1, 2. (a) Ki pergunta nu debe faze pa nos kabésa? (b) Pamodi ki é inportanti nu faze kel pergunta li?

NA BU studu di Bíblia dja bu prende ma ten txeu algen ki ta fla ma es ta adora Deus, má ki ta inxina i ta faze kuzas ki Deus ka gosta. (2 Coríntios 6:17 ) É pur isu ki Jeová ta manda-nu sai di relijion falsu ki ta txomadu ‘Babilónia, kel Grandi’. (Apocalipse 18:2, 4 ) Kuzê ki bu meste faze? Nos tudu nu meste toma un disizon. Nu meste pergunta nos kabésa: ‘N krê adora Deus sima el ta krê ô N krê kontínua ta adora-l sima N sta kustumadu?’

² Si dja bu sai ô dja bu tra bu nómi di un relijion falsu, bu faze un kuza dretu. Má pode ser ki la na fundu di bu korason, inda bu gosta di alguns kuza ki sta ligadu ku relijion falsu. Nu ben odja alguns di kes kustumu ki Deus ka ta seta i sabe pamodi ki é inportanti nu pensa sima Jeová.

3. (a) Pamodi ki alguns algen ta atxa difísil dexa di uza imaji na ses adorason? (b) Kuzê ki Bíblia ta fla sobri imaji?

³ Ten alguns algen ki dja ten txeu ténpu ki es ta uza imaji na ses kaza pa es adora Deus. Si kel-li ta kontise ku bo, bu pode xinti stranhu si bu adora Deus sen imaji ô ma adora Deus sen uza imaji é ka dretu. Má lenbra ma é Jeová ki ta inxina-nu modi ki nu debe  adora-l. I Bíblia ta fla klaru ma Jeová ka krê pa nu adora-l ku imajis. — Lé Êxodo 20:4, 5; Salmo 115:4-8; Isaías 42:8; 1 João 5:21.

4. (a) Pamodi ki nu ka debe faze orason pa algen mortu? (b) Pamodi ki Jeová fla israelitas pa ka tenta pâpia ku algen mortu?

⁴ Alguns algen ta gasta txeu ténpu i es ta sforsa txeu pa tenta agrada kes algen na ses família ki dja móre. Alguns ti ta faze orason pa es. Má dja nu prende ma algen ki dja móre ka ta pode djuda-nu nen prujudika-nu. Es ka sta ta vive na ninhun lugar. Aliás, é prigozu nu tenta pâpia ku es pamodi kalker informason ki ta parse ma ben di algen ki sta mortu, ta ben di dimónis. É pur isu ki Jeová fla israelitas pa ka tenta pâpia ku kes algen ki sta mortu ô faze kalker kuza ki sta ligadu ku fitisaria ô bruxaria. — Deuteronómio 18:10-12 ; djobe pártis PRENDE MÁS n^u 26 i 31.

5. Kuzê ki pode djuda-u dexa di uza imaji i faze orason pa algen ki sta mortu?

⁵ Kuzê ki pode djuda-u dexa di uza imaji i faze orason pa algen ki sta mortu? Bu meste lé Bíblia i ntende kuzê ki Jeová ta atxa di kes kuza li. Jeová ten ódiu di es. (Deuteronómio 27:15 ) Pidi Jeová tudu dia pa el djuda-u adora-l di manera ki el ta krê i pensa sima el. (Isaías 55:9 ) Bu pode ten sertéza ma Jeová ta da-u forsa ki bu meste pa bu bandona kalker kuza ki ten aver ku adorason falsu.

6. Pamodi ki skodjedu 25 di dizénbru pa komemora nasimentu di Jizus?

⁶ Natal é un fésta ki ta fazedu na mundu interu.  Kuazi tudu algen ta atxa ma Jizus nase dia di Natal. Má Natal sta ligadu ku adorason falsu. Un ensiklopédia splika ma kes algen ki ta adoraba deus falsu ta fazeba fésta na dia 25 di dizénbru pa komemoraba nasimentu di sól. Nton, kes xéfi di relijion kriston atxa ma midjór manera di traze kes algen pa ses relijion éra komemora nasimentu di Jizus na mésmu dia ki es. Má es sabeba ma Jizus ka nase na dia 25 di dizénbru. (Lucas 2:8-12 ) Disiplus di Jizus ka ta komemoraba Natal. Un livru (Origens Sagradas de Coisas Profundas), na inglês, ta splika ma uns 200 anu dipôs ki Jizus nase “ningen ka sabeba i kuazi ningen ka ta nportaba ku sabe, na ki ténpu sértu ki el naseba”. Fésta di Natal kumesa ta fazedu más di 300 anu dipôs ki Jizus móre.

