Spritus ta izisti! Ten spritus bon i spritus mau. Má kes spritu li é ka algen ki ta viveba na Téra i dipôs móre?

Nau. Óras ki un algen móre, el ka ta bai pa un mundu di spritu sima txeu algen ta pensa. Modi ki nu sabe di kel-li? Pamodi é Bíblia ki ta fla. Bíblia é un livru ki ta fla-nu kes verdadi ki ta ben di kel úniku Deus verdaderu, ki txoma Jeová. É Jeová ki faze algen na Téra, i el sabe dretu kuzê ki ta kontise ku nos óras ki nu ta móre. — Salmo 83:18; 2 Timóteo 3:16.

Bíblia ta fla ma Deus faze kel primeru ómi, Adon, ‘di pó di téra’. (Génesis 2:7) Deus pô-l na un paraízu, ki txomaba jardin di Éden. Si Adon obiba ku Jeová, el ka ta moreba i ti inda el staba bibu li na Téra. Má dja ki el disidi ka obi ku lei di Deus di propózitu, Deus fla-l: ‘Bu ta bai pa téra otu bês, dja ki é di la ki bu tradu. Pamodi bo é téra i pa téra bu ta bai otu bês.’ — Génesis 3:19.

Kuzê ki kel-li krê fla? Undi ki Adon staba antis di Jeová faze-l di pó di téra? El ka staba na ninhun lugar. El ka éra un spritu na Séu ki staba ta ben nase li na Téra. El ka ta izistiba. Pur isu, kantu Jeová fla Adon ma ‘el ta baba pa téra otu bês’, Jeová staba ta fla-l ma el ta moreba. El ka bai pa un mundu di spritu. Kantu Adon móre, el fika sen vida ô el dexa di izisti. Nton mórti é kontráriu di vida.

Má kuzê ki nu pode fla di kes otu algen ki dja móre? Es dexa di izisti tanbê? Bíblia ta fla:

• ‘Es tudu [ómi ku animal] ta bai pa mésmu lugar. Es tudu ben di téra i es tudu ta volta pa téra.’ — Eclesiastes 3:20.

• ‘Mortus ka sabe di más nada’. — Eclesiastes 9:5.

• ‘Ses amor, ses ódiu i ses siumi dja kaba’. — Eclesiastes 9:6.

• ‘Ka ten trabadju, nen planus, nen konhisimentu, nen sabedoria na Sipultura, lugar pa undi bu ta bai.’ — Eclesiastes 9:10.

• ‘[Ómi] ta torna ba pa téra; na kel dia mê se pensamentus ta kaba.’ — Salmo 146:4.

Bu ta atxa ma é difísil kridita na kel ki Bíblia ta fla sobri kel asuntu li? Nton pensa na kel-li: normalmenti, é ómi ki ta ganha dinheru pa sustenta se família. Óras ki el ta móre, se família pode pasa pa difikuldadis. Alvês se mudjer ku se fidjus nen ka ta ten dinheru ki ta txiga pa es kunpra kumida. Ti inimigus di kel ómi pode abuza di es. Má gósi pergunta bu kabésa: ‘Si kel ómi sta bibu na mundu di spritu, pamodi ki el ka ta kontinua ta kuida di se família? Pamodi ki el ka ta proteje se família di kes algen mau?’ É pamodi é sima Bíblia fla: kel ómi ka sta bibu nen el ka ta pode faze más nada. — Salmo 115:17.

Nton kel-li krê fla ma algen ki dja móre, nunka más ka ta ben vive otu bês? Nau, é ka kel-li. Nu ta ben pâpia di resureison más pa frenti. Má kel-li krê fla ma mortus ka sabe nada di kuzê ki nu sta ta faze. Es ka ta pode odja, nen obi i nen pâpia ku nos. Nu ka meste xinti medu di es. Es ka ta pode djuda-nu nen prujudika-nu. — Eclesiastes 9:4; Isaías 26:14.