1-3. (a) Kuzê ki txeu algen ta atxa di ses trabadju? (b) Ki perguntas nu ta ben responde na es kapítlu?

 PESOAS na mundu interu ta trabadja duru pa sustenta ses kabésa i ses família. Txeu algen ka gosta di ses trabadju i alguns ka gosta di trabadja tudu dia. É si ki bu ta xinti? Kuzê ki bu pode faze pa bu gosta más txeu di bu trabadju?

² Jeová ta fla-nu: ‘Tudu algen debe kume i bebe, i goza di rezultadus di tudu trabadju duru ki el faze. Kel-li é prezenti di Deus.’ (Eclesiastes 3:13) Jeová faze-nu ku nisisidadi i dizeju di trabadja. El krê pa nu gosta di kuza ki nu ta faze. — Lé Eclesiastes 2:24; 5:18.

³ Nton, kuzê ki pode djuda-nu gosta di nos trabadju? Ki tipu di trabadju kristons ka debe faze? Modi ki nu pode poi trabadju i adorason pa Jeová kada un na se lugar? I kal ki é trabadju más inportanti ki nu pode faze?

4, 5. Kuzê ki Jeová ta atxa di trabadju?

⁴ Jeová gosta di trabadja. Génesis 1:1 ta fla: ‘Na  komésu Deus faze séu ku Téra.’ Dipôs ki Deus kaba di faze Téra ku tudu otus kuza, el fla ma tudu kuza staba ‘rei di bon.’ (Génesis 1:31 ) Nos Kriador fika kontenti ku trabadju ki el faze. — 1 Timóteo 1:11.

⁵ Jeová nunka ka para di trabadja. Jizus fla: ‘Nha Pai ti inda sta ta trabadja.’ (João 5:17 ) É verdadi ki nu ka sabe tudu kuza ki Jeová sta ta faze, má nu sabe alguns di kes kuza. El sta ta skodje kes algen ki sta ba governa ku se Fidju Jizus, na Séu. (2 Coríntios 5:17 ) Tanbê Jeová sta sénpri ta orienta-nu i ta kuida di nos. Pur izénplu, através di trabadju di pregason, milhons di algen sta ta prende sobri Jeová i es sta ta ten speransa di vive pa tudu ténpu na paraízu na Téra. — João 6:44; Romanos 6:23.

6, 7. Ki tipu di trabadjador Jizus é?

⁶ Jizus gosta di trabadja sima se Pai. Antis di el ben pa Téra, el éra ‘un bon trabadjador’ djuntu ku Deus. El partisipa na kriason di tudu kuza na Séu ku na Téra. (Provérbios 8:22-31; Colossenses 1:15-17 ) Kantu Jizus staba na Téra el kontinua ta trabadja duru. Kantu el éra jóven, el prende ser un bon karpinteru i talvês el ta fazeba kazas i mobílias. El ta trabadjaba dretu i el éra konxedu pa se bon trabadju. — Marcos 6:3.

⁷ Má, trabadju más inportanti ki el faze kantu el staba na Téra, éra prega notísias sábi i inxina pesoas sobri Jeová. Se pregason dura três anu i meiu. El trabadja duru. El ta kumesaba sédu palmanhan ti noti. (Lucas 21:37, 38; João 3:2 ) El anda txeu  kilómetru na stradas xeiu di téra, ta prega pa tudu algen ki el ta atxaba. — Lucas 8:1.

8, 9. Pamodi ki Jizus gostaba di se trabadju?

⁸ Jizus ta atxaba ma faze vontadi di Deus éra sima kumida. Kel trabadju ta daba el alegria i forsa. Alvês el ta trabadjaba txeu, ki nen el ka ta atxaba ténpu pa el kumeba. (João 4:31-38) El ta pruvetaba tudu oportunidadi pa inxinaba otus algen sobri se Pai. É pur isu ki el fla Jeová: ‘N glorifika-u na Téra, i N finda kel óbra ki bu da-m pa N faze.’ — João 17:4.

⁹ Dja nu odja ma Jeová ku Jizus ta trabadja duru i es gosta di ses trabadju. Nu krê ‘imita Deus’ i nu krê ‘sigi pasus di [Jizus] di manera fiel.’ (Efésios 5:1; 1 Pedro 2:21 ) É pur isu ki nu ta sforsa pa nu trabadja duru i pa nu da nos midjór na kalker kuza ki nu ta faze.

10, 11. Kuzê ki pode djuda-nu muda nos manera di pensa sobri nos trabadju?

¹⁰ Nos é sérvus di Jeová, pur isu nu ta trabadja duru pa sustenta nos kabésa i nos família. Nu krê gosta di nos trabadju. Má kel-li pode ser difísil. Nton, kuzê ki nu pode faze si nu ka gosta di nos trabadju?

