1, 2. (a) Kuzê ki kes algen kazadu di novu ta spéra? (b) Ki perguntas nu ta ben responde na es kapítlu?

 IMAJINA un noivu ku un noiva na dia di ses kazamentu. Es sta txeu kontenti pamodi es sta ba vive djuntu. Es tene txeu planu pa futuru. Es ta spéra ma ses kazamentu ta dura i ma es ta ser filís.

² Má, txeu kazamentu ki ta kumesa dretu ka ta kontinua si. Pa un kazamentu dura i pa maridu ku mudjer ser filís, es meste sigi orientason di Deus. Nu ben odja respósta ki Bíblia ta da pa alguns pergunta: Kal ki é alguns vantaji di sta kazadu? Si bu krê kaza, modi ki bu pode skodje dretu un algen pa bu kaza ku el? Modi ki bu pode ser un bon maridu ô un bon mudjer? I kuzê ki pode djuda un kazamentu dura? — Lé Provérbios 3:5, 6.

3. Un algen meste kaza pa el ser filís? Splika.

³ Alguns ta atxa ma si un algen ka kaza, el ka ta pode ser filís. Má kel-li é ka verdadi. Jizus fla ma pode ser bon sta solteru. (Mateus 19:11, 12 )  I apóstlu Polu fla ma fika solteru ten ses vantaji. (1 Coríntios 7:32-38 ) É bo ki ta disidi si bu ta kaza ô nau. Ka bu dexa bus amigu ô famílias pô-u ta pensa ma bo é obrigadu kaza. Nen ka bu kaza sô pamodi kultura di lugar ki bu ta vive.

4. Kal ki é alguns vantaji di un bon kazamentu?

⁴ Bíblia ta fla tanbê ma kazamentu é un prezenti di Deus i el ten se vantaji. Jeová fla sobri Adon: ‘N ta faze-l un ajudanti, pa konpleta-l.’ (Génesis 2:18 ) Kantu Jeová faze Eva pa ser mudjer di Adon, es bira primeru família na Téra. Tanbê si un ómi ku un mudjer ten fidju, kazamentu ta djuda-s ten un bon anbienti pa kria ses fidju. Má obijetivu di kazamentu é ka sô pa ten fidju. — Salmo 127:3; Efésios 6:1-4.

5, 6. Modi ki kazamentu pode ser sima ‘un kórda di três fiu’?

⁵ Rei Salumon skrebe: ‘Dôs é midjór di ki un, pamodi es ten un bon rekonpénsa pa ses trabadju duru. Pamodi si un di es kai, kel otu ta djuda se kunpanheru labanta. Má, kuzê ki ta kontise ku kel ki kai i ki ka ten ningen pa djuda-l labanta? I un kórda di três fiu ka ta rabentadu faxi.’ — Eclesiastes 4:9-12.

⁶ Un bon kazamentu é union di dôs algen ki é txeu amigu, ki ta djuda, ta konsola i ta proteje kunpanheru. Amor pode poi un kazamentu bira fórti, má el ta bira más fórti inda óras ki maridu ku mudjer ta adora Jeová djuntu. Asi, ses kazamentu pode fika sima ‘un kórda di três fiu’ ki ta sta ben  transadu na kunpanheru. Un kórda sima kel-li é mutu más fórti di ki un kórda di dôs fiu. Un kazamentu ta bira fórti, óras ki Jeová ta faze párti di el.

7, 8. Ki konsedju apóstlu Polu da sobri kazamentu?

⁷ Dipôs ki ómi ku mudjer sta kazadu, es pode faze séksu. Asi es ta satisfaze nisisidadis di kunpanheru. (Provérbios 5:18 ) Má, si un algen kaza sô pamodi kes dizeju li, el pode ka skodje dretu algen pa el kaza ku el. É pur isu ki Polu fla ma un algen debe kaza dipôs di ‘flor di juventudi’, pamodi é na kes ténpu la, ki dizejus di faze séksu ta sta más fórti. (1 Coríntios 7:36 ) É midjór spéra pa kaza ti ki kes dizeju fika más kontroladu. Asi, kel algen ta konsigi pensa di manera klaru i el ta pode skodje dretu un algen pa el kaza ku el. — 1 Coríntios 7:9; Tiago 1:15.

