobri govérnu di Deus. Tanbê es ta resebe ajuda di kes ‘otu ovelha’, ki ta ben vive na Téra pa tudu ténpu. Kes ‘otu ovelha’, tanbê ka ta mete na pulítika. (João 10:16; Mateus 25:31-40 ) Nton, kel-li ta mostra klaru, ma kristons verdaderu ka ta mete na pulítika di es mundu. — Lé Isaías 2:2-4.

5. Pamodi ki kristons ka ta bai pa géra?

⁵ Kristons verdaderu, ta trata ses irmon na fé sima ses família. Es é unidu, ka ta nporta es é di undi ô kal ki é ses kultura. (1 Coríntios 1:10 ) Si nu bai pa géra, nu sta ta luta kóntra nos própi família na fé, ki é nos irmons. I Jizus fla klaru ma nu ten ki ama nos  irmons. (João 13:34, 35; 1 João 3:10-12 ) Tanbê el fla ma nu ten ki ama ti nos inimigu. — Mateus 5:44; 26:52.

6. Modi ki nu ta mostra ma nu ta ruspeta govérnus? Má, kuzê ki nu ka debe skese di el?

⁶ Dja nu odja ma kristons ka ta mete na pulítika. Má simé, es debe ruspeta govérnus. Pur izénplu, nu ta obidese leis i nu ta paga inpostu. Má, nunka nu ka ta skese di ‘da Deus kel ki é di Deus.’ (Marcos 12:17; Romanos 13:1-7; 1 Coríntios 6:19, 20 ) Kel-li krê fla ma nu ta da Deus nos amor, nos obidiénsa i nos adorason. Nu ta prifiri obi ku lei di Jeová sikrê nu perde nos vida. — Lucas 4:8; 10:27 ; lé Atos 5:29; Romanos 14:8.

7, 8. (a) Kuzê ki é spritu di mundu? (b) Modi ki spritu di mundu ta poi algen ta ser?

⁷ Fika siparadu di mundu di Satanás siginifika ma nu ka debe dexa spritu di mundu kontrola-nu. Kuzê ki é spritu di mundu? É manera ki mundu di Satanás ta pensa i ta faze kuzas. Kel spritu li ta kontrola kes algen ki ka ta sirbi Jeová. Má, kristons ten ki luta kóntra spritu di mundu. Polu fla: ‘Nu ka resebe spritu di mundu, má nu resebe spritu ki ta ben di Deus’. — 1 Coríntios 2:12; Efésios 2:2, 3 ; djobe párti PRENDE MÁS n^u 17.

⁸ Spritu di mundu ta poi algen ta bira orgulhozu, rebéldi i ta pensa sô na se kabésa. Pur isu, es ta pensa ma es ka meste obi ku Deus. Satanás krê pa pesoas faze kel ki es krê sen pensa na kuzê ki pode kontise.  Tanbê, el krê pa pesoas kridita ma faze ses dizeju é kuza más inportanti na vida. (1 João 2:16; 1 Timóteo 6:9, 10 ) Diabu krê pa nu pensa sima el. Pur isu, el sta faze di tudu pa el ngana-nu. — João 8:44; Atos 13:10; 1 João 3:8.

9. Modi ki spritu di mundu pode kumesa ta prujudika-nu?

⁹ Spritu di mundu sta na tudu lugar, sima ar ki nu ta respira. Si nu ka luta kóntra kel spritu li, el pode prujudika-nu. (Lé Provérbios 4:23.) Kel-li pode kumesa na kuzas ki ta parse ma ka ten ninhun prubléma. Pur izénplu, nu pode kumesa ta pensa i ta faze kuzas sima kes algen ki ka ta sirbi Jeová. (Provérbios 13:20; 1 Coríntios 15:33 ) Otus kuza ki ta prujudika nos amizadi ku Jeová é pornografia i kes disportu ki ta nvolve konpitison izajeradu ô ki algen ta krê ganha di tudu manera. Tanbê, ten kes algen ki bandona organizason di Jeová i dipôs bira kóntra el, ki ta krê disvia-nu. — Djobe párti PRENDE MÁS n^u 18.

10. Modi ki nu pode luta kóntra spritu di mundu?

¹⁰ Modi ki nu pode luta kóntra spritu di mundu? Nu ten ki ser amigu di Jeová i dexa-l orienta-nu. Nu meste faze orason ta pidi spritu santu i sta sénpri okupadu na kuzas ki ten aver ku Jeová. El é Algen ki ten más puder na Séu ku na Téra. Nu ten sertéza ma Jeová pode djuda-nu luta kóntra spritu di mundu. — 1 João 4:4.

