Imajina kel situason li: Na djuga bóla ku se amigus, Tiagu xuta bóla ku forsa i kebra vidru di karu di se vizinhu.

Si bo éra Tiagu, kuzê ki bu ta fazeba?

TEN TRÊS KUZA KI BU PODE FAZE:

1. Kóre.

2. Poi kulpa na otu algen.

3. Konta bu vizinhu kuzê ki kontise i fla-l ma bu ta paga.

Bu pode xinti gana skodje faze kel primeru. Má sénpri é midjór seta ma bu faze un kuza mariadu, sikrê é un vidru ki bu kebra ô kualker otu kuza ki bu faze.

1. É si ki ta fazedu.

   Bíblia ta fla: ‘Nu krê konporta ku onestidadi na tudu kuzas.’ – Hebreus 13:18.

2. É más faxi púrdua un algen ki ta seta ma el faze un kuza mariadu.

   Bíblia ta fla: ‘Ken ki ta sukundi kuzas mariadu ki el faze ka ta ten bon rezultadu, má kel ki ta konfesa-s i ta bandona-s ta tratadu ku mizerikórdia.’ – Provérbios 28:13.

3. Más inportanti inda é ki Deus ta fika kontenti óras ki bu seta ma bu faze un kuza mariadu.

   Bíblia ta fla: ‘Jeová ta ôdia algen falsu, má el ten amizadi fórti ku kes algen lial pa el.’ – Provérbios 3:32.

Karina, ki ten 20 anu, dadu multa pamodi el staba ta koreba karu na forsa dimás. El sukundi kel multa di se pai. Má el ka konsigi sukundi-l pa txeu ténpu. Karina fla: “Dipôs di kuazi un anu, nha pai da kónta ma tinha un multa na nha nómi. Da un monti prubléma!”

Kuzê ki kel-li ta inxina-nu? Karina fla: “Sukundi kuzas mariadu ki nu ta faze sô ta piora situason. Más sédu ô más tardi bu ta pegadu!”

Bíblia ta fla: ‘Nos tudu nu ta fadja txeu bês’. (Tiago 3:2, nóta di rodapé) Sima dja nu odja, é un sinal di umildadi i di responsabilidadi seta lógu ma nu faze un kuza mariadu.

Dipôs ki bu seta bus éru, bu debe djobe kuzê ki bu ta prende di kes kuza mariadu ki bu faze. Un minina ki txoma Vera fla: “Óras ki N faze kuzas mariadu N ta tenta prende ku es. N ta dexa kel kuza ki N prende pô-m ser un algen midjór i N ta tenta konporta di manera diferenti na otu bês.” Nu ben odja modi ki bu pode faze kel-li.

Si bu straga biskiléta di bu pai, kuzê ki bu ta fazeba?

• Ka fla-l nada i tomara ki el ka da kónta.

• Konta bu pai kuzê ki kontise.

• Poi kulpa na otu algen.

Si bu ka panha bon nóta na próva pamodi bu ka studa, kuzê ki bu ta flaba?

• Próva staba difísil.

• N ka studa dretu.

• Prufesor ka gosta di mi.

 Pensa más un bês na kes dôs situason ki dja nu odja. Imajina ma bo é (1) bu pai i (2) bu prufesor. Kuzê ki bu pai i bu prufesor ta atxaba di bo si bu seta ma é bo ki faze mariadu? Kuzê ki es ta atxaba di bo si bu tenta sukundi kuzas mariadu ki bu faze?

Tenta lenbra di algun kuza mariadu ki bu faze na anu pasadu i responde kes pergunta li:

Kuzê ki bu faze mariadu? I kuzê ki bu faze dipôs?

• N ka fla ningen.

• N fla ma é otu algen.

• N konta lógu kuzê ki kontise.

Si bu ka konta kuza mariadu ki bu faze, modi ki bu xinti dipôs?

• Dretu – Dipôs pasa!

• Konsénsia pizadu – Éra pa N kontaba verdadi.

Kuzê ki bu ta fazeba pa bu lidaba midjór ku kel situason?

Kuzê ki bu prende ku kel kuza mariadu ki bu faze?

Pamodi ki alguns algen ka ta krê seta ma es faze kuzas mariadu?

Kuzê ki pesoas ta pensa di bo si sénpri bu ta tenta sukundi kuzas mariadu ki bu faze? Má kuzê ki es ta pensa di bo, si bu seta kuzas mariadu ki bu faze? – Lucas 16:10.