¹¹ Pensa dretu di bu trabadju. Talvês nu ka ta pode muda pa nu ba trabadja na otu lugar ô muda ténpu ki nu ta pasa na trabadju. Má, nu pode muda nos manera di pensa. Kuzê ki pode djuda-nu? Nu meste ntende kuzê ki Jeová ta spéra di nos. Pur  izénplu, Jeová ta spéra ma xéfis di família ta faze ses midjór pa kuida di nisisidadis di se família. Bíblia ta fla ma ken ki ka ta kuida di se família ‘é piór di ki algen sen fé.’ (1 Timóteo 5:8) Si bo é xéfi di família, bu ta trabadja duru pa bu kuida di bu família. Talvês bu ka gosta di tipu di trabadju ki bu ta faze. Má lenbra ma é ku kel trabadju ki bu sta ta sustenta bu família. I kel-la ta poi Jeová kontenti.

12. Pamodi ki é bon bu ser trabadjador i onéstu?

¹² Ser trabadjador i onéstu. Si bu faze si, é más faxi bu gosta di bu trabadju. (Provérbios 12:24; 22:29 ) Tudu patron gosta di enpregadus ki é onéstu, pamodi es ka ta furta dinheru, material di trabadju i nen ses ténpu. (Efésios 4:28 ) I más inportanti inda, Jeová ta odja ma bo é un bon trabadjador i onéstu. Bu pode ten un ‘bon konsénsia’ pamodi bu sabe ma bu sta ta dexa kel Deus ki bu ta ama kontenti. — Hebreus 13:18; Colossenses 3:22-24.

13. Si nos é onéstu na trabadju, kuzê más ki pode kontise?

¹³ Lenbra ma kel ki bu ta faze na trabadju pode da Jeová onra. Kel-li é un otu motivu ki nu ten pa nu gosta di nos trabadju. (Tito 2:9, 10 ) Kel-li pode poi ti un di bus koléga di trabadju ta krê studa Bíblia pamodi bu bon izénplu. — Lé Provérbios 27:11; 1 Pedro 2:12.

14-16. Óras ki nu ta djobe trabadju, ki kuidadu nu debe ten?

¹⁴ Bíblia ka ten un lista di trabadju ki un kriston debe ô ka debe skodje. Má el ten prinsípius ki pode  djuda-nu toma bons disizon sobri trabadju. (Provérbios 2:6 ) Óras ki nu ta uza prinsípius di Bíblia, nu pode faze kes pergunta ki sta na kes otu parágrafu.

¹⁵ Na kel trabadju, N ta faze algun kuza ki Jeová ta fla ma é mariadu? Dja nu prende sobri alguns kuza ki Jeová ta ôdia, sima furta i konta mintira. (Êxodo 20:4; Atos 15:29; Efésios 4:28; Apocalipse 21:8 ) Pur isu, nu ten ki toma kuidadu pa nu  ka seta un trabadju ki é kóntra leis di Jeová. — Lé 1 João 5:3.

¹⁶ Kel trabadju ta apoia ô ta insentiva algun kuza ki Jeová ta kondena? Pur izénplu, imajina ma parse un trabadju pa faze un igreja. É ka mariadu trabadja na konstruson. Má, nu sabe kuzê ki Jeová ta pensa di adorason falsu. É klaru ki nu ka sta ta djuda na da misa ô na faze otus kuza ki es ta faze na kel igreja. Má trabadja na konstruson di un igreja é ka mésmu ki apoia un kuza ki Jeová ta ôdia? — Apocalipse 18:4.

17. Kuzê ki pode djuda-nu toma disizons ki ta dexa Jeová kontenti?

¹⁷ Óras ki nu ta uza kes prinsípiu di Bíblia, nu ta ser kel tipu di algen ki sta na Hebreus 5:14, ‘kes ki ta trena ses kapasidadi di pensa óras ki es ta uza-l pa sabe kuzê ki é dretu i kuzê ki é mariadu.’ Pergunta bu kabésa: ‘Si N seta kel trabadju li, N ta tropesa otus? Kel trabadju ta pô-m ta fika lonji di kel algen ki N sta kazadu ku el i di nhas fidju ô muda pa otu país? Modi ki nha família ta fikaba?’

