1. Ki orason famozu nu sta ben pâpia di el gósi?

MILHONS di algen konxe kel orason famozu ki ta txomadu Pai-Nosso. Jizus uza es orason pa inxina se disiplus modi ki es debe faze orason. Kuzê ki el pidi na es orason? I pamodi ki es orason é inportanti pa nos oji?

2. Ki três kuza inportanti Jizus inxina-nu pidi na orason?

² Jizus fla: ‘Nton, nhos faze orason asi: ‘Nos Pai ki sta na Séu, pa bu nómi ser santifikadu. Pa bu Reinu ben. Pa bu vontadi fazedu na Séu, asi tanbê na Téra.’’ (Lé Mateus 6:9-13.) Na komésu di orason di Pai-Nosso Jizus inxina-nu pidi três kuza: (1) pa nómi di Deus ser santifikadu, (2) pa Reinu di Deus ben i (3) pa vontadi di Deus fazedu na Séu asi tanbê na Téra. Pamodi ki Jizus inxina-nu pidi kes três kuza li na orason? — Djobe párti PRENDE MÁS n^u 20.

3. Kuzê ki nu meste sabe sobri Reinu di Deus?

³ Dja nu prende ma nómi di Deus é Jeová. I dja nu odja kal ki é vontadi di Deus pa nos i pa Téra. Má kantu Jizus inxina-nu pidi pa Reinu di Deus ben, kuzê ki el krê flaba? Gósi nu ta ben prende kuzê ki é Reinu di Deus, kuzê ki el ta ben faze i modi ki el ta ben santifika nómi di Deus.

4. Kuzê ki é Reinu di Deus? Kenha ki é Rei di es Reinu?

⁴ Jeová kria un govérnu na Séu i el skodje Jizus pa ser Rei. Bíblia ta txoma es govérnu di Reinu di Deus. Jizus é ‘Rei di kes ki ta reina i Sinhor di kes ki ta manda’. (1 Timóteo 6:15 ) Jizus é kapás di governa midjór ki kalker governanti umanu, i el ten más puder ki tudu governantis djuntadu.

5. Na undi ki Reinu di Deus ta fika? Kuzê ki el ta ben governa?

⁵ Dipôs di 40 dia ki Jizus resusitadu, el volta pa Séu. Txeu ténpu dipôs, Jeová skodje-l pa ser Rei di se Reinu. (Atos 2:33 ) La di Séu, govérnu di Deus ta ben governa Téra. (Apocalipse 11:15 ) É pur isu ki Bíblia ta txoma Reinu di Deus di ‘Reinu di Séu.’ — 2 Timóteo 4:18.

6, 7. Pamodi ki Jizus é midjór ki kalker rei umanu?

⁶ Bíblia ta fla ma Jizus é midjór ki kalker rei umanu pamodi ‘nunka el ka ta móre’. (1 Timóteo 6:16 ) Tudu governantis umanu ta móre un dia, má Jizus nunka ka ta móre. Tudu kuza dretu ki Jizus ta ben faze pa nos ta ben dura pa tudu ténpu.

⁷ Un profesia di Bíblia ta fla ma Jizus ta ben ser un Rei justu i ki ta mostra konpaxon. El ta fla: ‘I spritu di Jeová ta ben sta riba di el, spritu di sabedoria i di ntendimentu, spritu di konsedju i di puder, spritu di konhisimentu i di grandi ruspetu pa Jeová. I kel grandi ruspetu pa Jeová ta pô-l ta xinti sábi. El ka ta ben julga sô pa kel ki ta parse, nen el ka ta ben da reprenson sô pa kel ki el ta obi. El ta ben julga kes algen koitadu  ô póbri ku justisa’. (Isaías 11:2-4 ) Bu ta gostaba di tinha un rei asi?

8. Modi ki nu sabe ma Jizus ka sta bai governa el sô?

⁸ Deus skodje alguns algen pa governa ku Jizus na Séu. Pur izénplu, na un karta ki apóstlu Polu skrebe Timóteo, el mostra ma es dôs skodjedu pa ba governa ku Kristu. Polu fla: ‘Si nu kontínua ta mante firmi, tanbê nu ta ba reina djuntu ku el’. (2 Timóteo 2:12 ) Má kantu algen sta bai governa djuntu ku Jizus?

9. Kantu algen ki sta ba governa ku Jizus? Na ki ténpu Deus kumesa ta skodje-s?

⁹ Na kapítlu 7 di es livru nu prende ma, apóstlu Juan tevi un vizon undi el odja Jizus kómu Rei na Séu djuntu ku 144 mil algen ki tanbê éra rei. Kes 144 mil é kenha? Juan splika ma es ‘ten nómi [di Jizus] ku nómi di se Pai skrebedu na tésta.’ Inda el ta fla: ‘É es ki sta sigi Jizus pa undi ki el bai. Es foi kes primeru kunpradu na mundu pa Deus’. (Lé Apocalipse 14:1, 4.) Kes 144 mil é kristons fiel ki Deus skodje pa ‘ben reina Téra’ djuntu ku Jizus. Óras ki es móre, es ta resusitadu pa ba vive na Séu. (Apocalipse 5:10 ) Désdi ténpu di apóstlus, Jeová dja staba ta skodje kristons fiel pa faze párti di kel grupu di 144 mil algen ki ta ba governa.

