Deus ta konvida tudu tipu di algen pa faze orason, pa es pode bira se amigu. (Salmo 65:2 ) Má Deus ka ta obi, ô el ka ta seta, tudu orason. Pur izénplu, é difísil Deus obi orason di un ómi ki ta maltrata se mudjer. (1 Pedro 3:7 ) Óras ki povu di Israel ka ta rapendeba di kuzas mariadu ki es fazeba, Jeová ka ta obiba ses orason. Má, Deus ta seta orason ti di un algen ki faze un pekadu gravi, si el rapende. Ta fika klaru ma orason é un kuza ki nu debe da valor. — Lé Isaías 1:15; 55:7.

 Odja vídiu Deus ta obi tudu orason?

 Orason ta faze párti di nos adorason. Nton, nu debe ora sô pa Jeová ki é nos Kriador. (Mateus 4:10; Lúkas 11:2, BPK ) Tanbê, dja ki nos é pekador, nu debe faze orason na nómi di Jizus, pamodi el móre pa nos pekadu. (João 14:6 ) Jeová ka krê pa nu faze orason dikoradu ô skrebedu. El krê pa nu faze orason di korason. — Lé Mateus 6:7; Filipenses 4:6, 7.

 Nos Kriador pode obi ti orason ki nu ta faze déntu nos. (1 Samuel 1:12, 13 ) El ta konvida-nu pa nu faze orason tudu óra, sima óras ki nu ta labanta di sédu, óras ki nu ta ba deta di noti, óras ki nu ta kume i óras ki nu tene prublémas. — Lé Salmo 55:22; Mateus 15:36.

 Bira amigu di Deus é ka faxi pamodi nu ta vive na meiu di algen ki ka ten fé na Deus i ki ta faze trósa di se promésa di ben poi pas na Téra. (2 Timóteo 3:1, 4; 2 Pedro 3:3, 13 ) Nton, nu meste sta djuntu ku nos irmons na fé pa nu da kunpanheru forsa. — Lé Hebreus 10:24, 25.

  Bira amigu di kes algen ki ta ama Deus ta djuda-nu bira más amigu di Deus. Sisti runion di Tistimunhas di Jeová é un grandi xansi ki nu ten di resebe koraji di fé ki otus ten. — Lé Romanos 1:11, 12.

 Bu pode bira más amigu di Jeová óras ki bu ta pensa txeu na kuzas ki bu ta prende di se Palavra. Pensa txeu na kuzas ki Deus ta faze, na orientasons ki el ta da i na se promésa. Pensa txeu na kes kuza li i faze orason, ta djuda-nu da amor i sabedoria di Deus más valor di korason. — Lé Josué 1:8; Salmo 1:1-3.

 Bu ta bira más amigu di Deus sô si bu kúnfia na el i si bu ten fé na el. Má fé é sima un planta ki ten ki regadu. Bu meste sta sénpri ta ‘rega’ bu fé i bu ta faze-l óras ki bu ta lenbra kal ki é bazi di kuzas ki bu ta kridita na el. — Lé Mateus 4:4; Hebreus 11:1, 6.

 Jeová ta preokupa ku kes algen ki ta ama-l. El pode libra-s di tudu kuza ki ta poi ses fé ku ses speransa di vida itérnu na prigu. (Salmo 91:1, 2, 7-10 ) El ta fla-nu pa nu ivita maneras di vive ki ta poi nos saúdi i nos filisidadi na prigu. Jeová ta inxina-nu kal ki é midjór manera di vive. — Lé Salmo 73:27, 28; Tiago 4:4, 8.