7. Pamodi ki kristons verdaderu ka ta komemora Natal?

⁷ Txeu algen sabe ma Natal i tudu kuzas ki ten aver ku el, sima faze fésta, tróka di prezenti, ben di kes relijion ki ta adoraba deus falsu. Pur izénplu, na Inglatéra i na alguns párti di Mérka, éra proibidu faze fésta di Natal pamodi es sabeba ma el binha di kes relijion ki ta adoraba deus falsu. Ken ki komemoraba Natal ta sérba kastigadu. Má simé, dipôs di algun ténpu pesoas kumesa ta komemora Natal. Pamodi ki kristons verdaderu ka ta komemora Natal? Pamodi es krê faze vontadi di Deus na tudu kuza.

8, 9. Pamodi ki kes primeru kriston ka ta komemoraba aniversáriu?

⁸ Otu fésta ki txeu algen ta komemora é aniversáriu. Kristons verdaderu debe komemora aniversáriu? Bíblia ta fala sô di dôs fésta di aniversáriu. Má ninhun di  kes algen ka ta adoraba Jeová. (Génesis 40:20; Marcos 6:21 ) Komemorason di aniversáriu ta fazeda pa onra kes deus falsu. É pur isu ki kes primeru kriston ‘ta atxaba ma komemorason di aniversáriu di kalker algen éra un kustumu di kes relijion ki ta adoraba deus falsu’. — Enciclopédia Delta Universal.

⁹ Kes algen ki ta viveba na Roma i na Grésia, na ténpu antigu, ta kriditaba ma tinha un spritu ki ta odjaba un algen ta nase i ma kel spritu ta protejeba kel algen pa tudu ténpu di se vida.

10. Pamodi ki kristons verdaderu ka debe komemora aniversáriu?

¹⁰ Jeová ka ta seta ninhun fésta ki ten aver ku relijion falsu. (Isaías 65:11, 12 ) É pur isu ki kristons verdaderu ka ta faze fésta di aniversáriu i nen ninhun feriadu ki ten aver ku relijion falsu.

11. (a) Pamodi ki alguns algen ta kontínua ta komemora feriadus ki ten aver ku relijion falsu? (b) Kuzê ki debe ser más inportanti pa bo?

¹¹ Alguns algen sabe ma fésta di Natal i otus dia feriadu ten aver ku relijion falsu, má simé es ta komemora-s. Es ta atxa ma kes dia li é un bon oportunidadi pa es sta djuntu ku ses família. É si ki bu ta xinti tanbê? É ka mariadu nu krê pasa ténpu djuntu ku família. É Jeová ki kria família i el krê pa nu ser filís i unidu ku kunpanheru. (Efésios 3:14, 15 ) Má faze kel ki Jeová krê é más inportanti ki faze féstas ô komemora feriadus ki ten aver ku relijion falsu, sô pa agrada nos família. Pur isu, apóstlu Polu fla: ‘Sénpri nhos djobe dretu kel ki ta dexa Sinhor kontenti’. — Efésios 5:10.

12. Ki tipus di feriadu Jeová ka ta krê pa nu komemora?

 ¹² Txeu algen ta atxa ma ka ta nporta di undi ki kel feriadu ben. Má é ka si ki Jeová ta pensa. El ka ta krê pa nu komemora feriadus ki ten aver ku adorason falsu ô ki ta fazedu pa da glória pa un algen ô un nason. Pur izénplu, pesoas na Ijitu ta fazeba txeu komemorason pa onraba ses deus falsu. Dipôs ki israelitas sai di Ijitu, es kôpia un di kes komemorason ki pesoas di Ijitu ta fazeba i es fla ma éra un ‘fésta pa Jeová.’ Má Jeová kastiga-s pa kuza ki es faze. (Êxodo 32:2-10 ) Sima proféta Izaías fla, nu ka debe ‘toka na nada inpuru!’ — Lé Isaías 52:11.

13. Ki perguntas talvês bu pode faze óras ki bu disidi para di komemora feriadus?

¹³ Óras ki bu disidi para di komemora feriadus, talvês bu pode faze txeu pergunta. Pur izénplu: ‘Kuzê ki N debe fla si nhas koléga di trabadju pergunta-m pamodi ki N ka ta komemora Natal? Kuzê ki N debe faze si un algen da-m prezenti di Natal? Kuzê ki N debe faze si nha maridu ô nha mudjer krê pa N komemora un feriadu? Modi ki N pode djuda nhas fidju pa es ka fika tristi pamodi nu ka sta komemora un feriadu ô ses aniversáriu?’

