1. Ki pergunta bu pode faze dipôs di studa es livru?

DJA bu prende txeu verdadi di Bíblia na studa es livru. Pur izénplu, bu prende ma Deus ta promete vida pa tudu ténpu, kal ki é verdadi sobri mórti i sobri speransa di resureison. (Eclesiastes 9:5; Lucas 23:43; João 5:28, 29; Apocalipse 21:3, 4 ) Dja bu kumesa ta sisti runions di Tistimunhas di Jeová i bu ta kridita ma es ta adora Deus sima el ta manda. (João 13:35 ) Talvês, dja bu kumesa ta bira más  amigu di Deus, i dja bu disidi sirbi-l. Má bu pode pergunta: ‘Ten más algun kuza ki N meste faze pa N sirbi Deus?’

2. Pamodi ki kel ómi di Itiópia disidi batiza?

² É kel-li ki un ómi di Itiópia ki vive na ténpu di Jizus pergunta. Un ténpu dipôs ki Jizus resusitadu, Filipi ki éra un disiplu di Jizus, pâpia di notísias sábi ku kel ómi. Filipi djuda-l ntende ma Jizus éra Misías. Kel ómi gosta txeu di kuza ki el prende i el fla kel óra: “Ali agu li, kuzê ki ta stroba-m di batiza?” — Atus 8:26-36, BPK.

3. (a) Kuzê ki Jizus fla se disiplus? (b) Modi ki un algen debe ser batizadu?

³ Bíblia ta inxina klaru ma si bu krê sirbi Deus bu meste batiza. Jizus fla se disiplus: ‘Nhos faze disiplus di algen di tudu nasons, nhos batiza-s’. (Mateus 28:19 ) Tanbê própi Jizus da izénplu kantu el batiza. É ka sô un bokadinhu di agu ki el podu na kabésa, el kanba korpu interu na agu. (Mateus 3:16 ) Oji, óras ki un kriston verdaderu ta batiza el debe kanba korpu interu déntu di agu.

4. Kuzê ki bu batismu ta mostra pa otus algen?

⁴ Óras ki bu batiza bu sta ta mostra otus algen ma bu krê ser amigu di Deus i faze se vontadi. (Salmo 40:7, 8 ) Talvês bu pode pergunta bu kabésa: ‘Kuzê ki N meste faze pa N pode batiza?’

5. (a) Kuzê ki bu debe faze antis di batiza? (b) Pamodi ki sisti runions é inportanti?

⁵ Antis di bu batiza, bu meste konxe Jeová i Jizus. Sima bu sta ta studa Bíblia dja bu kumesa ta konxe-s.  (Lé João 17:3.) Má sô kel-li ka ta txiga. Bíblia ta fla ma bu meste ten ‘konhisimentu izatu’ di vontadi di Jeová. (Colossenses 1:9 ) Runions di Tistimunhas di Jeová ta djuda-u kria un amizadi fórti ku Jeová. Kel-li é un motivu inportanti pa bu sisti tudu runion. — Hebreus 10:24, 25.

6. Kuzê ki bu meste konxe sobri Bíblia antis di bu batiza?

⁶ É klaru ki Jeová ka ta spéra pa bu sabe tudu kuza ki sta na Bíblia antis di bu batiza. El ka spéra pa kel ómi di Itiópia sabe tudu kuza antis di el batiza. (Atos 8:30, 31 ) Bíblia ta fla ma nu ta kontínua ta prende sobri Deus pa tudu ténpu. (Eclesiastes 3:11 ) Má antis di bu batiza, bu meste konxe i seta kes verdadi prinsipal di Bíblia. — Hebreus 5:12.