⁸ Si bu sta pensa na kaza, é bon bu sabe ma tudu kazamentu ten ses prubléma. Polu fla ma kes ki ta kaza ‘ta ten difikuldadis na vida.’ (1 Coríntios 7:28 ) Ti na kes midjór kazamentu, ten óras ki es ta pasa pa prublémas difísil. Pur isu, si bu disidi kaza, skodje dretu ken ki bu krê pa ser bu maridu ô bu mudjer.

9, 10. Kuzê ki pode kontise si nu kaza ku un algen ki ka ta adora Jeová?

⁹ Antis di bu skodje bu maridu ô bu mudjer, é inportanti bu lenbra di kel konsedju li: ‘Ka nhos faze union dizigual ku diskrentis.’ (2 Coríntios 6:14 ) Kel  union é mésmu kuza ki un kanga. Kanga éra un pésa di madera ki es ta poba na piskós di dôs animal pa trabadjaba djuntu na plantason. Si kes dôs animal ka tinha mésmu tamanhu ô mésmu forsa, es ka ta poba es ta trabadjaba djuntu. Kel-li é ka éra bon pa ninhun di kes animal pamodi es ta sufreba. Di mésmu manera, si un algen ki ta sirbi Jeová kaza ku un otu algen ki ka ta sirbi Jeová, es ta ten txeu prubléma. Pur isu, Bíblia ta konsedja-nu pa nu kaza ‘sô na Sinhor.’ — 1 Coríntios 7:39.

¹⁰ Alvês, alguns kriston ta atxa ma ta sérba midjór es kaza ku un algen ki ka ta adora Jeová, di ki fika es sô. Má óras ki un algen ka ta sigi konsedju di Bíblia, rezultadu txeu bês é dór ku tristéza. Pa nos ki ta adora Jeová, sirbi-l é kuza más inportanti na nos vida. Modi ki bu ta xintiba si bu ka ta pode pâpia ku kel algen ki bu sta kazadu ku el, sobri kel kuza ki é más inportanti na bu vida? Txeu kriston disidi fika solteru envês di kaza ku un algen ki ka ta ama Jeová i ki ka ta sirbi-l. — Lé Salmo 32:8.

11. Modi ki bu pode skodje dretu un algen ki bu krê kaza ku el?

¹¹ Má é ka sô pamodi un algen ta sirbi Jeová ki el ta ser un bon maridu ô bon mudjer. Si bu sta pensa na kaza, djobe un algen ki nhos ta da dretu i ki bu gosta txeu di el. Spéra ti ki bu atxa un algen ki ta poi Reinu na primeru lugar i ki nhos krê faze mésmu kuza na vida. Tra ténpu pa bu lé i pensa na konsedjus ki skravu fiel i prudenti ta da na nos publikasons sobri kazamentu. — Lé Salmo 119:105.

12. Kuzê ki nu ta prende ku izénplu di Abraon kantu el skodje mudjer pa se fidju?

 ¹² Na alguns kultura é normal pai ku mai skodje kenha ki ses fidju ta kaza ku el. Na kes situason li, pesoas ta atxa ma mai ku pai sabe kuzê ki é midjór pa ses fidju. Kel kustumu li, éra normal na ténpu ki Bíblia skrebedu. Si bu família krê sigi kel kustumu li, Bíblia pode djuda-s sabe ki tipu di algen ki es debe skodje. Pur izénplu, Abraon skodje un mudjer pa se fidju Izaki. Má kuza más inportanti pa el, é ka éra dinheru ô puzison sosial, má kel mudjer tinha  ki ta amaba Jeová. — Génesis 24:3, 67; djobe párti PRENDE MÁS n^u 25.

13-15. (a) Modi ki un ómi pode pripara pa el ser un bon maridu? (b) Modi ki un mudjer pode pripara pa el kuida di responsabilidadi ki el ten na kazamentu?

¹³ Si bu sta pensa na kaza, djobe dretu si bu sta priparadu. Talvês bu ta atxa ma bu sta. Má nu ben odja modi ki algen ta pripara di verdadi pa kazamentu. Bu pode fika spantadu ku respósta.

