1, 2. (a) Orientason di kenha ki nu debe sigi? (b) Ki perguntas nu ta ben responde na es kapítlu?

 KANTU bu staba pikinoti, talvês bu pai ku bu mai pidiba bo pa bu fazeba algun kuza ki bu ka krê fazeba. Má, pamodi amor ki bu ten pa es, bu sabia ma bu debe obiba ku es. Má nen sénpri bu ka ta krê obiba ku es.

² Nu sabe ma Jeová ki é nos Pai, ta ama-nu txeu. El ta preokupa ku nos i el ta da-nu tudu kel ki nu ta meste pa nu ten un vida sábi. El ta da-nu orientason pa nu ser filís. Alvês el ta uza otus algen pa da-nu orientason. Nu meste ruspeta autoridadi di Jeová. (Provérbios 24:21 ) Má, pamodi ki alvês é difísil pa nu seta orientason? Pamodi ki Jeová ta pidi-nu pa nu sigi orientason ki nu ta dadu? I modi ki nu pode mostra ma nu ta ruspeta autoridadi di Jeová? — Djobe párti PRENDE MÁS n^u 9.

3, 4. (a) Modi ki tudu algen bira inperfetu? (b) Pamodi ki é difísil nu sigi orientasons di otus algen?

³ Nu ten tendénsia di rabela pamodi inperfeson. É kel-li ki kontise ku Adon ku Eva kantu es peka. Jeová faze-s perfetu, má es rabela kóntra se autoridadi. Pur isu, tudu algen nase inperfetu. É difísil sigi orientasons di Jeová i di otus algen pamodi nos é inperfetu. Otu razon, é pamodi kes algen ki Jeová ta uza pa da-nu orientasons tanbê é inperfetu. — Génesis 2:15-17; 3:1-7; Salmo 51:5; Romanos 5:12.

⁴ Tanbê, nos inperfeson ta pô-nu bira orgulhozu, i pur isu é más difísil nu seta orientasons. Pur izénplu, na ténpu di israelitas, Jeová skodje Muizes pa ser líder di se povu. Má un ómi ki txomaba Korá, ki dja tinha txeu ténpu ta sirbiba Jeová, bira orgulhozu i el dexa di ruspeta Muizes. Muizes éra líder di povu di Deus, má el ka éra orgulhozu. Bíblia ta fla ma Muizes éra ómi más umildi ki tinha na kel ténpu. Má, Korá ka krê setaba orientasons di Muizes i ti el poi txeu algen ta fika kóntra Muizes. Kuzê ki kontise ku Korá i ku kes ki rabela? Tudu es móre. (Números 12:3; 16:1-3, 31-35 ) Na Bíblia, nu ta atxa txeu izénplu ki ta mostra ma orgulhu é prigozu. — 2 Crónicas 26:16-21 ; djobe párti PRENDE MÁS n^u 10.

5. Modi ki alguns algen abuza di ses puder?

⁵ Talvês dja bu obi ta fladu ma ‘puder ta straga  algen.’ Stória ta mostra ma txeu algen abuza di ses puder. (Lé Eclesiastes 8:9.) Pur izénplu, Saul éra un bon ómi i el éra umildi kantu Jeová skodje-l pa el ser rei di Israel. Má, el dexa orgulhu ku siumis kria na se korason, pur isu el pirsigi Davidi, ki éra un ómi ki ka fazeba nada mariadu. (1 Samuel 9:20, 21; 10:20-22; 18:7-11 ) Un ténpu dipôs, Davidi bira rei i el éra un di kes midjór rei na Israel. Má, ku ténpu, el abuza di se puder. El tevi relason seksual ku Batiseba, ki éra mudjer di un ómi ki txomaba Urias. Pa tenta sukundi se pekadu el manda mata Urias na géra. — 2 Samuel 11:1-17.

6, 7. (a) Amor ki bu ten pa Jeová, ta pô-u faze kuzê? (b) Modi ki izénplu di Jizus pode djuda-nu?

