1, 2. Pamodi ki Bíblia é un grandi prezenti ki Deus da-nu?

IMAJINA ki un amigu da-u un prezenti ki bu ka sta speraba. Modi ki bu ta xinti? Bu ta tene gana di abri-l i bu ta fika kontenti pamodi el lenbra di bo. I dipôs bu ta fla-l obrigadu.

² Bíblia é un prezenti ki Deus da-nu. El ta fla-nu kuzas ki nu ka ta atxa na ninhun otu lugar. Pur izénplu, el ta fla-nu ma Deus kria Séu ku Téra i el kria primeru ómi ku primeru mudjer. El ta da-nu prinsípius ki pode djuda-nu óras ki nu sta ta pasa pa prublémas. Na Bíblia nu ta prende modi ki Deus ta ben kunpri se promésa di faze Téra bira un lugar midjór. Bíblia é un grandi prezenti di Deus!

3. Sima bu ta ba ta studa Bíblia, kuzê ki bu ta prende?

³ Sima bu ta ba ta studa Bíblia, bu ta odja ma Deus krê pa bu bira se amigu. Kantu más bu ta prende sobri el, más fórti nhos amizadi ta bira.

4. Ki informason sobri Bíblia ta dexa-u spantadu?

⁴ Bíblia dja traduzidu na más di 2.800 língua i bilhons di kópia dja inprimidu. Na kada 100 algen na mundu ten más di 90 ki ta pode lé Bíblia na ses língua. I kada simana más di un milhon di algen ta ranja un Bíblia! Ka ten ninhun otu livru ki ta konpara ku Bíblia.

5. Pamodi ki nu pode fla ma Bíblia ‘ben di Deus’?

 ⁵ Bíblia ‘ben di Deus’. (Lé 2 Timóteo 3:16.) Má alguns algen ta pensa: ‘Si é ómis ki skrebe Bíblia, nton modi ki el ben di Deus?’ Bíblia ta responde: ‘Ómis pâpia di párti di Deus sima es giadu pa spritu santu.’ (2 Pedro 1:21 ) É sima si bu avó pidi-u pa bu skrebe-l un karta. Kel karta é di kenha? É di bo ô di bu avó? É klaru ki é di bu avó. Di mésmu manera, Autor di Bíblia é Deus, i nau kes ómi ki el uza pa skrebe-l. Deus gia-s pa es skrebe se pensamentus. Bíblia é própi ‘palavra di Deus’. — 1 Tessalonicenses 2:13 ; djobe párti PRENDE MÁS n^u 2.

6, 7. Pamodi ki nu pode fla ma tudu pártis di Bíblia ta konbina ku kunpanheru?

⁶ Pa skrebe Bíblia di komésu pa fin leba más di 1.600 anu. Kes algen ki skrebe Bíblia ka vive na omésmu ténpu. Alguns tinha skóla i otus ka tinha. Pur izénplu, un di es éra dotor. Otus éra agrikultor, piskador, pastor, proféta, juís i rei. Mésmu ki kes skritor éra diferenti, tudu pártis di Bíblia ki es skrebe ta konbina ku kunpanheru. Bíblia ka ta fla un kuza na un kapítlu pa dipôs el fla otu kuza na kel otu kapítlu. *

⁷ Kes primeru kapítlu di Bíblia ta splika modi ki prublémas kumesa na mundu. I kes últimu kapítlu ta fla-nu modi ki Deus ta ben rezolve prublémas di mundu óras ki el faze Téra bira un paraízu. Bíblia ta fala di milharis di anu di stória di ómis na mundu i el ta mostra ma Deus sénpri ta kunpri kel ki el promete.

