Má pamodi ki Satanás ku se dimónis ta faze di tudu pa ngana algen? Pamodi es krê pa nu rabela sima es. Es krê pa nu adora-s, pa nu kridita na ses mintira i pa nu faze kes kuza ki Jeová ka gosta. Txeu di kes kuza li sta ligadu ku kes kustumu ki ten aver ku mortus.

Mórti di un algen ki nu ta ama é un kuza ki ta duê dimás, i é normal nu mostra nos dór. Dipôs ki Lázaru, amigu di Jizus móre, Jizus ‘kumesa ta txora.’ — João 11:35.

Ten txeu kustumu ki ten aver ku mórti i kada país ten ses própi kustumu. Bíblia ka ta fla nada kóntra txeu di kes kustumu li. Má alguns kustumu ten bazi na kel ideia ma mortus sta bibu i ma es pode odja kes algen ki inda sta bibu. Alguns kustumu sima fika kordadu na kaza di mórti, txora di manera izajeradu ô otus kuza ki ta fazedu na dia di ntéru ô dipôs, ta fazedu pamodi pesoas ten medu di dizagrada kel spritu ô pamodi es ta kridita ma asi es ta djuda-l diskansa en pas. Má dja ki ‘mortus ka sabe di más nada’, kes algen ki ta faze kes kuza li sta ta djuda pa kes mintira di Satanás spadja. — Eclesiastes 9:5.

Alguns algen tanbê ta kridita ma es ten ki faze alguns kuza pa pazígua alma di kes algen ki móre, pamodi sinon kes spritu ta ben tormenta-s. Na alguns país es ta faze fésta i sakrifisiu, 40 dia ô un anu dipôs ki kel algen móre. Es ta faze kel-li pamodi es ta kridita ma asi es ta djuda kel mortu ‘pasa’ pa mundu di spritu. Otu kustumu ki ten tanbê, é kel ki es ta da algen ki dja móre kumida ku bebida.

Kes kuza li é mariadu pamodi es ta apoia kes mintira di Satanás sobri kes algen ki dja móre. Jeová ka ta fika kontenti si nu partisipa na kes kustumu ki ten bazi na kes kuza ki dimónis ta inxina. — 2 Coríntios 6:14-18.

Sérvus di Deus verdaderu ka ta partisipa di ninhun manera na kes kuza ki ta apoia kes mintira di Satanás. Envês di kel-li, es ta konsentra na konsola i na mostra amor pa kes algen ki sta bibu. Es sabe ma óras ki un algen móre é sô Jeová ki pode djuda-l. — Jó 14:14, 15.

Alguns algen ta tenta pâpia ku dimónis di manera dirétu ô através di un algen ki ta invoka spritus. Es pode faze kel-li através di fitisaria ô bruxaria, majia ô es ta bota sórti i tenta pâpia ku algen mortu.

Bíblia ta mostra ma kes kuza li é mariadu pamodi el ta fla: ‘I na bu meiu ka debe ten ningen. . . ki ta faze dibinhason, ô ki ta faze majia, ô ki ta djobe agoru, ô un fitiseru, ô un algen ki ta prende otus algen ku nkantamentu, ô ki ta djobe kes algen ki ta invoka spritus, ô un algen ki ta dibinha, ô algen ki ta pâpia ku mortu. Pamodi Jeová ta ôdia ken ki ta faze kes kuza li.’ — Deuteronómio 18:10-12.

Pamodi ki Jeová ta da-nu kel avizu sériu li?

Jeová ta aviza-nu pa nu ka mete na ninhun kuza ki ten aver ku fitisaria ô bruxaria pamodi el krê kuzê ki é dretu pa nos. El ta ama-nu, el ta preokupa ku nos i el sabe ma si nu mete na kes kuza di dimónis, di sertéza nu ta kaba pa sufri.

Un algen ki sufri di kel manera li é Nilda, ki éra un algen ki ta invokaba spritu na Brazil. Dimónis rabida se vida di kabésa pa baxu. El fla: “Spritus. . . ta entraba na mi i es ta daba mi órdi. Alvês N ta staba na mi, má otu óra N ka ta staba na mi. N txiga ti di internadu pamodi N ta staba sima algen dodu. Dimónis pirsigi-m di tal manera ki N ta staba sénpri nervóza. N kumesa ta toma ramedi pa kalma-m i N kumesa ta bebe i fuma tudu óra. Kel kuza li dura un monti di anu.”

Má ku ajuda di Jeová i di se Tistimunhas li na Téra, Nilda libra di dimónis i gósi el ten bon saúdi i un vida dretu. El fla: “N ta insentiva tudu algen pa nunka, má nunka própi, pa es ka tenta pâpia ku spritus [mau].”