11. Modi ki txeu algen na mundu ta bisti?

¹¹ Otu manera di nu mostra ma nu ka ta faze  párti di mundu, é através di nos manera di bisti i di konpo. Txeu algen ta bisti pa txoma atenson pa ses kabésa, pa poi otus algen ta ten dizeju mariadu, pa mostra ma es é rebéldi ô pa mostra ma es ten txeu dinheru. Otus ka ta liga kuzê ki es ta bisti. Es ta bisti ropa suju i dislexadu. Nu ka pode dexa ninhun di kes kuza li influensia-nu óras ki nu ta skodje nos ropa.

12, 13. Ki testus di Bíblia ta djuda-nu disidi kuzê ki nu ta bisti?

¹² Anos é sérvus di Jeová. Pur isu, nu krê pa nos  ropa sta linpu, ben konpodu, ku bon gostu i di akordu ku lugar ki nu sta bai. Nu ta bisti ‘ku ruspetu i bon juís’ pa nu mostra ma nu ta sirbi Deus. — 1 Timóteo 2:9, 10; Judas 21.

¹³ Óras ki nu ta bisti ku ruspetu nu sta mostra ma nu ta preokupa ku sentimentus i opinion di otus. Tanbê, nos manera di bisti pode poi otus algen ta pensa kuza dretu ô mariadu sobri Jeová i sobri se sérvus. Nu krê faze ‘tudu kuza pa glória di Deus.’ (1 Coríntios 10:31 ) É pur isu ki nu ta preokupa ku nos manera di bisti i konpo. — 1 Coríntios 4:9; 2 Coríntios 6:3, 4; 7:1.

14. Ki perguntas ta djuda-nu skodje ki ropa nu ta uza na runion i na pregason?

¹⁴ Modi ki nu ta bisti óras ki nu ta bai runion ô pregason? Nos ropa ta txoma txeu atenson pa nos? Otus ta fika inkomodadu? Ô nu ta pensa: ‘Ropa é di meu, ningen ka ten nada aver ku kel-li’? (Filipenses 4:5; 1 Pedro 5:6 ) É klaru ki nu krê sta bunitu. Má, kuzê ki ta poi un algen bunitu di verdadi é kes kualidadi ki Jeová krê pa nu ten. I é kel-li ki Jeová ta djobe na nos. Kes kualidadi ta mostra ‘kel algen ki nos é di déntu’. I kel-li ten ‘grandi valor pa Deus.’ — 1 Pedro 3:3, 4.

15. Pamodi ki Jeová ka da-nu un lista di kuzê ki nu debe bisti ô kuzê ki nu ka debe bisti?

¹⁵ Jeová ka da-nu un lista ki ta fla kuzê ki nu debe bisti i kuzê ki nu ka debe bisti. Má, el da-nu prinsípius ki ta djuda-nu toma bons disizon. (Hebreus 5:14 ) Jeová faze kel-li pamodi el krê pa nu mostra  nos amor pa el na disizons ki nu ta toma. Ka ta nporta si kel disizon é grandi ô pikinoti. (Lé Marcos 12:30, 31.) Povu di Jeová na mundu interu, ta bisti di manera diferenti, pamodi es é di kultura diferenti i es ka ten mésmu gostu. Kes diferénsa li é bunitu i ta poi vida más sábi.

16. (a) Kuzê ki Satanás krê pa pesoas pensa sobri dinheru? Má kuzê ki Jizus inxina? (b) Kuzê ki nu debe pergunta nos kabésa?

¹⁶ Satanás krê pa pesoas pensa ma es ta ser filís sô si es ten dinheru i kuzas material. Má, sérvus di  Jeová sabe ma kel-li é ka verdadi. Nu ta kúnfia na kuzê ki Jizus fla: ‘Mésmu óras ki un algen ten txeu kuza, se vida ka ta ben di kes kuza ki el ten.’ (Lucas 12:15 ) Dinheru ka ta poi un algen ser filís. El ka ta pô-nu ten bons amigu, el ka ta da-nu pas di verdadi i nen vida pa tudu ténpu. É klaru ki nu meste dinheru pa nu vive, i nu krê ten un vida sábi. Má, Jizus inxina-nu modi ki nu pode ser filís. Pa nu ser filís, nu meste ser amigu di Deus. Faze vontadi di Deus debe ser kuza más inportanti na nos vida. (Mateus 5:3; 6:22 ) Pur isu, pergunta bu kabésa: ‘N ta pensa na dinheru sima algen di mundu? N ta pensa sô na dinheru i tudu óra N ta pâpia na el?’ — Lucas 6:45; 21:34-36; 2 João 6.