⁶ Nu ta ama Jeová más di ki kalker otu kuza i nu krê faze di tudu pa el fika kontenti ku nos. Pur isu, nu ta ruspeta se autoridadi. (Lé Provérbios 27:11; Marcos 12:29, 30.) Désdi ténpu di Adon ku Eva, Satanás ka krê pa pesoas ruspeta autoridadi di Jeová. Diabu krê pa nu pensa ma Jeová ka ten direitu di fla-nu kuzê ki nu debe faze. Má, nu sabe ma kel-li é mintira. Nu sabe ma é Jeová ki ‘merese resebe glória, ónra i puder pamodi el kria tudu kuza’. — Apocalipse 4:11.

⁷ Kantu bu staba pikinoti, bu prende ma bu debe obi ku bu pai ku bu mai, mésmu óras ki bu ka kreba. Di mésmu manera, alvês é ka faxi obi ku Jeová.  Má, nu ta ama Jeová i nu ta ruspeta-l, pur isu nu ta faze tudu ki nu pode pa nu obi ku el. Jizus dexa un izénplu pa nos. El obi ku Jeová mésmu kantu éra difísil pa el ô ki éra kóntra se vontadi. Pur isu, el fla se Pai: ‘Faze kel ki bu krê, nau kel ki mi N krê.’ — Lúkas 22:42, BPK ; djobe párti PRENDE MÁS n^u 11.

8. Kal ki é alguns manera ki Jeová ta uza pa orienta-nu? (Odja kuadru “ Seta konsedju”.)

⁸ Oji, Jeová ta uza txeu manera pa orienta-nu. Pur izénplu, el da-nu Bíblia i ansions na kongregason. Nu ta mostra ma nu ta ruspeta autoridadi di Jeová óras ki nu ta ruspeta kes algen ki el ta uza pa orienta-nu. Si nu nega ses ajuda, é sima ki nu sta ta nega Jeová. Kantu israelitas nega obi ku Muizes, Jeová fika tristi, pamodi éra sima ki es staba ta nega obi ku el. — Números 14:26, 27 ; djobe párti PRENDE MÁS n^u 12.

9. Modi ki amor ta djuda-nu sigi orientason?

⁹ Óras ki nu ta ruspeta kes algen ki ten autoridadi, tanbê nu sta mostra ma nu ta ama nos irmons i nos irmans. Pur izénplu, óras ki ta kontise un dizastri na naturéza, un ekipa ki ta ba djuda algen, txeu bês ta trabadja djuntu, pa es pode konsigi salva txeu algen. Pa es konsigi kel-li, un algen ta organiza ekipa i tudu algen di ekipa debe sigi kes instruson. Má, i si un algen ka sigi orientasons i el faze kel ki el krê? Mésmu ki el faze-l ku bon intenson, si el ka sigi orientason, el pode traze prublémas pa kes otu algen di ekipa i ti es pode panha pankada. Di mésmu manera, si nu ka sigi orientasons di Jeová i di kes  algen ki el ta uza pa orienta-nu, nu pode poi otus algen ta sufri. Má, óras ki nu ta obi ku Jeová, nu sta ta mostra ma nu ta ama nos irmons i ma nu ta ruspeta kes manera ki Jeová ta uza pa orienta-nu. — 1 Coríntios 12:14, 25, 26.

10, 11. Kuzê ki nu sta ben odja gósi?

¹⁰ Tudu kel ki Jeová ta pidi-nu pa nu faze é bon pa nos. Pur isu, óras ki nu ta ruspeta autoridadi na família, na kongregason i autoridadis di govérnu, nos tudu ta ganha. — Deuteronómio 5:16; Romanos 13:4; Efésios 6:2, 3; Hebreus 13:17.

¹¹ Kuzê ki pode djuda-nu faze kel-li? Óras ki nu ntende pamodi ki Jeová krê pa nu ruspeta otus algen. Nu ben odja modi ki nu pode ruspeta kes algen  ki ten autoridadi na família, na kongregason i modi ki nu pode lida ku autoridadis di govérnu.