8. Da izénplus ki ta mostra ma Bíblia é izatu óras ki el ta fala sobri siênsia.

⁸ Bíblia ka skrebedu pa inxina siênsia ô pa ser un livru di skóla, má kuzê ki el ta fla sobri siênsia ka ta fadja. I é kel-la ki nu ta speraba di un livru ki ben di Deus. Pur izénplu, livru di Levítico ten instruson ki Deus da israelitas di kuzê ki éra pa es fazeba pa ka dexaba duénsa spadja. Kel-li skrebedu mutu antis di pesoas sabe modi ki mikróbius ku vírus ta pasa  duénsa. Bíblia sta sértu óras ki el ta inxina ma Téra ka ten nada pa susti-l. (Jó 26:7 ) I kantu kuazi tudu algen ta atxaba ma Téra éra planu, Bíblia dja flaba ma Téra éra rodóndu. — Isaías 40:22.

9. Kuzê ki onestidadi di kes ki skrebe Bíblia ta djuda-nu ntende?

⁹ Óras ki Bíblia ta fala di stória, el é sénpri izatu. Má txeu livru di stória nen sénpri é ka izatu pamodi ses skritor é ka onéstu. Pur izénplu, txeu bês es ka ta skrebeba óras ki ses nason perdeba géra. Má, skritoris di Bíblia éra onéstu mésmu óras ki ses nason ta perdeba géra. Tanbê es skrebe sobri ses éru gravi. Pur izénplu, na livru di Números, Muizes ki é un di kes ki skrebe Bíblia, fala di se éru i di modi ki Deus kastiga-l pa kuzê ki el faze. (Números 20:2-12 ) Nu ta odja ma Bíblia ben di Deus pamodi se skritoris éra onéstu. Kel-li ta mostra ma nu pode kúnfia na Bíblia.

10. Pamodi ki ti inda konsedjus di Bíblia ta djuda-nu?

¹⁰ Bíblia ‘ben di Deus i el ta sirbi pa inxina, pa koriji, pa poi kuzas na kaminhu’. (2 Timóteo 3:16 ) Ti inda konsedjus di Bíblia ta djuda-nu. Pamodi? Pamodi é Jeová ki faze-nu, nton el ta ntende kuzê ki nu ta pensa i kuzê ki nu ta xinti. El konxe-nu midjór di ki nos nu konxe nos kabésa, i el krê pa nu ser filís. El sabe kuzê ki é bon i kuzê ki é mau pa nos.

11, 12. (a) Ki bons konsedju Jizus da na livru di Mateus kapítlus 5 ti 7? (b) Kuzê más ki nu pode prende di Bíblia?

¹¹ Na livru di Mateus kapítlus 5 ti 7, nu ta atxa bons konsedju ki Jizus da. Konsedjus sobri modi ki  nu pode ser filís, modi ki nu debe trata kunpanheru, modi ki nu debe faze orason i ki inportánsia dinheru debe ten na nos vida. Dja ten 2 mil anu ki el da kes konsedju li, má simé es ten valor i es ta djuda-nu oji.

¹² Na Bíblia, Jeová tanbê ta inxina-nu prinsípius ki ta djuda-nu ten un família filís, ser un bon trabadjador i vive na pas ku kunpanheru. Ka ta nporta ken ki nos é, undi nu ta mora ô ki prublémas nu ten, prinsípius di Bíblia pode djuda-nu sénpri. — Lé Isaías 48:17 ; djobe párti PRENDE MÁS n^u 3.

13. Kuzê ki Izaías flaba ma ta kontiseba ku sidadi di Babilónia?

¹³ Monti profesia di Bíblia dja kunpri. Pur izénplu, profesia di Izaías flaba ma sidadi di Babilónia ta sérba distruídu. (Isaías 13:19 ) El mostra tintin pa tintin modi ki kel-la ta kontiseba. Sidadi di Babilónia tinha portons grandi i un riu pa proteje-l. Má Izaías fla ma riu ta sekaba i ma portons ta dexadu abértu. Trópas inimigu ta entraba na sidadi sen géra. Izaías tanbê fla ma un ómi ki txomaba Ciro ta distruíba Babilónia. — Lé Isaías 44:27–45:2 ; djobe párti PRENDE MÁS n^u 4.