¹⁴ Bíblia ta mostra ma ómi ku mudjer ten responsabilidadi diferenti na kazamentu. Nton, kel-li siginifika ma un ómi ku un mudjer ta sta priparadu pa es kaza, óras ki es sta priparadu pa kuida di ses responsabilidadi. Si un ómi sta pensa na kaza el debe pergunta se kabésa si el sta priparadu pa el ser xéfi di família. Jeová ta spéra ma maridu ta kuida di tudu nisisidadi di se mudjer i di ses fidju. El debe sustenta-s i el debe preokupa ku ses sentimentu. Más inportanti inda, el debe djuda-s ten un amizadi fórti ku Jeová. Bíblia ta fla ma un ómi ki ka ta kuida di se família é ‘piór di ki algen sen fé.’ (1 Timóteo 5:8 ) Si bo é un ómi i bu sta ta pensa na kaza, repara kuzê ki Bíblia ta fla: ‘Pripara bu trabadju la fóra i dexa tudu prontu na kanpu. Dipôs faze bu própi kaza.’ Kel-li krê fla ma antis di bu kaza, bu debe djobe dretu si bu ta konsigi ser kel tipu di maridu ki Jeová krê pa bu ser. — Provérbios 24:27.

¹⁵ Un mudjer ki sta pensa na kaza, debe pergunta se kabésa si el sta priparadu pa kuida di  responsabilidadi ki el ta ten na kazamentu i talvês di ser mai. Bíblia ta pâpia di alguns kuza ki un bon mudjer ta faze pa kuida di se maridu i di se fidjus. (Provérbios 31:10-31 ) Oji txeu ómi ku mudjer ta pensa sô na kuzê ki ses kunpanheru pode faze pa es. Má Jeová krê pa nu pensa na kuzas ki nu pode faze pa nos maridu ô nos mudjer.

16, 17. Si bu sta pensa na kaza, kuzê ki bu debe pensa na el?

¹⁶ Antis di bu kaza, pensa na kuzê ki Jeová ta fla sobri maridu ku mudjer. Pur izénplu, ómi é xéfi di família, má el ka ten direitu di uza palavras ki ta ofende i nen di sota se mudjer. Un bon xéfi di família ta imita Jizus, ki sénpri ta trata tudu kes ki sta dibaxu di se autoridadi ku amor i bondadi. (Efésios 5:23 ) Mudjer tanbê, meste pensa kuzê ki sta nvolvidu na apoia disizons di se maridu i kolabora ku el. (Romanos 7:2 ) El meste sabe si el ta konsigi ser filís mésmu ki el ten ki obi ku un ómi inperfetu. Si el odja ma el ka ta konsigi, talvês el ta disidi ma é midjór fika soltera pa más algun ténpu.

¹⁷ Un algen ki sta kazadu debe sta más preokupadu ku filisidadi di se maridu ô di se mudjer di ki se kabésa. (Lé Filipenses 2:4.) Apóstlu Polu skrebe: ‘Tudu nhos, nhos ama nhos mudjer sima nhos ta ama nhos kabésa; i tanbê mudjer debe ruspeta se maridu di korason.’ (Efésios 5:21-33 ) Tantu ómi ku mudjer meste xinti amor i ruspetu di kunpanheru. Má pa kazamentu da sértu, ómi meste xinti klaru ma se mudjer ta ruspeta-l i mudjer meste xinti klaru ma se maridu ta ama-l.

18. Pamodi ki un ómi ku un mudjer debe toma txeu kuidadu na namoru?

 ¹⁸ Namoru debe ser un ténpu sábi ki un ómi ku un mudjer pode konxe kunpanheru más dretu. Tanbê é un ténpu ki es debe ser sinseru ku kunpanheru pa es odja si es krê pasa réstu di ses vida djuntu. Duránti namoru, es pode prende pâpia ku kunpanheru i konxe kunpanheru dretu. Sima namoru ta ba ta fika más asériu, é normal es xinti vontadi di sta djuntu. Má, es debe toma txeu kuidadu  pa es ka faze nada ki ten aver ku konportamentu seksual mariadu. Amor di verdadi ta djuda un ómi ku un mudjer kontrola ses kabésa. I ta djuda-s ka faze nada ki pode straga ses amizadi ku kunpanheru i ku Jeová. — 1 Tessalonicenses 4:6.