12. Modi ki maridu ta mostra ma el ta ruspeta autoridadi di Jeová?

¹² Jeová kria família i el da kada un se responsabilidadi. Óras ki kada algen na família ta ntende kuzê ki Jeová ta spéra di es, família ta funsiona dretu i es ta ser filís. (1 Coríntios 14:33 ) Jeová skodje maridu pa ser xéfi di família. Kel-li siginifika ma Jeová ta spéra ma maridu ta ama se mudjer i se fidjus i ma el ta kuida dretu di es. Pur isu, maridu ta presta kónta na Jeová, pa manera ki el ta kuida di se família. Un maridu ki ta sirbi Jeová ta preokupa ku se família, el ta ama-s i el ta kuida di es di mésmu manera ki Jizus  ta kuida di kongregason. Óras ki un maridu ta faze kel-li, el sta mostra ma el ta ruspeta Jeová. — Efésios 5:23 ; djobe párti PRENDE MÁS n^u 13.

13. Modi ki un mudjer pode mostra ma el ta ruspeta autoridadi na família?

¹³ Mudjer tanbê ten un responsabilidadi inportanti i di txeu valor. El ta djuda se maridu ser un bon xéfi di família. El ku se maridu, es ten responsabilidadi di iduka ses fidjus. Un manera ki el ta inxina se fidjus mostra ruspetu é através di se izénplu. (Provérbios 1:8 ) El ta ruspeta se maridu i el ta djuda-l pa ses disizon da sértu. Mésmu óras ki el ka ta konkorda ku se maridu na algun kuza, ku amor i ruspetu el ta fla kuzê ki el ta atxa. Óras ki un mudjer é kazadu ku un ómi ki é ka Tistimunha di Jeová, se situason é más difísil. Má, si el kontinua ta trata se maridu ku amor i ruspetu, talvês un dia se maridu tanbê pode disidi sirbi Jeová. — Lé 1 Pedro 3:1.

14. Modi ki fidjus ta mostra ma es ta ruspeta autoridadi na família?

¹⁴ Fidjus tanbê ten txeu valor pa Jeová i es meste di proteson i orientason. Pai ku mai ta fika txeu kontenti óras ki fidju ta obi ku es. Más inportanti inda, fidjus ki é obidienti ta mostra ma es ta ruspeta Jeová i el ta fika kontenti ku es. (Provérbios 10:1 ) Ten txeu família ki fidjus ta kria sô ku pai ô sô ku mai. Kel-li pode ser txeu difísil pa tudu es. Má, óras ki fidjus é obidienti i es ta djuda ses pai ô ses mai, ses vida ta fika mutu más midjór. É klaru ki ninhun família é ka perfetu. Má, kalker família pode ser filís, óras ki tudu es ta sigi orientasons di Jeová. Kel-li  ta da glória pa Jeová ki é Kriador di tudu família. — Efésios 3:14, 15.

15. Modi ki nu ta mostra ma nu ta ruspeta autoridadi na kongregason?

¹⁵ Jeová ta uza kongregason pa orienta-nu i el da Jizus autoridadi pa kuida di kongregason. (Colossenses 1:18 ) Jizus tanbê, da ‘skravu fiel i prudenti’ responsabilidadi pa kuida di povu di Deus na Téra. (Mateus 24:45-47 ) Oji, ‘skravu fiel i prudenti’ é Grupu Enkaregadu di Óbra di Tistimunhas di Jeová. Grupu Enkaregadu di Óbra ta da-nu kel ki nu meste na ténpu sértu, pa djuda-nu mante nos fé fórti. Tanbê es ta da orientason pa ansions, ajudantis di kongregason i enkaregadus di grupu di kongregason, pa es pode kuida di kongregasons na mundu interu. Tudu es ta presta kónta na Jeová pa manera ki es ta kuida di ses responsabilidadi. Pur isu, óras ki nu ta ruspeta-s, nu sta ta mostra ruspetu pa Jeová. — Lé 1 Tessalonicenses 5:12; Hebreus 13:17 ; djobe párti PRENDE MÁS n^u 14.