7. Modi ki bu studu di Bíblia djuda-u?

⁷ Bíblia ta fla: ‘Sen fé nu ka ta pode agrada Deus’. (Hebreus 11:6 ) Nton bu meste ten fé antis di bu batiza. Bíblia ta fla-nu ma na ténpu di apóstlus alguns sigidor di Jizus ba inxina na sidadi di Korintu. I kal ki foi rezultadu? Txeu algen di Korintu kridita i es batiza. (Atos 18:8 ) Di mésmu manera, bu studu di Bíblia djuda-u ten fé ô kridita na promésas di Deus i na sakrifisiu ki Jizus faze pa nos, ki ta salva-nu di pekadu i mórti. — Josué 23:14; Atos 4:12; 2 Timóteo 3:16, 17.

8. Kuzê ki ta pô-u xinti gana di pâpia ku otus algen sobri kuzas ki dja bu prende?

⁸ Sima bu ta ba ta prende más sobri Bíblia i odja modi ki el ta djuda-u na bu vida, bu fé ta fika más  fórti. Bu fé ta pô-u xinti gana di pâpia ku otus algen sobri kuzas ki dja bu prende. (Jeremias 20:9; 2 Coríntios 4:13 ) Má ku kenha ki bu pode pâpia?

9, 10. (a) Ku kenha ki bu pode kumesa pâpia sobri kuzê ki dja bu prende na Bíblia? (b) Kuzê ki bu meste faze si bu krê prega djuntu ku kongregason?

⁹ Talvês bu pode krê pâpia ku bu família, amigus, vizinhus ô kolégas di trabadju. É bon faze kel-li, má sénpri faze-l ku amor i bondadi. Dipôs bu pode kumesa ta prega djuntu ku kongregason. Óras ki bu atxa ma bu sta priparadu bu pode fla kel algen ki ta studa Bíblia ku bo, ma bu ta gostaba di partisipa na pregason djuntu ku kongregason. Si kel algen atxa ma bu sta priparadu i ma bu sta ta vive di akordu ku kes kuza ki dja bu prende na Bíblia, nhos ta ten un runion djuntu ku dôs ansion di kongregason.

¹⁰ Kuzê ki ta ba kontise na kel runion? Ansions ta ba pâpia ku bo, pa odja si dja bu ntende i si bu ta kridita na kes verdadi prinsipal di Bíblia. Tanbê, es ta ba odja si bu sta ta vive di akordu ku kel ki dja bu prende na Bíblia i si bu krê ser mésmu un Tistimunha di Jeová. Ka bu skese ma ansions ta kuida ku amor di tudu algen na kongregason, i bu pode ten sertéza ma es ta ba trata-u di mésmu manera. Pur isu, bu ka meste xinti medu di pâpia ku es. (Atos 20:28; 1 Pedro 5:2, 3 ) Dipôs di es runion, ansions ta dexa-u sabe si dja bu pode kumesa ta prega djuntu ku kongregason.

11. Pamodi ki é inportanti bu faze mudansas antis di bu kumesa prega djuntu ku kongregason?

¹¹ Ansions pode splika-u ki mudansas bu meste faze  antis di bu kumesa prega djuntu ku kongregason. Pamodi ki é inportanti bu faze kes mudansa li? Pamodi óras ki nu kumesa pâpia ku otus algen sobri Jeová, nu sta ta reprizenta-l i nos manera di vive debe mostra ma nu ta ruspeta Jeová. — 1 Coríntios 6:9, 10; Gálatas 5:19-21.

12. Pamodi ki tudu algen meste rapende?

¹² Ten más un kuza ki bu meste faze antis di bu batiza. Apóstlu Pedru fla ma nu meste rapende i muda nos vida, pa nos pekadus pode ser purduadu. (Atos 3:19 ) Kuzê ki siginifika rapende? Rapende é óras ki nu fika txeu tristi pamodi kuzas mariadu ki nu fazeba. Pur izénplu, si bu ta lebaba un vida ku konportamentu seksual mariadu, bu meste rapende. Mésmu ki sénpri bu sforsa pa faze kuzas dretu, bu meste rapende simé, pamodi nos tudu nu ta peka i nu meste pidi perdon di Deus. — Romanos 3:23; 5:12.