19, 20. Pa kristons, kantu ténpu ki kazamentu debe dura? I pamodi?

¹⁹ Txeu livru i filmis ta finda ku un grandi fésta di kazamentu. Má na vida di verdadi, kazamentu é sô komésu. Jeová krê pa kazamentu dura pa tudu ténpu. — Génesis 2:24.

²⁰ Txeu algen oji, ta atxa ma kazamentu é un kuza ki ta dura poku ténpu. É faxi kaza i é faxi divôrsia. Alguns ta atxa ma óras ki kontise prublémas, é óra di kaba ku kazamentu. Má Jizus fla: ‘Kel ki Deus djunta, ómi ka debe sipara.’ (Mateus 19:6 ) Bu ta lenbra di kel ilustrason di três kórda transadu na kunpanheru? Un kórda di kel tipu li é fórti, é ka faxi di rabenta-l. Óras ki nu ta djobe ajuda di Jeová, nos kazamentu ta dura.

21. Kuzê ki ta djuda un maridu ku mudjer ten un kazamentu filís?

²¹ Nos tudu nu ten kualidadis i fadjas. É faxi dimás nu konsentra na fadjas di otus algen, prinsipalmenti di algen ki nu sta kazadu ku el. Má si nu faze kel-li, nu ka ta ser filís. Pur isu, si nu konsentra na bons kualidadi di nos maridu ô di nos mudjer, nu pode ten un kazamentu filís. Má, nu ta konsigi konsentra  na kualidadis envês di na fadjas? Sin! Pur izénplu, Jeová sabe ma nos é ka perfetu. Má simé, el ta konsentra na nos kualidadis. Imajina si el ka ta fazeba si! Un skritor di Salmo fla: ‘Si bu djobe érus, ó Jeová, ken ki ta pode fika sakédu?’ (Salmo 130:3 ) Maridu ku mudjer pode imita Jeová óras ki es ta konsentra na bons kualidadi di kunpanheru i óras ki es ta púrdua kunpanheru. — Lé Colossenses 3:13.

22, 23. Modi ki Abraon ku Sara da un bon izénplu pa ken ki sta kazadu?

 ²² Sima ténpu ta pasa, kazamentu ta bira fórti. Abraon ku Sara tevi txeu anu kazadu i filís. Kantu Jeová fla Abraon pa el sai di se kaza na sidadi di Ur, Sara talvês tinha más di 60 anu. Imajina modi ki éra difísil pa el dexa kel vida sábi ki el tinha, pa el ba mora na ténda. Má Sara éra un bon amiga i kunpanhera di se maridu i el ta ruspetaba el di korason. Pur isu, el apoia disizons di Abraon i el djuda-l pa se disizons da sértu. — Génesis 18:12; 1 Pedro 3:6.

²³ É klaru ki un bon kazamentu ka siginifika ma maridu ku mudjer sénpri ta konkorda na tudu kuza. Un bês kantu Abraon ka konkorda ku Sara, Jeová fla-l: ‘Obi kuzê ki el sta fla’. Abraon faze si i da bons rezultadu. (Génesis 21:9-13 ) Si alvês bo ku kel algen ki nhos sta kazadu ka ta konkorda ku kunpanheru, ka bu dizanima. Más inportanti é pa nhos trata kunpanheru ku amor i ruspetu, mésmu óras ki nhos ka ta konkorda ku kunpanheru.

24. Modi ki bu kazamentu pode da ónra pa Jeová?

²⁴ Na organizason di Jeová ten milharis di algen kazadu ki sta filís. Si bu krê kaza, lenbra ma skodje un algen pa bu kaza ku el, é un di kes disizon más inportanti na vida. É un disizon ki ta muda bu vida pa tudu ténpu. Pur isu, buska orientason di Jeová ki ta djuda-u skodje dretu kel algen ki bu ta kaza ku el. Tanbê el ta djuda-u pripara dretu pa kazamentu i sforsa pa ten un kazamentu fórti i xeiu di amor, ki ta onra Jeová.