10. Pamodi ki nu pode ten sertéza ma kes governanti ki Jeová skodje ta ben ntende-nu?

¹⁰ Jeová ta nporta tantu ku nos ki el skodje umanus pa governa ku Jizus. Jizus ta ben ser un bon governanti pamodi el ta ntende-nu. El sabe kuzê  ki siginifika ser umanu i sufri. Apóstlu Polu fla ma Jizus sabe kuzê ki nu ta xinti, el pode ‘ntende nos frakézas’ i el foi ‘provadu di tudu manera sima nos, má el ka ten pekadu.’ (Hebreus 4:15; 5:8 ) Kes 144 mil tanbê sabe modi ki nu ta xinti. I es luta ku inperfeson i duénsa. Nton, nu pode ten sertéza ma Jizus ku kes 144 mil ta ntende modi ki nu ta xinti i prublémas ki nu ten ki lida ku es.

11. Pamodi ki Jizus inxina se disiplus ora pa vontadi di Deus fazedu na Séu?

¹¹ Jizus inxina se disiplus ora pa vontadi di Deus fazedu na Séu. Pamodi? Nu prende na kapítlu 3 ma Satanás, ki tanbê ta txomadu Diabu, rabela kóntra Jeová. Dipôs ki Satanás rabela, Jeová dexa Satanás kontínua ta mora na Séu pa un ténpu, djuntu ku se anjus mau ô dimónis. Nton, é ka tudu algen na Séu ki staba ta faze vontadi di Deus. Na kapítlu 10, nu ta ben prende más sobri Satanás i se dimónis.

12. Di ki dôs kuza inportanti Apocalipse 12:10 ta fala di el?

¹² Bíblia ta splika ma lógu dipôs ki Jizus bira Rei di Reinu di Deus, el ta kumesaba un géra kóntra Satanás. (Lé Apocalipse 12:7-10.) Apocalipse 12:10 ta fala di dôs kuza rei di inportanti ki kontise. Primeru, Jizus bira Rei i Reinu di Deus kumesa ta governa. Sugundu, Satanás tradu fóra di Séu i el botadu pa Téra. Sima nu ta ben prende, kes dôs kuza li dja kontise.

13. Modi ki kes anju fiel xinti kantu Satanás botadu fóra di Séu?

 ¹³ Bíblia ta mostra ma kes anju fiel fika rei di kontenti dipôs ki Satanás ku se dimónis botadu fóra di Séu. Apocalipse 12:12 ta fla: ‘Nhos fika rei di kontenti, ó Séu, i nhos ki ta mora na el!’ Gósi na Séu ten pas ku armonia, pamodi tudu algen ki sta la, sta ta faze vontadi di Deus.

14. Kuzê ki Satanás sta faze dipôs ki el botadu di Séu?

¹⁴ Má situason na Téra é konpletamenti diferenti. Kuzas rei di mariadu sta ta kontise ‘pamodi Diabu dixi pa Téra’ i el sta ‘xeiu di raiba, pamodi el sabe ma falta-l poku ténpu.’ (Apocalipse 12:12 ) Satanás sta uma xatiadu! El botadu fóra di Séu i el sabe ma ka ta dura el ta ben kabadu ku el. El sta faze tudu kel ki el pode pa poi tudu algen na mundu ta sufri i ku vida xeiu di prublémas.

15. Kal ki é vontadi di Deus pa Téra?

¹⁵ Má vontadi di Deus pa Téra ka muda. Ti inda el krê pa umanus perfetu vive pa tudu ténpu na paraízu na Téra. (Salmo 37:29 ) Modi ki Reinu di Deus ta ben poi kel-li ta kontise?

16, 17. Kuzê ki Daniel 2:44 ta fla-nu sobri Reinu di Deus?

¹⁶ Daniel 2:44 ta fla: ‘Na ténpu di kes rei, Deus di Séu ta ben traze un reinu ki ka ta kaba nunka más. I kel reinu li, ka ta pasa pa mô di ninhun otu povu. El ta disfaze i el ta kaba ku tudu reinu di mundu, i el própi ta fika pa tudu ténpu.’ Kuzê ki kel profesia li ta inxina-nu sobri Reinu di Deus?

¹⁷ Primeru, el ta fla-nu ma Reinu di Deus ta governa na ‘ténpu di kes rei’. Kel-li krê fla ma otus govérnu ta izistiba na Téra óras ki Reinu kumesaba ta  governa. Sugundu, el ta fla-nu ma Reinu di Deus ta ben dura pa tudu ténpu i nunka más ninhun govérnu ka ta fika na se lugar. I tirseru, ta ben ten un géra entri Reinu di Deus i govérnus di mundu. Reinu di Deus ta ganha géra i el ta fika ta governa Téra el sô. Téra ta ben ten midjór govérnu ki pode ten!

