Pa tudu kes ki ta ama Jeová i ki ta ama Bíblia, ki é se Palavra:

Jizus fla: ‘Nhos ta konxe verdadi i verdadi ta liberta nhos.’ (João 8:32 ) Pensa modi ki bu xinti kantu bu prende verdadi di Bíblia pa primeru bês! Nos tudu nu fika kontenti di sabe ma nu pode prende verdadi, sikrê na un mundu xeiu di mintira. — 2 Timóteo 3:1.

Jeová krê pa nu konxe verdadi. I amor ki nu ten pa pesoas ta pô-nu pâpia ku es sobri Jeová. Má, sirbi Deus é mutu más ki kel-li. Nu meste faze nos midjór pa nu vive sima un kriston, pamodi nu ta ruspeta prinsípius di Deus di korason. Jizus splika un manera inportanti di nu prova ma nu ta ama Deus. El fla: ‘Si nhos obi ku nhas mandamentu, nhos ta kontinua na nha amor, sima mi N ta obi ku mandamentus di nha Pai i N ta kontinua na se amor.’ — João 15:10.

Jizus gosta txeu di se Pai i el ta faze tudu kel ki se Pai ta manda-l faze. Si nu imita Jizus na nos manera di vive, Jeová ta ama-nu i nu ta ser filís di verdadi. Sima Jizus fla, ‘si nhos sabe kes kuza li, nhos é filís si nhos faze-s.’ — João 13:17.

Nu ta spéra ma kel livru li ta djuda-u vive di akordu ku verdadis di Bíblia i bira amigu di Deus. Nu ta ora pa bu amor pa Deus fika más fórti i pa bu kontinua ‘na amor di Deus ku xintidu na vida pa tudu ténpu.’ — Judas 21.