14, 15. Kuzê ki bu pode faze si un algen dizeja-u “Filís Natal” ô si el da-u prezenti?

¹⁴ Aji ku sabedoria ta djuda-u sabe kuzê ki bu ta fla i kuzê ki bu ta faze na kada situason. Pur izénplu, si un algen dizeja-u “Filís Natal” ô “Filís anu novu”, bu ka meste iginora-l. Bu pode sô fla: “Obrigadu”. Má si  algen krê sabe más, bu pode splika-l pamodi ki bu ka ta partisipa na kel fésta. Má lenbra ma sénpri nu debe pâpia ku amor i ruspetu. Bíblia ta fla: ‘Ki nhos palavras ser sénpri sábi, tenpradu ku sal, pa nhos sabe modi ki nhos ta responde tudu algen.’ (Colossenses 4:6 ) Bu pode splika ma bu gosta di pasa ténpu ku amigus i di da-s prezenti, má ka na kes dia di fésta.

¹⁵ Kuzê ki bu debe faze si un algen da-u prezenti? Bíblia ka ta da-nu un lista di régras, má el ta fla-nu kuzê ki nu debe faze pa nos konsénsia fika linpu. (1 Timóteo 1:18, 19 ) Talvês kel algen ki da-u prezenti ka sabe ma bu ka ta komemora feriadus. Ô talvês el pode fla: “N sabe ma bu ka ta partisipa na es fésta, má simé N krê da-u es prezenti.” Na kes situason li, bu ta disidi si bu ta toma prezenti ô nau. Ka ta nporta disizon ki bu toma, más inportanti é pa bu fika ku un konsénsia linpu. Nu ka krê faze nada ki pode straga nos amizadi ku Jeová.

16. Kuzê ki bu debe faze si bu família krê pa bu komemora un feriadu?

¹⁶ Kuzê ki bu meste faze si bu família krê komemora un feriadu? Bu ka meste briga ku es. Lenbra ma es ten direitu di disidi kuzê ki es krê faze. Mostra-s amor i ruspeta ses disizon. (Lé Mateus 7:12.) Má kuzê ki bu debe faze, si bu família krê pa bu komemora un feriadu? Antis di bu disidi kuzê ki bu ta faze, pidi Jeová pa djuda-u toma un bon disizon. Pensa i faze piskiza sobri es asuntu. Más inportanti é ten sertéza ma bu sta faze kel ki Jeová krê.

17. Kuzê ki bu pode faze pa djuda bus fidju ka fika tristi óras ki es ta odja otus algen ta komemora feriadus?

 ¹⁷ Kuzê ki bu pode faze pa bus fidju ka fika tristi óras ki es ta odja otus algen ta komemora feriadus? Manenti bu pode faze-s un fésta ô da-s un prezenti na un dia ki es ka sta ta spéra. Má, midjór prezenti ki bu pode da-s é bu amor i pasa ténpu ku es.

18. Pamodi ki nu debe sisti runion?

¹⁸ Dja nu odja ma pa nu faze vontadi di Jeová, nu meste bandona relijion falsu i kes komemorason ki sta ligadu ku el. Má nu meste faze otus kuza pa nu adora Deus sima el ta krê. Modi? Un di kes kuza é sisti tudu runion. (Lé Hebreus 10:24, 25.) Runion é un kuza inportanti na nos adorason pa Jeová. (Salmo 22:22; 122:1 ) I óras ki nu ta sta na runion djuntu ku nos irmons, nu ta da kunpanheru koraji. — Romanos 1:12.

19. Pamodi ki é inportanti fla otus algen kuzê ki dja bu prende di Bíblia?

¹⁹ Otu kuza ki Jeová krê, é pa nu pâpia ku otus algen sobri kuzê ki dja nu prende di Bíblia. Monti algen ta xinti tristi pamodi maldadi ki ten na mundu. Talvês bu konxe algun algen ki sta xinti si. Fala ku el sobri kuzê ki Bíblia ta promete pa futuru. Si bu ta sisti runions i pâpia ku otus algen sobri Bíblia, bu ta xinti ma kel vontadi di partisipa na kuzas di relijion falsu ta ba ta kaba. Bu pode ten sertéza ma bu ta ser filís i ma Jeová ta bênsua bus sforsu di adora-l sima el ta krê. — Malaquias 3:10.