18. Pamodi ki pode ser difísil poi Jeová na primeru lugar?

¹⁸ Pode ser difísil poi nos adorason pa Jeová na primeru lugar, na es ‘ténpu konplikadu, difísil di aguenta.’ (2 Timóteo 3:1 ) Pode ser txeu difísil atxa un trabadju i kontinua na el. Nu meste kuida di nos família, má nu sabe ma nos adorason pa Jeová debe sta na primeru lugar. Nu ka debe dexa kuzas material bira kuza más inportanti na nos vida.  (1 Timóteo 6:9, 10 ) Nton, modi ki nu pode npenha pa ‘kuzê ki é más inportanti’ i omésmu ténpu sustenta nos família? — Filipenses 1:10.

19. Modi ki kúnfia na Jeová ta djuda-nu ka fika preokupadu dimás ku trabadju?

¹⁹ Poi tudu bu kunfiansa na Jeová. (Lé Provérbios 3:5, 6.) Nu sabe ma Deus sabe tudu kel ki nu meste i el ta kuida di nos. (Salmo 37:25; 1 Pedro 5:7 ) Bíblia ta fla: ‘Nhos manera di vive debe sta livri di amor pa dinheru, má nhos fika kontenti ku kuzas ki nhos ten. Pamodi [Deus] fla: “Nunka N ka ta dexa-u i nunka N ka ta bandona-u.”’ (Hebreus 13:5 ) Jeová ka krê pa nu fika preokupadu dimás sobri modi ki nu ta sustenta nos família. Dja el mostra txeu bês ma el pode kuida di se povu. (Mateus 6:25-32 ) Ka ta nporta ki tipu di trabadju nu ten, nu kontinua ta studa Bíblia, ta prega notísias sábi i ta sisti nos runions. — Mateus 24:14; Hebreus 10:24, 25.

20. Modi ki nu pode mante un vida sinplis?

²⁰ Mante konsentradu. (Lé Mateus 6:22, 23.) Kel-li siginifika ma nu debe ten un vida sinplis, asi nu ta konsigi poi nos sirvisu pa Jeová na primeru lugar. Nu sabe ma ka bale péna dexa dinheru, un vida sábi ô kes últimu aparélhu iletróniku bira más inportanti di ki nos amizadi ku Deus. Nton, kuzê ki ta djuda-nu poi kel ki é más inportanti na primeru lugar? Sforsa pa bu ka faze dívidas. Si bu tene dívida, faze di tudu pa el fika más poku ô pa bu paga-l. Si nu ka toma kuidadu, nu pode gasta txeu ténpu i  forsa ku kes kuza material i nu ta fika ku poku ténpu pa faze orason, studa ô prega. Envês di nu dexa kuzas material konplika nos vida, nu krê sta kontenti ku kes kuza ki nu meste di verdadi, sima ‘kumida i ropa’. (1 Timóteo 6:8 ) Tanbê, é bon nu djobe nos situason sénpri pa nu odja modi ki nu pode sirbi Jeová más midjór.

21. Pamodi ki nu meste disidi kuzê ki é más inportanti na nos vida?

²¹ Poi kes kuza más inportanti na primeru lugar. Nu meste uza nos ténpu, forsa i kuzas di valor  ki nu ten ku sabedoria. Si nu ka toma kuidadu, kes kuza ki é ménus inportanti, sima skóla ô dinheru, pode toma-nu ténpu ki nu podia uzaba na nos adorason pa Jeová. Jizus fla: ‘Nhos kontinua ta buska Reinu primeru’. (Mateus 6:33 ) Disizons ki nu ta toma, nos ábitu, kuzas ki nu ta faze na dia-dia i nos obijetivus, ta mostra kuzê ki sta na primeru lugar na nos korason.

22, 23. (a) Kal ki é trabadju más inportanti ki nu pode faze? (b) Kuzê ki ta djuda-nu gosta di nos trabadju?

²² Trabadju más inportanti ki nu pode faze é sirbi Jeová i prega notísias sábi. (Mateus 24:14; 28:19, 20 ) Sima Jizus, nu krê faze tudu kel ki nu pode na es trabadju. Alguns muda pa undi tinha más nisisidadi di algen pa prega. Otus sta ta prende un novu língua pa es prega pa kes algen ki ta pâpia kel língua. Pâpia ku kes algen ki dja faze kes kuza li. Es ta konta-u modi ki ses vida fika más filís i ku obijetivu. — Lé Provérbios 10:22.

²³ Oji, monti di nos ten ki trabadja txeu óra ô ti ranja más di ki un trabadju pa nu pode kuida di nisisidadis di nos família. Jeová sabe kel-li i el ta da valor pa tudu kuza ki nu ta faze pa kuida di nos família. Nu krê kontinua ta imita Jeová i Jizus na ser trabadjador, ka ta nporta ki tipu di trabadju ki nu ta faze. I ka nu skese ma trabadju más inportanti é prega notísia sábi di Reinu di Deus. Kel-li ta da-nu alegria di verdadi.