13. Kuzê ki siginifika muda bu vida?

¹³ Má sô fika tristi pamodi kuzas ki nu faze ta txiga? Nau. Pedru fla tanbê ma nu meste muda nos vida. Kel-li krê fla ma nu debe dexa di faze tudu kes kuza mariadu i pasa ta faze kel ki é dretu. Pa nu ntende kel-li midjór, imajina ma bu sta ta viaja pa un lugar pa primeru bês. Dipôs di algun ténpu bu ta da kónta ma bu sta na kaminhu mariadu. Kuzê ki bu ta faze? Di sertéza bu ta branda velosidadi di karu, bu ta para, bu ta vira pa tras i dipôs bu ta bai na kaminhu dretu. Di mésmu manera, óras ki bu ta studa Bíblia bu ta diskubri ma bu meste muda alguns  konportamentu. Bu meste sta prontu pa muda bu vida, ô faze mudansas ki bu meste i kumesa ta faze kel ki é dretu.

14. Modi ki un algen ta da se vida pa Jeová?

¹⁴ Un otu kuza inportanti ki bu meste faze antis di bu batiza é da bu vida pa Jeová. Modi ki bu ta faze kel-li? Bu ta faze un orason i bu ta promete Jeová ma bu ta adora sô el. Tanbê bu ta promete ma faze se vontadi ta ser kuza más inportanti na bu vida. — Deuteronómio 6:15.

15, 16. Kuzê ki ta poi algen ku gana di da se vida pa Jeová?

¹⁵ Promete sirbi sô Jeová é sima promete pasa réstu di bu vida ku algen ki bu ta ama. Pensa na dôs algen ki é namoradu. Sima kel ómi ta ba ta konxe kel mudjer el ta pasa ta ama-l i el ta krê kaza ku el. Kazamentu é un disizon sériu, má kel ómi ta krê toma kel responsabilidadi pamodi el ta ama kel mudjer.

¹⁶ Sima bu ta ba ta prende sobri Jeová, bu ta pasa ta ama-l i bu ta krê faze bu midjór pa bu sirbi-l. Es amor ta faze-u xinti gana di da bu vida pa Jeová. Bíblia ta fla ma kenha ki krê sigi Jizus meste ‘nega se kabésa’. (Marcos 8:34 ) Kuzê ki kel-li krê fla? Kel-li krê fla ma obi ku Jeová sta na primeru lugar na bu vida. Faze vontadi di Jeová debe ser más inportanti di ki bus dizeju i bus obijetivu na vida. — Lé 1 Pedro 4:2.

17. Pamodi ki alguns algen ka ta da ses vida pa Jeová?

¹⁷ Alguns algen ka ta disidi da ses vida pa Jeová  pamodi es ta xinti medu di ka konsigi mante ses promésa di sirbi-l. Es ka krê pa Jeová fika diziludidu ku es. Ô tanbê es ta atxa ma timenti es ka da ses vida pa Jeová, El ka ta pidi-s kónta pa kuzas ki es ta faze.

18. Kuzê ki ta djuda-u ka xinti medu di diziludi Jeová?

¹⁸ Bu amor pa Jeová ta djuda-u ka xinti medu di diziludi-l. Es amor ta pô-u faze bu midjór pa bu vive sima bu promete-l. (Eclesiastes 5:4; Colossenses 1:10 ) Bu ka ta atxa ma faze vontadi di Jeová é difísil dimás. Apóstlu Juan fla: ‘Amor di Deus ta siginifika kel-li: pa nu obi ku se mandamentus, pamodi se mandamentus é ka pizadu’. — 1 João 5:3.