18. Modi ki ta txomadu kel géra entri govérnus di ómi i Reinu di Deus?

¹⁸ Má, modi ki Reinu di Deus ta ben kaba ku govérnus di ómi i fika na ses lugar? Govérnus ta ben luta kóntra Reinu di Deus. Pamodi? Pamô dimónis ta ben ngana ‘reis di tudu Téra, pa djunta-s pa kel géra di grandi dia di Deus, Tudu-Poderozu.’ Es géra ta txomadu Armajedon. Dipôs ki Reinu di Deus ganha géra el ta ben governa Téra interu. — Apocalipse 16:14, 16 ; djobe párti PRENDE MÁS n^u 10.

19, 20. Pamodi ki nu meste pa Reinu di Deus governa Téra?

¹⁹ Pamodi ki nu meste di Reinu di Deus? Pa peloménus três motivu. Primeru, nos é pekador, nton nu ta fika duenti i nu ta móre. Má Bíblia ta fla ma na Reinu di Deus nu ta ben vive pa tudu ténpu. João 3:16 ta fla: ‘Pamodi Deus ama mundu di tal manera ki el da se Fidju unijénitu, pa tudu kenha ki mostra fé na el ka ser distruídu, má pa ten vida itérnu.’

²⁰ Sugundu, nu meste di Reinu di Deus pamodi nu sta vive na un mundu xeiu di algen mau. Es ta konta mintira, es é dizonéstu i es ta konporta mariadu. Nu ka ta pode faze nada ku es, má Deus ta promete kaba ku es. Pesoas ki ta kontínua ta faze kuzas mariadu ta distruídu na Armajedon. (Lé Salmo 37:10.) Tirseru, nu meste di Reinu di Deus pamodi désdi komésu  govérnus di ómi ten stadu ta mostra ma es é fraku, es é mau i es ta ngana-nu. Es ka ta djuda pesoas obi ku Deus. Bíblia ta fla ma ‘ómi ta manda na ómi pa se disgrasa.’ — Eclesiastes 8:9.

21. Kuzê ki Reinu di Deus ta ben faze?

²¹ Dipôs di Armajedon, Reinu di Deus ta ben faze vontadi di Deus na Téra. Pur izénplu, el ta ben tra Satanás ku se dimónis di Téra. (Apocalipse 20:1-3 ) Reinu di Deus ta ben uza resgati pa kaba ku duénsa i mórti. Tanbê tudu algen ki obi ku Jeová ta ben vive na Paraízu pa tudu ténpu. (Apocalipse 22:1-3 ) Reinu ta ben santifika nómi di Deus. Kuzê ki kel-li krê fla? Kel-li krê fla ma óras ki govérnu di Deus ben governa Téra, tudu algen ta ruspeta i ta onra Jeová. — Djobe párti PRENDE MÁS n^u 21.

22. Modi ki nu sabe ma Jizus ka bira Rei kantu el staba na Téra ô lógu dipôs ki el subi pa Séu?

²² Jizus ka kumesa ta governa kantu el staba na Téra. Nu sabe kel-li pamodi el inxina se disiplus ora: ‘Pa bu Reinu ben.’ Kel-li ta mostra ma govérnu di Deus ta binha na futuru. Primeru Jeová faze se  govérnu i dipôs el faze Jizus Rei. Má Jizus bira Rei lógu ki el subi pa Séu? Nau. El tevi ki spéra. Algun ténpu dipôs ki Jizus resusitadu, Pedru ku Polu splika ma profesia di Salmo 110:1 ta kunpriba na Jizus. Na kel profesia li Jeová fla: ‘Xinta na nha ladu direita, ti ki N poi bus inimigu baxu di bus pé.’ (Atos 2:32-35; Hebreus 10:12, 13 ) Nton, kantu ténpu Jizus tinha ki speraba pa el bira Rei?

23. (a) Ki ténpu ki Jizus kumesa ta governa kómu Rei di govérnu di Deus? (b) Kuzê ki nu ta ben prende na kapítlu 9?

²³ Jizus bira Rei na anu 1914. Txeu ténpu antis di anu 1914, un grupu di kriston ntende ma kel anu ta sérba inportanti na profesia di Bíblia. Kuzas ki sta kontise na mundu désdi anu 1914 ta mostra ma es tinha razon. (Salmo 110:2 ) Lógu dipôs ki Jizus bira Rei, Satanás botadu pa Téra, i gósi ‘el sabe ma falta-l poku ténpu.’ (Apocalipse 12:12 ) Na kapítlu 9, nu ta ben odja otus próva ma nu sta ta vive na kel ‘poku ténpu’ ki Satanás ten. Tanbê nu ta ben prende ma ka ta dura, Reinu di Deus ta ben poi vontadi di Deus fazedu na Téra. — Djobe párti PRENDE MÁS n^u 22.