14, 15. Modi ki profesia di Izaías kunpri?

¹⁴ Dipôs di 200 anu ki kel profesia li skrebedu, trópas ataka Babilónia. Ken ki staba ta kumánda kes trópa? Sima profesia dja flaba, éra Ciro rei di Pérsia. Má kes trópa di Ciro ta konsigi entraba na Babilónia sima proféta Izaías dja flaba?

 ¹⁵ Gentis di Babilónia staba na un fésta grandi na kel noti ki es atakadu. Es staba ta xinti suguru pamodi ses sidadi tinha paredis altu i fórti i un riu pa proteje-s. Fóra di sidadi, Ciro i se trópas koba un vala pa disvia agu di kel riu. Kantu agu fika poku, kes trópa di Pérsia konsigi trabesa riu. Má modi ki trópas ta  konsigi entraba na sidadi? Sima profesia dja flaba, portons di sidadi di Babilónia dexadu abértu. Nton, trópas konsigi entra na sidadi sen géra.

16. (a) Kuzê ki profesia di Izaías dja flaba ma ta kontiseba ku Babilónia? (b) Modi ki nu sabe ma profesia di Izaías kunpri?

¹⁶ Izaías dja flaba ma dipôs ningen ka ta ba moraba más na Babilónia. El skrebe: ‘Nunka más ningen ka ta mora la, jerason ta sai jerason ta entra, el ka ta ten algen ta mora na el.’ (Isaías 13:20 ) Kel-li kontise mê? Na lugar undi éra Babilónia, uns 80 kilómetru di sul di Bagdá, Iraque, nu ta atxa sô parduerus. Ti inda ningen ka ta vive la. Jeová bare Babilónia ‘ku basora di distruison’. — Isaías 14:22, 23. *

17. Pamodi ki nu pode kúnfia na tudu promésas di Deus?

¹⁷ Nu pode kúnfia na kuzê ki Bíblia ta fla sobri  futuru pamodi monti profesia di Bíblia dja kunpri. Kel-li ta da-nu sertéza ma Jeová ta ben kunpri se promésa di faze Téra bira un paraízu. (Lé Números 23:19.) Sin, nu ten speransa di ‘vida itérnu ki Deus, ki ka pode konta mintira, promete dja ten txeu ténpu’. — Tito 1:2. *

18. Kuzê ki apóstlu Polu fla sobri ‘palavra di Deus’?

¹⁸ Dja nu prende ma ka ten ninhun otu livru ki ta konpara ku Bíblia. El ta da-nu bons konsedju i el ten un monti profesia ki dja kunpri. Má Bíblia ta faze más ki kel-li. Apóstlu Polu fla: ‘Palavra di Deus é bibu i el ten puder’. Kuzê ki kel-li krê fla? — Lé Hebreus 4:12.

19, 20. (a) Modi ki Bíblia pode djuda-u sabe ken ki bo é? (b) Modi ki bu pode mostra ma bu ta da valor pa es prezenti ki é Bíblia?

¹⁹ Bíblia pode muda bu vida. El pode djuda-u sabe ken ki bo é dimé-divéra. El pode djuda-u ntende kuzas ki bu ta pensa i kuzas ki bu ta xinti na fundu di bu korason. Pur izénplu, talvês nu ta fla ma nu ta ama Deus. Má, pa nu prova ma nu ta ama-l nu meste faze kel ki Bíblia ta fla.

²⁰ Bíblia é un livru ki ben di Deus. Deus krê pa bu le-l, pa bu studa-l i pa bu ama-l. Mostra ma bu ta da valor pa es prezenti di Deus i kontínua ta studa-l. Nton, bu ta ben ntende kal ki é vontadi di Deus pa umanus. Na kapítlu 3 nu ta ben sabe más sobri kel-li.