Imajina kel situason li: Júlia odja na spedju, el ta atxa ma el sta sima un “baril”. El fla se kabésa: “N ten ki magrise”, má se pai ku se mai i se amigus ta fla-l ma el sta sima un “pó di fós”.

Últimus ténpu Júlia ka sta tra di kabésa ma el ten ki perde “2 kilu”. Dja el faze un planu di pasa uns dia sen kume. . .

Si bu staba na lugar di Júlia, kuzê ki bu ta fazeba?

É normal preokupa ku bu aparénsia. Bíblia ta pâpia di alguns ómi i mudjer ki éra bunitu, sima Sara, Rakel, Abigail, Juzé i Davidi. Bíblia ta fla ma un mudjer ki txomaba Abizági éra ‘rei di bunita.’ – 1 Reis 1:4.

Má, monti jóven ta preokupa dimás ku ses aparénsia. Kel-li pode traze prublémas gravi. Pur izénplu:

• Na un piskiza ki fazedu, na kada 100 minina, 58 ta atxaba ma es staba gorda, má sô 17 ki staba.

• Na otu piskiza ki fazedu, na kada 100 mudjer, 45 ki staba magru ta atxaba ma es staba gorda!

• Na tenta magrise, alguns jóven panha anorexia, ki é un duénsa ki ta poi algen ka ta kume di tal manera ki el pode móre.

 Si bu sta xinti algun sinal di kel duénsa li ô otu duénsa ki ten aver ku kumida, pidi ajuda. Pâpia ku bu pai ô ku bu mai, ô ku otu algen di más idadi ki bu ta kúnfia na el. Bíblia ta fla: ‘Amigu di verdadi ta ama tudu óra i el ta bira un irmon na ténpu di frónta.’ – Provérbios 17:17.

Déntu di algen ki é algen. É kel-li ki ta mostra si un algen é bunitu ô feiu. Odja izénplu di Absalon, ki éra fidju di Rei Davidi. Bíblia ta fla:

‘Ka tinha ninhun ómi ki ta ngabada se bunitéza sima Absalon. El ka tinha defetu.’ – 2 Samuel 14:25.

Má kel jóven li éra rei di orgulhozu, xeiu di ganánsia i traidor! Bíblia ka ta pâpia ben di Absalon. Bíblia ta fla ma el éra diskaradu, disleal i tanbê ma el éra un algen mau ki ta mataba algen.

É pur isu ki Bíblia ta da-nu kes konsedju li:

‘Bisti kel novu manera di ser.’ – Colossenses 3:10.

‘Ki bu bunitéza ka ser ku kuzas di fóra, má pa ser kel ki bo é na korason’. – 1 Pedro 3:3, 4.

É normal bu krê ten bon aparénsia, má bu manera di ser é más inportanti ki bu aparénsia. É ka un korpu bunitu ô un róstu bunitu ki ta faze otus algen gosta di bo, má é bu manera di ser. Un minina ki txoma Filísia fla: “Bunitéza ta txoma atenson pa poku ténpu, má kuzê ki ta faze pesoas lenbra di bo é kel tipu di algen ki bo é pa déntu i kes bon kualidadi ki bu ten.”

Txeu bês bu ka ta sta kontenti ku bu aparénsia?

Algun bês dja bu pensa na faze operason ô diéta izajeradu pa bu fika ku korpu más bunitu?

Si bu podeba, kuzê ki bu ta gostaba di muda na bu aparénsia? (Skodje.)

• ALTURA

• PÉZU

• KABÉLU

• KORPU

• RÓSTU

• PÉLI

Si bu responde sin pa kes dôs primeru pergunta i si bu skodje três ô más kuza na tirseru pergunta, lenbra ma bu pode fika spantadu di diskubri ma pesoas ta gosta di bu aparénsia más di kel ki bu ta pensa. Txeu bês, é nos ki ta fika preokupadu dimás ku nos aparénsia. – 1 Samuel 16:7.