16. Pamodi ki nu pode fla ma ansions ku ajudantis di kongregason ta skodjedu ku ajuda di spritu santu?

¹⁶ Ansions i ajudantis di kongregason ta djuda kongregason mante fiel i unidu. É klaru ki es é inperfetu sima nos. Nton modi ki es ta skodjedu? Kes irmon meste ten kes kualidadi ki sta na Bíblia. (1 Timóteo 3:1-7, 12; Tito 1:5-9 ) Jeová uza se spritu santu, pa djuda kes algen ki skrebe Bíblia, splika kes  kualidadi ki kes irmon debe ten. Ansions ta pidi Jeová spritu santu óras ki es ta djobe ken ki pode skodjedu pa ser ansion ô ajudanti di kongregason. Tudu kel-li ta mostra ma é Jeová ku Jizus ki ta orienta kongregason. (Atos 20:28 ) Kes ómi ki skodjedu pa djuda-nu i pa kuida di nos na kongregason é un prezenti di Jeová. — Efésios 4:8.

17. Pa mostra ruspetu, kuzê ki un irman alvês meste faze?

¹⁷ Alvês, pode ka sta ninhun ansion ô ajudanti di kongregason pa kuida di un diziginason. Na kes situason li, otus irmon batizadu pode djuda. Má, si ka ten ninhun irmon batizadu, un irman pode faze trabadju ki un irmon batizadu pode fazeba. Na kes situason li, el debe kubri kabésa. El pode uza un lénsu ô un txapéu. (1 Coríntios 11:3-10 ) Asi, el sta mostra ma el ta ruspeta kenha ki Jeová da autoridadi na família i na kongregason. — Djobe párti PRENDE MÁS n^u 15.

18, 19. (a) Kuzê ki nu ta prende na Romanos 13:1-7 ? (b) Modi ki nu ta mostra ruspetu pa kes algen ki ten autoridadi di governa?

¹⁸ Oji, Jeová ta dexa govérnus ten algun autoridadi i nu debe ruspeta-s. Es ta organiza país i sidadis, asi pa tudu kuza funsiona dretu i pa tudu algen ten kes sirvisu más inportanti, sima skólas ku ospital. Kristons ta sigi konsedju ki sta na Romanos 13:1-7. (Lé.) Nu ta ruspeta ‘autoridadis supirior’ i nu ta obi ku lei di kel lugar undi nu ta vive. Kes lei pode aplika na nos família, na nos trabadju ô na kuzas ki nu ten. Pur izénplu, nu ta paga inpostu i nu ta da  govérnus informason ki es ta pidi. Má, i si un govérnu pidi-nu pa nu faze un kuza ki é kóntra lei di Deus? Apóstlu Pedru fla: ‘Nu ten ki obi ku Deus antis di nu obi ku ómis’. — Atos 5:28, 29.

¹⁹ Óras ki nu ta lida ku un algen ki ten autoridadi, sima un juís ô un pulísia, nu meste mostra ruspetu. Na skóla, jóvens debe ruspeta ses profesor i kes algen ki ta trabadja la. Na nos lugar di trabadju nu debe ruspeta nos xéfi, sikrê otus algen ka ta faze kel-la. Di kel manera li, nu sta ta imita apóstlu Polu ki ruspeta kes algen ki tinha autoridadi, mésmu kantu éra difísil fazeba kel-la. (Atos 26:2, 25 ) Mésmu ki otus algen trata-nu mariadu, nu ta kontinua ta ruspeta-s. — Lé Romanos 12:17, 18; 1 Pedro 3:15.

20, 21. Kuzê ki pode kontise óras ki nu ta ruspeta otus algen?

²⁰ Na mundu interu, pesoas kuazi ka sta mostra ruspetu pa kunpanheru. Má, povu di Jeová é diferenti. Nu krê ruspeta tudu algen. Nu ta sigi konsedju di apóstlu Pedru ki fla: ‘Nhos onra ómis di tudu tipu’. (1 Pedro 2:17 ) Pesoas ta repara óras ki nu ta ruspeta-s. Jizus fla: ‘Nhos dexa nhos lus límia pa ómis, pa es pode odja nhos bons óbra i pa es da glória pa nhos Pai’. — Mateus 5:16.

²¹ Óras ki nu ta mostra ruspetu na família, na kongregason, na lida ku autoridadis i pa otus algen, nos bon izénplu pode poi otus algen ta krê prende sobri Jeová. I óras ki nu ta ruspeta otus algen, nu sta ta mostra ma nu ta ruspeta Jeová. Faze si ta dexa Jeová kontenti i nu ta mostra ma nu ta ama-l.