19. Pamodi ki bu ka debe xinti medu di da bu vida pa Jeová?

¹⁹ Bu ka meste ser perfetu pa bu da bu vida pa Jeová. El ka ta pidi-nu pa nu faze un kuza ki nu ka ta konsigi faze. (Salmo 103:14) El ta djuda-u faze kel ki é dretu. (Isaías 41:10 ) Kúnfia na Jeová di tudu bu korason i el ta djuda-u toma sénpri bons disizon. — Provérbios 3:5, 6.

20. Dipôs ki bu da bu vida pa Jeová, kuzê más ki bu meste faze?

²⁰ Bu ta atxa ma bu sta priparadu pa bu da bu vida pa Jeová? Dipôs ki bu ora pa bu da bu vida pa Jeová, bu meste faze más un kuza. Bu meste batiza.

21, 22. Modi ki bu ta ‘dexa tudu algen sabe’ di bu fé?

²¹ Dexa kordenador di grupu di ansions sabe ma dja bu faze orason pa Jeová pa bu da bu vida pa El i ma bu krê batiza. Dipôs, el ta pidi alguns ansion pa ba pâpia ku bo sobri alguns verdadi prinsipal  di Bíblia. Si es konkorda ma bu sta priparadu, es ta fla-u ma bu pode batiza na asenbleia ô kongrésu di Tistimunhas di Jeová ki sta más pértu. Na dia di bu batismu un irmon ta faze un diskursu pa splika kuzê ki é batismu. Na fin di diskursu el ta faze dôs pergunta sinplis pa kes algen ki sta bai batiza. Óras ki bu responde kes pergunta bu sta ta  dexa tudu algen sabe ma dja bu da bu vida pa Jeová. — Romanos 10:10.

²² Dipôs di diskursu bu ta batizadu. Bu ta kanbadu korpu interu na agu. Kel batismu ta dexa klaru pa tudu algen ma dja bu da bu vida pa Jeová i ma gósi abo é un Tistimunha de Jeová.

23. Kuzê ki krê fla, batiza ‘na nómi di Pai, di Fidju i di spritu santu’?

²³ Jizus fla ma se disiplus ta sérba batizadu ‘na nómi di Pai, di Fidju i di spritu santu’. (Lé Mateus 28:19.) Kuzê ki kel-li krê fla? Na nómi di Pai krê fla ma pa nos, Jeová é Deus Tudu-Poderozu. Na nómi di Fidju krê fla ma nu sabe i nu ta ntende ma Jeová ta uza Jizus pa kunpri se vontadi. Na nómi di spritu santu krê fla ma nu ta seta ma Jeová ta uza se spritu santu pa kunpri se vontadi. — Salmo 83:18; Mateus 28:18; Gálatas 5:22, 23; 2 Pedro 1:21.

24, 25. (a) Kuzê ki siginifika batismu? (b) Kuzê ki nu sta ben odja na kapítlu 19?

²⁴ Batismu ta siginifika un kuza rei di inportanti. Óras ki bu korpu sta tudu déntu di agu é sima ki bu móre pa kel vida ki bu tinha antis, ô ma bu bandona-l. Óras ki bu ta sai di agu, é sima si bu kumesa un vida novu pa faze vontadi di Deus. Kel-li ta mostra ma di kel dia pa frénti bu ta faze sô vontadi di Jeová. Lenbra ma bu ka da bu vida pa un ómi, un organizason ô pa un trabadju. É pa Jeová ki bu da bu vida.

²⁵ Sima bu disidi da bu vida pa Jeová, nhos amizadi ta bira mutu más fórti. (Salmo 25:14 ) Kel-li ka krê fla ma un algen dja sta salvu sô pamodi el batiza. Apóstlu Polu skrebe: ‘Nhos kontínua ta luta pa nhos salva nhos própi kabésa ku grandi ruspetu i ku tremor.’ (Filipenses 2:12 ) Batismu é sô komésu. Má modi ki bu pode kontínua ta ten kel amizadi fórti ku Jeová? Kapítlu 19 ta ben responde es pergunta.