PERGUNTA 7
Kuzê ki N debe faze si algen krê pa N faze séksu ku el?
KUZÊ KI BU TA FAZEBA?
Imajina kel situason li: Dja ten dôs mês ki Sandra ku Elton kumesa ta namora. Má, Sandra sta ta xinti sima ki dja dura ki es konxe kunpanheru. Es ta manda kunpanheru mensájen tudu óra, es ta pasa óras ta pâpia ku kunpanheru na tilifóni. Antis di un kaba di pâpia, kel otu dja sabe kuzê ki el sta ba fla! Má, Elton ka krê sô pâpia.
Na kel dôs mês ki pasa, úniku kuza ki Elton ku Sandra faze é pega kunpanheru na mô i da uns beju. Sandra ka krê bai más lonji di ki si. Má tanbê, el ka krê pa Elton dana ku el. É sô Elton ki ta faze-l xinti bunita i spesial. El ta fla se kabésa: ‘Inda más, nos é dodu na kunpanheru. . .’
Si dja bu ten idadi di kumesa namora i si bu sta na mésmu situason ki Sandra, kuzê ki bu ta fazeba?
PARA I BU PENSA!
Séksu é un prezenti ki Deus ta da sô pa algen kazadu. Ken ki ta faze séksu antis di kazamentu, sta ta uza kel prezenti li mariadu. É sima panha un ropa bunitu ki un algen da-u i faze-l panu di linpa kaza
Si bu subi riba di un pé di arvi i bu tenta bua sima un ponba bu ta da pankada gravi, pamodi bu viola un lei ki ta txomadu lei di gravidadi. Ta kontise mésmu kuza óras ki bu ka obi ku leis di Deus sobri séksu. Pur izénplu, Bíblia ta fla: ‘Ka nhos ten konportamentu seksual mariadu’. – 1 Tessalonicenses 4:3.
Kuzê ki pode kontise si nu ka obi ku kel lei li? Bíblia ta fla: ‘Ken ki ta faze konportamentu seksual mariadu sta ta peka kóntra se própi korpu.’ (1 Coríntios 6:18 ) Pamodi?
Na un piskiza ki fazedu diskubridu ma txeu jóven ki faze séksu antis di kazamentu pasa pa un ô más di kes prubléma li:
-
DISGOSTU. Monti jóven ki faze séksu antis di kazamentu ta fla ma es rapende lógu dipôs.
-
DISKUNFIANSA. Dipôs di faze séksu, é normal un algen pergunta: ‘Ku kenha más ki dja el faze séksu?’
-
DIZILUZON. Na fundu-na-fundu, un monti minina ta prifiri algen ki ta proteje-s, nau pa pruveta di es. I monti rapás ta xinti ma es ta perde interesi na kes minina ki ta dexa-s faze séksu ku es.
-
Kuzê ki bu pode prende: Si bu faze séksu antis di kazamentu, bu sta ta fulha un kuza di grandi valor i asi bu ta perde ruspetu pa bu kabésa. (Romanos 1:24 ) Bu korpu ten grandi valor pa bu ntrega-l di bandeja!
Mostra ma bu ta konsigi ivita ‘ten konportamentu seksual mariadu.’ (1 Tessalonicenses 4:3) Nton, si bu kaza un dia, bu pode faze séksu sen preokupa ku disgostu, diskunfiansa i diziluzon, ki kes algen ki ta faze séksu antis di kazamentu ta xinti. – Provérbios 7:22, 23; 1 Coríntios 7:3.
KUZÊ KI BU TA ATXA?
-
Si un algen ta ama-u di verdadi, el ta tenta prujudika-u?
-
Si un algen ta preokupa ku bo di verdadi, el ta tenta prujudika bu amizadi ku Deus? – Hebreus 13:4.
Bu pode gosta di kes-li tanbê
PERGUNTAS KI JÓVENS TA FAZE
N sta priparadu pa namora?
5 kuza ki pode djuda-u odja si bu sta priparadu pa namoru i kazamentu.
PERGUNTAS KI JÓVENS TA FAZE
Kuzê ki N pode spera di namoru?
Odja três kuza ki bu debe pensa na el timenti bu sta ta namora.
PERGUNTAS KI JÓVENS TA FAZE
Namoru — Párti 3: Nu debe tirmina namoru?
Bu debe kontinua bu namoru si bu ten dúvida? Kel artigu li pode djuda-u toma un disizon.