17. Kuzê ki nu ta ganha si nu ka pensa sô na dinheru?

¹⁷ Si nu ka pensa sô na dinheru i nu poi Jeová na primeru lugar, nu ta ten un vida más filís. (Mateus 11:29, 30 ) Nu ta fika kontenti ku kel ki nu ten i nu ta ten un vida más trankilu. (Mateus 6:31, 32; Romanos 15:13 ) Tanbê nu ka ta fika preokupadu dimás ku kuzas material. (Lé 1 Timóteo 6:9, 10.) I nu ta odja, ma óras ki nu ta djuda otus nu ta xinti más filís. (Atos 20:35 ) Nu ta ten más ténpu pa nu sta djuntu ku kes algen ki nu ta ama. I ti nu ta durmi más dretu. — Eclesiastes 5:12.

18. Kuzê ki Satanás krê faze?

¹⁸ Satanás krê kaba ku nos amizadi ku Jeová. Pur isu, nu ten ki faze di tudu pa nu proteje kel amizadi.  Nu ten ki luta kóntra kes ‘forsa spritual di mal’, ô kóntra Satanás ku se dimónis. (Efésios 6:12 ) Es ka krê pa nu ser filís i nen pa nu vive pa tudu ténpu. (1 Pedro 5:8) Nos inimigu ten txeu puder, má nu pode ganha-s géra ku ajuda di Jeová!

19. Di akordu ku Efésios 6:14-18, kal ki é kes pésa di armadura ki un kriston debe ten?

¹⁹ Kes trópa na ténpu antigu, ta uzaba skudu, kapaseti i otus kuza ki ta protejeba es na géra. Kel-la éra ses armadura. Nos tanbê, nu ten ki uza ‘armadura konplétu di Deus’ pa nu pode proteje. (Efésios 6:13 ) Bíblia ta pâpia di kel armadura li na Efésios 6:14-18. El ta fla: ‘Nhos mante firmi, ta uza sintu di verdadi ben pertadu, ta bisti koleti di justisa i ku pé kalsadu sénpri prontu pa spadja notísias sábi di pas. Alén di tudu kel-li, nhos uza kel skudu grandi di fé, pa nhos pode paga tudu flexa di lumi di kel Malvadu. Tanbê nhos seta kapaseti di salvason i spada di spritu ki é palavra di Deus, timenti nhos ta faze tudu tipu di orason i pididu, na tudu okazion, nhos kontinua ta ora na spritu.’

20. Kuzê ki nu ten ki faze pa kel ‘armadura’ proteje-nu?

²⁰ Si un trópa skese di uza un pésa di kel armadura, el ta dexa di proteje un párti di se korpu. I é la ki inimigu ta bai ataka. Si nu krê pa kel ‘armadura’ proteje-nu, nu ka debe skese di uza ninhun di kes pésa. Nu ten ki uza kel armadura tudu óra i kuida di el dretu. Nos luta kóntra Satanás ku se dimónis ta kaba, óras ki es ben tradu di Téra i kel mundu mau li distruídu. (Apocalipse 12:17; 20:1-3 ) Pur isu, si nu  sta ta luta kóntra dizejus mariadu ô algun tipu di frakéza, nu ka debe dizisti! — 1 Coríntios 9:27.

21. Modi ki nu pode ganha Diabu?

²¹ Nos sô nu ka ta pode ganha Diabu. Má, sô nu ta ganha-l ku ajuda di Jeová! Pa kel-li kontise, nu meste ora pa Jeová, studa Bíblia i sta sénpri djuntu ku nos irmons. (Hebreus 10:24, 25 ) Kes kuza li ta djuda-nu ser lial pa Deus i sta priparadu pa difende nos fé.

22, 23. (a) Kuzê ki nu ten ki faze pa nu sta sénpri priparadu pa difende nos fé? (b) Kuzê ki nu sta ben odja na kel otu kapítlu?

²² Nu ten ki sta priparadu pa nu difende nos fé na tudu situason. (João 15:19 ) Pamodi ten alguns situason, ki Tistimunhas di Jeová ta faze kuzas di manera diferenti di kuazi tudu algen. Pur isu, pergunta bu kabésa: ‘N ta ntende pamodi ki Tistimunhas di Jeová ta aji di kel manera li? N ten sertéza ma kel ki Bíblia i skravu fiel ta fla sta sértu? (Mateus 24:45; João 17:17 ) N ten orgulhu di ser Tistimunha di Jeová? (Salmo 34:2; Mateus 10:32, 33 ) N ta konsigi splika otus algen kes kuza ki N ta kridita na es?’ — Lé 1 Pedro 3:15.

²³ Na txeu situason, nu sabe klaru kuzê ki nu debe faze, pa nu mante siparadu di mundu. Má alvês, nu ka sabe dretu kuzê ki nu ta faze. Satanás ta uza txeu kuza pa ngana-nu. Un di kes kuza é diverson. Na kel otu kapítlu, nu ta ben odja modi ki nu ta skodje diverson ki é dretu.